މަތިކޮމަންޑޫ ހިއްކުމުގެ މަޝްރޫޢު މިފެށޭ މަސް އޮގަސްޓް މަހުގެ ތެރޭގައި ނިންމާލައި، ދެ ކޮމަންޑޫ ގުޅާލުމުގެ މަސައްކަތް އަންނަ މަހު ފަށާނެކަމަށް އެމްޓީސީސީން ބުނެފިއެވެ.
އެ ރަށުގައި ހުންނަވާ ހުކުރު ދުވަހު އާޒިމް ވިދާާޅުވީ މަތި ކޮމަންޑޫ ނުހިއްކޭނެކަމަށް ވަރަށް ގިނަ ފަރާތްތަކުން ބުނި ކަމަށެވެ. ނަމަވެސް އޭނާ ދެއްވާ ޔަގީންކަމަކީ އޯގަސްޓު މަސް ނިމޭއިރު މަތިކޮމަންޑޫ ހިކިފައި އޮންނާނެކަމުގެ ޔަގީންކަން ކަމަށް ވިދާޅުވިއެވެ. ހިއްކާ ސަރަޙައްދުގައި މިހާރު ވަނީ ބަންޑްވޯލް ޖަހާފައެވެ. އަދި މިމަހުގެ ފަހުކޮޅު ހިއްކަން ފެށުމަށް އެމް.ޓީ.ސީ.ސީގެ ޖައްރާފާ ކޮމަންޑޫއަށް ބަނދަރު ކުރާނެކަމަށް އެކުންފުނިން ބުނެއެވެ.
ވަރަށް ގިނަ ފަރާތްތަކުން ބުނަމުންދިޔަ މަތި ކޮމަންޑޫ ނުހިއްކާނޭ. އަޅުގަނޑު ދޭ ޔަގީންކަމަކީ މަތިކޮމަންޑޫ އޯގަސްޓު މަސް ނިމޭއިރު އޮންނާނީ ހިކިފައޭ.
– އާޒިމް ވިދާޅުވިއެވެ.
މަތި ކޮމަންޑޫ ހިއްކާ، ކޮމަންޑޫއާއި ގުޅާލުމުގެ މަސައްކަތަކީ، ކޮމަންޑޫއަށް ދިމާވެފައިވާ ބިމުގެ ޖާގައިގެ ދަތިކަން ޙައްލުކޮށްދެއްވުމަށް ސަރުކާރުން ކުރިއަށްގެންދަވާ މަޝްރޫޢެކެވެ. މި މަޝްރޫޢުގެ ދަށުން މަތި ކޮމަންޑޫގައި 16.7 ހެކްޓަރުގެ ބިން ހިއްކުމަށްވަނީ ހަމަޖެހިފައެވެ. ކޮމަންޑޫ ހިއްކުމުގެ މަޝްރޫޢުގެ އީއައިއޭގެ ފަހު މަރުޙަލާގެ މަސައްކަތް މިފެށޭ ހަފްތާގައި ނިމޭނެކަމަށް އެމް.ޓީ.ސީ.ސީން ބުނެއެވެ.
މަތި ކޮމަންޑޫ ހިއްކުމުގެ މަސައްކަތް ކުރިއަށްދާއިރު، ދެކޮމަންޑޫ ގުޅާލުމަށް ހަދާ ބްރިޖްގެ މަސައްކަތްވެސް އޯގަސްޓް މަހު ފެށުމަށް އެމް.ޓީ.ސީ.ސީން ދަނީ ތައްޔާރުވަމުންނެވެ. ދެކޮމަންޑޫ ގުޅާލުމަށް 200 މީޓަރުގެ ބްރިޖެއް ތަރައްޤީކުރުމަށްވަނީ ނިންމާފައެވެ. އަދި މަސައްކަތް 6 މަސްތެރޭގައި ނިންމުމަށް އެމް.ޓީ.ސީ.ސީން ވަނީ ކަނޑައަޅާފައެވެ.
މި މަސައްކަތުގެ އީއައިއޭއަށްވެސް ވަގުތު ހޭދަވާކަން އެމްޓީސީސީން ފާހަގަކުރެއެވެ. އެގޮތުން ތިން ހަތަރު މަސް އެކަމަށް ހޭދަވާކަމަށް އެމްޓީސީސީން ބުނެއެވެ. މަތިކޮމަންޑޫ ހިއްކާ ދެރަށް ގުޅާލުމުގެ މަޝްރޫޢަކީ 240 މިލިއަނަށްވުރެ ގިނަ ރުފިޔާ ޚަރަދުކޮށްގެން ސަރުކާރުން ކުރިއަށްގެންދަވާ މަޝްރޫޢުއެކެވެ.
