ރައްޔިތުންގެ މަޖިލީހުގެ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕުން އެދުުނު ގޮތަށް، ދައުރުން ބޭރު ޖަލްސާއެއް މާދަމާ ބާއްވަން ތާވަލުކޮށްފިއެވެ.
މާދަމާ ހެނދުނު 9 ޖަހާއިރު ބާއްވާ އެެ ޖަލްސާއަށް އެޖެންޑާ ކޮށްފައި އޮތް ހަމަ އެކަނި ކަމަކީ މަޖިލީހުގެ ދާއިމީ ކޮމިޓީތަކުގައި ސިޔާސީ ޕާޓީތަކުގެ މެމްބަރުންނާއި ޕާޓީއަކަށް ނިސްބަތްވެވަޑައިނުގަންނަވާ މެމްބަރުން ތަމްސީލުކުރައްވާނެ ގޮތް ނިންމުމުގެ މައްސަލައެވެ.
ދައުރުން ބޭރުން ޖަލްސާއެއް ބާއްވަން އެމްޑީޕީން އެދިފައިވަނީ ދައުރު ނިމިގެން މަޖިލިސް ޗުއްޓީއަށް ދިޔައިރު މަޖިލީހަށް ހުށަހެޅިފައިވާ މައްސަލަތައް ނުނިމި ހުރުމާއިގުޅިގެންނެވެ. މިދިޔަ މަހުގެ 22ގައި ބޭއްވި މަޖިލީހުގެ ޖަލްސާގައި އެމްޑީޕީން ވަނީ ދައުރުން ބޭރު ޖަލްސާއެއް ބޭއްވުމަށް އެދިފައެވެ. ދައުރުން ބޭރުން ޖަލްސާއެއް ބާއްވަން ހުށަހަޅާތާ ދެ ހަފުތާގެ ތެރޭގައި ޖަލްސާ ބާއްވަން މަޖިލީހުގެ ގަވާއިދުން ލާޒިމްކުރެއެވެ. އެގޮތުން އެމްޑީޕީން ހުށަހެޅި ހުށަހެޅުމަށް އަންނަ ބުރާސްފައްޗަށް 14 ދުވަސް ހަމަވާނެއެވެ.
މިއަހަރުގެ ދެވަަނަ ދައުރު ނިންމައި މަޖިލިސް ޗުއްޓީއަށް ދިޔައީ ކޮމިޓީތަކުގެ އެކުލެވުމާ މެދު ގޮތެއް ނުނިމި އޮތުމުން، އެކަމާ ގުޅުވައި އެހެން ބައެއް މައްސަލަތައް ކުރިއަށް ނުގެންގޮސް އޮއްވައެވެ. ކޮމިޓީތަކުގެ މައްސަލައާ ގުޅުވައި ކުރިއަށް ނުގެންގޮސް އޮތް އެއް މައްސަލައަކީ މަޖިލީހުގެ ނައިބުރައީސްކަމުން އީވާ ވަކިކުރަން އެމްޑީޕީން ހުށަހަޅާފައި އޮތް މައްސަލައެވެ. މަޖިލީހުގެ ރައީސް މުހައްމަދު ނަޝީދު ވަކިކުރަން ވެސް އެމްޑީޕީން ވަނީ ހުށަހަޅައިފައެވެ.
މަޖިލީހުގެ ގަވައިދުގައިވާ ގޮތުން ދައުރުން ބޭރު ޖަލްސާއެއް ބާއްވަން، މަޖިލީހުގެ ތިންބައިކުޅަ އެެއްބައި މެމްބަރުން އެދިވަޑައިގެންފި ނަމަ 14 ދުވަހެ ތެރޭގައި އެ ޖަލްސާ ބާއްވަން ޖެހެއެވެ. އެމްޑީޕީން އެފަދަ ޖަލްސާއަކަށް އެދުނުތާ އަދި މިވީ 10 ދުވަހެވެ.
