ރައްޔިތުންގެ މަޖިލީހުގެ މާދަމާގެ ޖަލްސާ އޮންނަ ކަމަށް އަންގައި އެޖެންޑާ ރައްޔިތުންގެ މަޖިލީހުން އާންމުކޮށްފިއެވެ.
މާދަމާގެ ޖަލްސާ ހެދުނު 9:00 ގައި ފަށަން އެޖެންޑާ ކޮށްފައިވާއިރު، އެޖެންޑާގައި އޮތް ގޮތުން ފުރަތަމަ މަސައްކަތަކީ ތިނަދޫ އުތުރު ދާއިރާގެ މެންބަރު ޢަބްދުލްމުޣުނ،ީ މިނިސްޓަރ އޮފްޓަރ އޮފް ޓްރާސްޕޯޓް އެންޑް ސިވިލްއޭވިއޭޝަން އައިޝަތު ނަހުލާއާއި ސުވާލު ކުރުމެވެ.
ދެން ހުރީ މަޖިލީހުގައި ނުނިމި ހުރި މަސައްކަތްތައް އެޖެންޑާކޮށްފައެވެ. މާދަމާގެ ޖަލްސާގައި މަޖިލީހަށް ހުށަހަޅާފައިވާ އިތުބާރު ނެތްކަމުގެ މައްސަލައެއް އެޖެންޑާކޮށްފައި ނުވެއެވެ. އަދި މާދަމާޖެ ޖަލްސާ ބާއްވާއިރު ރައްޔިތުންގެ މަޖިލީހުގެ ރިޔާސަތު ބެލެހެއްޓެވުމަށް އުޒުރުވެރިވެ ވަޑައިގަންނަވާ ކަމަށް މަޖިލީހުގެ ރައީސް ރައީސް މުހައްމަދު ނަޝީދު މަޖިލީހުގެ އަމީން އާންމަށް ވަނީ އަންގަވާފައެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޤާމުން ވަކި ކުރެއްވުމަށް 54 މެމްބަރުންގެ ސޮޔާއެކު މަޖިލީހަށް ހުށަހަޅުއްވާފައިވަނީ މިމަހުގެ 7 ވަނަ ދުވަހުއެވެ.
މަޖިލީހުގެ ރައީސްގެ އިތުރުން ނައިބު ރައީސް އީވާގެ އިތުބާރު ނެތްކަމުގެ މައްސަލައެއްވެސް މަޖިލީހުގެ އިދާރާއަށްވަނީ ހުށަހަޅުއްވާފައެވެ. މަޖިލީހުގެ ނައިބް ރައީސް އީވާގެ އިތުބާރު ނެތް ކަމަށް މަޖިލީހަށް ހުށަހަޅުއްވާފައިވާ މައްސަލައިގެ 14 ދުވަހުގެ ނޯޓިސް މިއަދަށްވަނީ ހަމަވެފައެވެ. ނަމަވެސް މިއަދު މަޖިލީހުގެ ޖަލްސާއެއް ބާއްވާފައި ނުވެއެވެ. އެހެންކަމުން މާދަމާ މަޖިލީހުގެ ޖަލްސާއެއް ބާއްވަން ޖެހޭއިރު މިޖަލްސާގެ ރިޔާސަތު ބަލަހައްޓަވަން ޖެހިވަޑައިގަންނަވާނީ މަޖިލީހުގެ ރައީސަށެވެ.
ކަން މިހެން އޮތް އިރު މަޖިލީހުގެ އަމީން އާންމަށް އެޑްރެސް ކުރައްވައި މަޖިލީހުގެ ރައީސް މުހައްމަދު ނަޝީދު ފޮނުއްވި ސިޓީފުޅުގައިވަނީ އެމަނިކުފާނު ނިސްބަތްވެވަޑައިގަންނަވާ ޕާޓީ، މޯލްޑިވިއަން ޑިމޮކްރަޓިކް ޕާޓީގެ ގިނަ މެމްބަރުންތަކެއް ސޮއިކުރައްވާ އެމަނިކުފާނުގެ މައްޗަށް އިތުބާރު ނެތްކަމުގެ މައްސަލައެއް ހުށަހަޅުއްވާފައިވާތީ އެމައްސަލައަށް ވަކިގޮތެއް ނިމުމާ ހަމައަށް މަޖިލީހުގެ ޖަލްސާތަކުގެ ރިޔާސަތު ބެލެހެއްޓެވުމަށް އުޒުރުވެރިވެ ވަޑައިގަންނަވާ ކަމަށެވެ.
ގާނޫނު އަސާސީގެ 82 ވަނަ މާއްދާގެ ށ. ގައި ބުނަނީ "ރައްޔިތުންގެ މަޖިލީހުގެ ޖަލްސާތަކުގެ ރިޔާސަތު ބަލަހައްޓާނީ އެ މަޖިލީހުގެ ރައީސް" ކަމަށާއި "މަޖިލީހުގެ ރައީސް ހާޒިރު ނުވާ ނަމަ ރިޔާސަތު ބަލަހައްޓާނީ ނައިބު ރައީސް" ކަމަށާއި "ރައީސް އާއި ނައިބު ރައީސް ހާޒިރު ނުވާނަމަ މަޖިލީހުގެ ގަވާއިދުގައިވާ ގޮތުގެމަތިން އެ ޖަލްސާގެ ރިޔާސަތު ބަލަހައްޓާނޭ މީހަކު ކަނޑައަޅާނީ" ކަމަށެވެ.
