ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ރިޔާސީ އިންތިހާބުގައި ވާދަނުކުރެއްވޭ ހާލަތުގައި ރިޔާސީ އިންތިހާބުގައި އޭނާ ވާދަކުރައްވައި ކާމިޔާބުކޮށް ގާނޫނީ ހަމަތަކުގެ މަތިން ޖަލުން މިނިވަންކުރުމުގެ މަސައްކަތް ފުރަތަމަ ދުވަހު ވެސް ފައްޓަވާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އަންނަ މަހުގެ 9 ގައި އޮންނަ ރިޔާސީ އިންތިހާބުގައި ޔާމީނަށް ވާދަނުކުރެއްވޭނެ ހާލަތެއް މެދުވެރިވެދާނެ ކަމަށް ބަލައި އިދިކޮޅު ޕީޕީއެމާ އެކުގައި ކޯލިޝަން ހަދާފައިވާ ޕީއެންސީން ވަނީ ކެންޑިޑޭޓަކަށް މުއިއްޒު އިންތިހާބުކޮށްފައެވެ. ސެނެޓްގައި ތިއްބަވާ 48 މެމްބަރުންގެ ތެރެއިން މުއިއްޒަށް 25 ވޯޓު ލިބިވަޑައިގެންނެވި އިރު، އޭނާއާ ވާދަކުރެއްވި ޕީއެންސީގެ ޕާލަމެންޓްރީ ގްރޫޕްގެ ލީޑަރު އާދަމް ޝަރީފް ވަނީ 23 ވޯޓު ހޯއްދަވައިފައެވެ. މި ދެ ބޭފުޅުން ދެމެދު އޮތީ ދެ ވޯޓުގެ ފަރަގެކެވެ.
ޕީއެންސީގެ ޓިކެޓު ކާމިޔާބު ކުރެއްވުމަށް ފަހު ނޫސްވެރިންނާ ވާހަކަ ދައްކަވަމުން މާލޭގެ މޭޔަރު ކަން ވެސް ކުރައްވާ މުއިއްޒު ވިދާޅުވީ ޕީއެންސީން ބޭއްވި އިންތިހާބަކީ ޔާމީނަށް މި ސަރުކާރުން ފުރުސަތު ނުދީފި ނަމަ، ހާލަތެއް ނައިސްފި ނަމަ، ދެން އޮންނާނެ އޮޕްޝަނެއް ވަގުތީ ގޮތުން ތައްޔާރުކޮށްފައި ބޭއްވުމުގެ ގޮތުން ބޭއްވި އިންތިހާބެއް ކަމަށެވެ.
މުއިއްޒު ވިދާޅުވި ގޮތުގައި އޭނާ އަދި ދެ ޕާޓީގެ ވެސް ދުއާއަކީ ޔާމީން މިނިވަންވެވަޑައިގަތުމެވެ. އަދި އަންނަ ހޯމަ ދުވަހުގެ ކުރިން އެމަނިކުފާނު މިނިވަންވެވަޑައިގަންނަވާނެ ކަމަށް އުންމީދު ކުރައްވާ ކަމަށް ވިދާޅުވިއެވެ.
"ޖުޑިޝަރީއަށް ގޮވާލާ ގޮވާލުމަކީ ރައީސް ޔާމީނަށް ހައްގު އިންސާފު ގާއިމުކޮށް ދެއްވާ އެމަނިކުފާނު މިނިވަންކޮށް ދެއްވުން. އެމަނިކުފާނަށް އަރުވާފައިވާ ރިޔާސީ ޓިކެޓުގައި ވާދަކުރުމުގެ ފުރުސަތު ލިބިގެން ދިއުން," ޔާމީންގެ ސަރުކާރުގައި ހައުސިން މިނިސްޓަރު ކަން ވެސް ކުރެއްވި މުއިއްޒު ވިދާޅުވިއެވެ.
މުއިއްޒު ވިދާޅުވީ އެ ހާލަތު ނައިސްފި ނަމަ، އޭނާގެ އަމާޒަކީ ރިޔާސީ އިންތިހާބުގައި ވާދަކޮށް އެ އިންތިހާބު ކާމިޔާބު ކުރެއްވުން ކަމަށެވެ. އަދި އިންތިހާބު ކާމިޔާބުކޮށް އެންމެ ފުރަތަމަ ވެސް ކުރައްވާނެ ކަމަކީ ރައީސް ޔާމީން މިނިވަން ކުރުމުގެ މަސައްކަތް ފެއްޓެވުން ކަމަށް ވިދާޅުވިއެވެ.
"އަޅުގަނޑު އުންމީދު ކުރަނީ އަޅުގަނޑުމެން މިކަމައިގެން ކުރިއަށް ދާން ނުޖެހި، އެމަނިކުފާނު އަޅުގަނޑުމެންގެ ފަރާތުން މުޅި ގައުމު، ދިވެހި ރައްޔިތުންގެ ދިވެހީންގެ ކެންޑިޑޭޓުގެ ގޮތުގައި ދިވެހީންގެ ރާއްޖެ ހޯދައި ދިނުމަށް އެމަނިކުފާނު ކުރިއަށް ވަޑައިގަންނަވާނެ ގޮތެއް ވެގެން ދިއުން." މުއިއްޒު ވިދާޅުވިއެވެ.
މުއިއްޒު ވިދާޅުވީ ޔާމީނަށް ފުރުސަތު ނުލިބޭ ނަމަ، ފޯމްލުމަށް ވާން ޖެހޭ ހުރިހާ ތައްޔާރީތައް ވަމުންދާ ކަމަށާއި ފޯމް ހުށަހެޅުމާއި ރަނިންމޭޓް ކަނޑައެޅުން ކުރިއަށް އޮތް ދުވަސްތަކުގައި ކުރިއަށްދާނެ ކަމަށެވެ.
