މި އަހަރުގެ ރިޔާސީ އިންތިހާބުގައި ޖުމްހޫރީ ޕާޓީ (ޖޭޕީ)ގެ ފަރާތުން ވާދަކުރައްވާ ރިޔާސީ ކެނޑިޑޭޓު ޤާސިމް އިބްރާހީމާއި ކޯލިޝަން ހެދުމަށް ކުރީގެ ނައިބު ރައީސް އަހްމަދު އަދީބުގެ މޯލްޑިވްސް ތާޑް-ވޭ ޑިމޮކްރެޓްސް (އެމްޓީޑީ) އާއިއެކު މަޝްވަރާ ބައްދަލުވުމެއް ބާއްވައިފިއެވެ.

ޖުމްހޫރީ ޕާޓީގެ މައި ހަރުގެ ކުނޫޒުގައި ބޭއްވި މިބައްދަލުވުމުގައި ދެޕާޓީގެ ފަރާތުން ކުރިއަށް ދިޔަ މަޝްވަރާތަކާއި ގުޅޭގޮތުން ވަނީ ނޫސްވެރިންނަށް މައުލޫމާތު ދީފައެވެ. އެމްޓީޑީގެ ފަރާތުން މިބައްދަލުވުމުގައި ބައިވެރިވި އެޕާޓީގެ ސީނިއަރ ކައުންސިލް މެންބަރު އަބްދުލް ރަޝީދު ނާފިޒް ވިދާޅުވީ މިބައްދަލުވުމުގައި އެމްޓީޑީގެ ހުށަހެޅުމަށް ހުށަހަޅާފައިވާނެކަމަށެވެ.

އެހުށަހެޅުމަކީ ޖުމްހޫރީ ޕާޓީގެ ވެރިކަމެއް ޤާއިމްކުރެވޭއިރު، ތަފާތުކުރުމެއްނެތި ހުރިހާ އެންމެންނަށް އިންސާފުވެރިކަމާއިއެކު އަމަލު ކުރުމަށް ހުށަހަޅާފައިވާނެކަމަށެވެ. އަދި މިއީ ފުރަތަމަ ބައްދަލުވުން ކަމަށްވުމުން މިބައްދަލުވުމުގައިި ހުރިހާ ކަމެއް ހުށަނޭޅުނު ނަމަވެސް ކުރިއަށް އޮތް ބައްދަލުވުންތަކުގައި ހުށަހެޅުންތައް ހުށަހެޅިގެން ދާނެކަމަށެވެ.

މިބައްދަލުވުމަށްފަހު ވާހަކަ ދައްކަވަމުން ޖުމްހޫރީ ޕާޓީގެ ޑެޕިއުޓީ ލީޑަރު އަދި ކުރީގެ ޓްރާންސްޕޯޓް މިނިސްޓަރު އަމީން އިބްރާހީމް ވިދާޅުވީ ފުރަތަމަ ބައްދަލުވުމުގައިވެސް އެމްޓީޑީގެ ފަރާތުން ލިބިގެންދިޔަ އުންމީދީ ވާހަތަކާއިއެކު ކޯލިޝަނެއްގެ ތެރެއިން މަސައްކަތް ކުރެވޭނެ އުންމީދު ބޮޑުކަމަށެވެ.
އަމީން އިބްރާހީމް އިތުރަށް ވިދާޅުވީ، ރިޔާސީ އިންތިޚާބުގައި ޤާސިމް ވާދަކުރައްވާނެތޯ ބައެއް މީހުން ޝައްކު އުފައްދަމުން ގެންދަނީ ޖުމްހޫރީ ޕާޓީއާ ގުޅެން ބޭނުންވާ މީހުން ފަހަތަށް ޖެއްސުމުގެ ބޭނުމުގައި ކަމަށެވެ. ޤާސިމް އިބްރާހީމަށް ތާއީދުކުރާ މީހުންގެ ވިސްނުން އެހެން ދިމާއަކަށް އަނބުރާލުމުގެ މަގުސަދަކަށް އެކަން ވެދާނެ ކަމަށެވެ.

ރިޔާސީ އިންތިޚާބުގައި ޖޭޕީގެ ޓިކެޓުގައި ވާދަކުރުމުގެ ފުރުސަތު ޤާސިމްއަށް ލިބިވަޑައިގަތީ، އެ ޕާޓީގެ ކައުންސިލްގެ ފުރިހަމަ އަގުލަބިއްޔަތުންނެވެ. ޕާޓީގެ ރިޔާސީ ކެންޑިޑޭޓަކީ ޤާސިމް ކަން އިއުލާނުކުރުމާއެކު، ސިޔާސީ ގޮތުން ހައިބަތުބޮޑު ގިނަ ފަރާތްތަކަކުން އަންނަނީ، ޤާސިމްއާއި ޖޭޕީއާ އެކުގައި މަސައްކަތްކުރުމަށް ނިންމައި، އެކަމުގެ މަޝްވަރާތައް ކުރަމުންނެވެ.

މިފަހަރުގެ ރިޔާސީ އިންތިޚާބަށް ޖުމްހޫރީ ޕާޓީ އިސްވެއޮވެ އުފައްދާ ކޯލިޝަނަކުން ވާދަކުރަން ނިންމާފައިވާއިރު، އިންތިޚާބުގެ ކެމްޕެއިން ޕްލޭންކުރުން ނުވަތަ ރޭވުން ހަވާލުކޮށްފައިވަނީ އެޕާޓީގެ ޑެޕިއުޓީ ލީޑަރު އަމީން އިބްރާހިމާއެވެ.