ރިޔާސީ އިންތިހާބުގައި ވޯޓުލުމަށް ރީ-ރަޖިސްޓަރީ ކުރުމަށް އިލެކްޝަންސް ކޮމިޝަން (އީސީ) އިން ހުޅުވާލި ފުރުސަތު މިއަދު ހަމަވާތީ ވީހާވެސް ގިނަ ބަޔަކު ރީ-ރަޖިސްޓްރީވުމަށް އެ ކޮމިޝަނުން އެދިއްޖެއެވެ.
އިލެކްޝަންސް ކޮމިޝަން ބުނީ ރަށްވެހިވެފައި ނޫން އެހެން ތަނެއްގައި ވޯޓު ލުމަށް ރީރެޖިސްޓްރީ ކުރުމަށް ދީފައިވާ ފުރުސަތު މިއަދު ހަވީރު 16:00 ގައި ހަމަވާނެ ކަމަށެވެ.
އިންތިހާބަށް މިހާރު ރީ-ރަޖިސްޓްރީ ކުރެވޭނީ ފޯމު މެދުވެރިކޮށެވެ. އޮންލައިންކޮށް ރީ-ރަޖިސްޓްރީވުމުގެ ފުރުސަތު މިދިޔަ ބުދަ ދުވަހު ވަނީ ހަމަވެފައެވެ. ރީ-ރަޖިސްޓްރީ ކުރެވޭނީ ފޯމް، އިލެކްޝަންސް ކޮމިޝަނަށް ނޫނީ ފޯކަލް ޕޮއިންޓަކަށް ހުށަހަޅައިގެންނެވެ.
އިންތިހާބަށް ރީ-ރަޖިސްޓަރީ ވާން ހުޅުވާލިޔަސް، މާލޭގައި ވޯޓުލުމަށް މީގެ ކުރިން ރަޖިސްޓަރީ ވެފައިވާ މީހުން އަލުން ރަޖިސްޓަރީ ކުރަން ނުޖެހޭނެއެވެ. އެކަމަކު، މާލެ ފިޔަވައި، ރަށްވެފައިވާ ރަށް ނޫން އެހެން ރަށެއްގައި ދިރިއުޅޭ ހުރިހާ މީހުން އަލުން ރަޖިސްޓަރީ ކުރަން ޖެހެއެވެ.
އެމްޑީޕީން ވަނީ ރީ-ރަޖިސްޓްރީ ކުރަން ބޭނުންވާ މީހުންނަށް އެހީތެރިވެ ދިނުމަށް ނިންމައިފައެވެ. އެގޮތުން މާލޭގައި ހުންނަ ދަނޑިކޮށި ޖަގަހަ އާއި ސޯސަން ޖަގަހަ އާއި ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގެ ޖަގަހައިން ރީ ރަޖިސްޓްރޭޝަނަށް އެހީތެރިވެދޭނެ ކަމަށް އެ ޕާޓީން ވަނީ ބުނެފައެވެ.
އެހެން ބައެއް ޕާޓީތަކުން ވެސް އެކަމުގައި ދަނީ އެހީތެރިކަން ފޯރުކޮށްދެމުންނެވެ.
