އިދިކޮޅު ޕްރޮގްރެސިވް ކޯލިޝަނުން ކިތަންމެ ވަރަކަށް ތަންތަނަށް އެއްވެ، މުޒާހަރާކޮށް ހެދިޔަސް 11 އަހަރަށް ޖަލަށް ހުކުމްކޮށްފައިވާ އެކޯލިޝަންގެ ލީޑަރު ރައީސް ޔާމީން މިނިވަން ނުވާނެކަމަށް އަދާލަތު ޕާޓީގެ ޢިލްމުވެރިންގެ މަޖިލީހުގެ ނައިބް ރައީސް ޑރ.އިޔާޒު ވިދާޅުވެއްޖެއެވެ.

ވ. އާރަށުގެ މައްސަލައިގައި ރައީސް ޔާމީންގެ މައްޗަށް ވަނީ ރިިޝްވަތު ގަބޫލުކުރުމާއި މަނީ ލޯންޑަރިންގ ދައުވާ ސާބިތުވެ، 11 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރުމަށް ހުކުމްކުރީ މިދިޔަ އަހަރުގެ ޑިސެމްބަރުމަހުގެ 25 ވަނަ ދުވަހުއެވެ.

އިދިކޮޅު ކޯލިޝަންގެ ލީޑަރޝިޕާއި ބައެއް ސަޕޯޓަރުން ގެންދަނީ ރައީސް ޔާމީން މިނިވަން ކުރުމަށް ގޮވާލާ ސިލްސިލާ ގޮތެއްގައި މުޒާހަރާ ކުރަމުންނެވެ. އަދި ބައެއް މުވައްސަސާތަކަށް ގޮސް ޝަރީއަތް ކުރިއަށްދާގޮތުގެ ކަންބޮޑުވުން ފާޅު ކުރަމުންނެވެ. އެގޮތުން އިއްޔެ ވަނީ އެޗްއާރުސީއެމްއަށް ގޮސްފައެވެ. ނަމަވެސް އެޗްއާރުސީއެމްގެ ވެރިން އިިދިކޮޅު ކޯލިޝަނާއި ބައްދަލުކޮށްފައި ނުވެއެވެ.

އެޗްއާރުސީއެމް ކައިރިއަށް އެއްވި އިދިކޮޅު ސަޕޯޓަރުންގެ ތެރެއިން އަންހެނުންތަކެއް ވަނީ ޑރ.އިޔާޒު އެސަރަހައްދުން ދަނިކޮށް ދިމާކޮށް އަޑު އުފުލާފައެވެ. މިކަމާއި ގުޅިގެން ވަރަށް ބޮޑަށް ނުރުހުން ފާޅުކޮށް ޑރ.އިޔާޒު ވިދާޅުވީ ޕްރޮގްރެސިވް ކޯލިޝަނަކީ ޓެރަރިޒަމް އަށް ހިތްވަރުދޭ ޖަމާޢަތެއް ކަމަށެވެ. އަދި އެކޯލިޝަނުން ކިތަންމެ މަސައްކަތެއްކޮށް، އެއްވެ އުޅުނަސް ރައީސް ޔާމީން މިނިވަން ނުވާނެކަމަށެވެ.

ކިތަންމެ މުޒާހަރާއެއް ކުރިޔަސް, ކިތަންމެ ވަރަކަށް މުއައްސަސާތަކުގެ ދޮށަށް އެއްވިޔަސް, ކިތަންމެ ވަރަކަށް މަގުމަތިން މީހުންނާ ފޮށުނަސް, ޖަލުގައި އޮތް މީހާ މިނިވަނެއް ނުވާނެ. އޭނާ މިނިވަންވާނެ ހަމައެކަނި ގޮތަކީ މަތީ ކޯޓަކުން ދަށުކޯޓުގެ ޙުކުމް ބާޠިލްކުރުން.

– ޑރ. އިޔާޒު ވިދާޅުވިއެވެ.

އިޔާޒު ވިދާޅުވީ އިއްޔެ ހިނގައިދިޔަ ކަންކަމުން ސާފުވަނީ އިދިކޮޅު ޕީޕީއެމްގެގެ އެންމެ މަތިން ތިރިޔަށްވެސް އަދަބެއް އަޚްލާޤެއް ނެތުންކަމަށެވެ. ޝަރީޢަތުގެ މަޖްލިސްގައި ބްރޭކް ލިބޭ ގަޑީގައި ވަކީލުންނާއި ދިމާކުރުމާއި، ޝަރީޢަތުގެ މަޖްލިސްތެރޭ ހެކިބަސްދޭން ހުންނަ މިހާ އަށް ބިރުދެއްކުން ފަދަ ނާތަހުޛީބު ޢަމަލުތައް މަތިންވެސް ފެންނަމުންދާކަމަށް އިޔާޒު ވިދާޅުވިއެވެ.