ޖަޕާންގެ ޚާރިޖީ ވަޒީރު ހަޔާޝީ ޔޮޝިމަސަ އަންނަ ހޮނިހިރު ދުވަހު ރާއްޖެ ވަޑައިގަންނަވާ ގޮތަށް ހަމަޖެހިއްޖެއެވެ.
ފޮރިން މިނިސްޓްރީން ނެރުނު ބަޔާނެއްގައި ވިދާޅުވެފައިވަނީ ހަޔާޝީ ރާއްޖެ ވަޑައިގަންނަވަނީ ރާއްޖޭގެ ފޮރިން މިނިސްޓަރ ޝާހިދުގެ ދައުވަތަކަށް ކަމުގައެވެ. މި ދަތުރުފުޅަކީ ދެ ދުވަހުގެ ދަތުރުފުޅެކެވެ.
ފޮރިން މިނިސްޓްރީގެ ބަޔާނުގައި ވިދާޅުވެފައިވަނީ ހަޔާޝީގެ މި ދަތުރުފުޅުގައި ރާއްޖޭގެ ފޮރިން މިނިސްޓަރުގެ އިތުރުން ޑިފެންސް މިނިސްޓަރު މާރިޔާ ދީދީއާއެކުވެސް އެމަނިކުފާނު ރަސްމީ ވާހަކަތައް ބާއްވަވާނެއެވެ.
އަދި ހިއުމަން ރިސޯސް ޑިވެލޮޕްމަންޓް ސްކޮލަޝިޕް (ޖޭޑީއެސް) އާ ގުޅޭ އެއްބަސްވުމެއްގައިވެސް ދެގައުމުން ސޮއިކުރުމަށްވެސް ވަނީ ހަމަޖެހިފައެވެ.
ރާއްޖޭގެ ފޮރިން މިނިސްޓަރ ޝާހިދު މިދަައުރުގައި ޖަޕާނަށް 4 ފަހަރަށް ވަޑައިގެންފައިވާއިރު، ޖަޕާނުގެ ފޮރިން މިނިސްޓަރަކު އެންމެ ފަހުން ރާއްޖެ ވަޑައިގެންފައިވަނީ 2018 ވަނަ އަހަރު، ޖަޕާނުގެ އޭރުގެ ފޮރިން މިނިސްޓަރު ޓަރޯ ކޯނޯ އެވެ.
