ރައްޔިތުންގެ މަޖިލީހުގެ ކޮމިޓީތައް ހުއްޓިފައި އޮންނަތާ ތިން ހަފުތާ ފަހު، ކޮމިޓީތައް އަލުން އެކުލަވައިލުމުގެ މަސައްކަތް މާދަމާގެ ޖަލްސާ އަށް އެޖެންޑާ ކޮށްފިއެވެ.
މަޖިލީހުގެ އެޖެންޑާ ކަނޑައެޅުމަކީ މަޖިލީހުގެ ރައީސްގެ ޒިންމާއެކެވެ. މަޖިލީހުގެ މަސައްކަތްތައް ކުރިޔަށް ނުދާތީ އަމީން އާންމު ފާތިމަތު ނިއުޝާ މިއަދު ވަނީ ޖަލްސާތައް ކުރިޔަށް ގެންދެވޭނެ ގޮތްތަކާއި ގާނޫނީ މައްސަލަތައް ހައްލު ކުރެވޭނެ ހުށަހެޅުންތައް އެމަނިކުފާނަށް ހުށަހަޅާފައެވެ.
ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކުގެ މެންބަރުންނާއި ވަކި ޕާޓީއަކަށް ނިސަބަތް ނުވާ މެންބަރުން ތަމްސީލް ކުރެވޭ ގޮތަށް ގެނެވޭ ބަދަލާ ގުޅޭ މައްސަލަ ވަނީ މާދަމާ އޮންނަ މަޖިލީހުގެ ޖަލްސާގެ ފުރަތަމަ މަސައްކަތެއްގެ ގޮތުން މިހާރު އެޖެންޑާކޮށްފައެވެ.
މަޖިލީހުގެ ދާއިމީ ކޮމިޓީތަކުގައި ޕާޓީތަކާއި އަމިއްލަ މެމްބަރުން ތަމްސީލުކުރައްވާނެ ގޮތް އަލުން އެކުލަވާލެއްވުމަށް މަޖިލީހުގެ ރިޔާސަތުން ނިންމެވީ، އެމްޑީޕީގެ މެމްބަރުންތަކެއް އެ ޕާޓީން ވަކިވެ، މަޖިލިހުގެ ޕާޓީތަކުގެ ދަފްތަރަށް އައި ބަދަލާއި ގުޅިގެން މިމަހުގެ 23 ވަނަ ދުވަހުއެވެ. ނަމަވެސް މިކަމުގައި ގޮތެއް ނިންމުމުގައި ސިޔާސީ ޕާޓިތަކުގެ މެދުގައި އެއްބަސް ނުވެވޭތީ ކޮމިޓީތައް އޮތީ އެކުލަވައިނުލެވި، މަޖިލީހުގެ ހުރިހާ މަސައްކަތެއް އޮތީ ހުއްޓުމަކަށް އައިސްފައެވެ.
ކޮމިޓީތަކުގެ މަސައްކަތް ހުއްޓުމަކަށް އައިސްފައި އޮތުމުން، ކޮމިޓީތަކުން ނިންމަންޖެހޭ ބައެއް ކަންކަމާއި މުހިއްމު އެހެން ބައެއް މަސައްކަތްތައްވެސް ވަނީ ހުއްޓިފައެވެ. މިގޮތުން މަޖިލީހަށް ހުށަހެޅިފައިވާ އިތުބާރު ނެތްކަމުގެ މައްސަލަ ކުރިއަށްދާނެ ގޮތާއި ގުޅޭގޮތުން އާއްމު ކޮމިޓީން ގޮތްތަކެއް ކަނޑައަޅަންޖެހޭއިރު، އެ ކޮމިޓީ ނުބޭއްވޭތީ އެކަމުގައި ގޮތްތަކެއް ނުނިމި، އިތުބާރު ނެތްކަމުގެ މައްސަލަތައް އޮތީ މަޑުޖެހިފައެވެ.
މަޖިލީހުގެ ކޮމިޓީތައް ހުއްޓާލާފައި ބާއްވާތީ މަޖިލީހުގެ މެޖޯރިޓީ އޮންނަ އެމްޑީޕީން ވަނީ ކަންބޮޑުވުން ފާޅުކޮށްފައެވެ. އެމްޑީޕީގެ ޕާލިމެންޓްރީ ގްރޫޕުން ބުނާގޮތުން ކޮމިޓީތައް ހުއްޓާލަފައި އޮތީ ޤަވާއިދާއި ހިލާފަށެވެ. އަދި މަޖިލީހުގެ މެމްބަރުން ޕާޓީ ބަދަލު ކުރެއްވިނަމަވެސް ކޮމިޓީތަކުގެ މަސައްކަތް މީގެކުރިން ހުއްޓާލާފައި ނުވާކަން އެމްޑީޕީގެ ޕާލިމެންޓްރީ ގްރޫޕުން ފާހަގަކުރެއެވެ. މި މައްސަލަތައް ހައްލުކުރެއްވުމަށް އެމްޑީޕީގެ ޕީޖީން ވަނީ ކޮމިޓީތައް އެކުލަވާލެއްވުމުގެ މައްސަލަ މަޖިލީހުގެ ތަޅުމަށް ގެންނެވުމަށް މަޖިލީހުގެ އިދާރާގައި ރަސްމީކޮށް އެދިފައެވެ.
މާދަމާގެ ޖަލްސާއަށް ކޮމިޓީތައް އަލުން އެލުލަވާލުމާއި ގުޅޭ މައްސަލަ އެޖެންޑާކޮށްފައި އޮތަސް، މަޖިލީހުގެ ނައިބު ރައީސްގެ އިތުބާރު ނެތްކަމުގެ މައްސަލަ އެޖެންޑާކޮށްފައެއް ނުވެއެވެ. މެމްބަރުންނަށް އެ މައްސަލައިގައި ނޯޓިސް ފޮނުވާފައިވާއިރު، ޤަވާއިދުގައި ބުނާގޮތުން މިމަހުގެ 11 ވަނަ ދުވަހުގެ ޖަލްސާއަށް އެ މައްސަލަ އެޖެންޑާކުރަންޖެހެއެވެ.
