އުރީދޫ މޯލްޑިވްސްއިން ފާއިތުވެދިޔަ އަހަރުގެ ފައިދާއިން ހިއްސާއަކަށް 3.04 ރުފިޔާ ބެހުމަށް ކުންފުނީގެ ބޯޑުން ނިންމައިފިއެވެ.
ހިއްސާއަކަށް ފައިދާގެ ގޮތުގައި ދޭނެ މިންވަރަކީ ހިއްސާއަކަށް 3.04 ރުފިޔަގެ މަގުންކަމަށް ބޯޑުން ނިންމާފައިވަނީ މިމަހުގެ 16 ވަނަ ދުވަހާއި ހަމައަށް ހިއްސާދާރުންގެ ގޮތުގައި ތިބޭ ފަރާތްތަކަށެވެ.
އުރީދޫގެ ބޯޑުން ބޭއްވި ބައްދަލުވުމުގައިވަނީ ފާއިވެދިޔަ އަހަރުގެ އެކުންފުނީގޭ މާލީ ހިސާބުތައްވެސް ފާސް ކޮށްފައެވެ. އަދި މި ހިސާބުތައް މިމަހުގެ 7 ވަނަ ދުވަހުގެ ކުރިން ކުންފުނީގެ ވެބްސައިޓުގައި ޝާއިއުކުރުމަށްވެސް ބޯޑުން ނިންމާފައި ވެއެވެ.
އުރީދޫ މޯލްޑިވްސް މެޖޯރިޓީ ހިއްސާ އޮންނަނީ ވަތަނިއްޔާ އިންޓަރނޭޝަނަލްއަށެވެ. އެއީ 90.05 ހިއްސާއެވެ. ދެން އެކުންފުނީގެ އެންމެ ބޮޑު ހިއްސާ ދާރަކީ ޕެންޝަން އޮފީހެވެ. އެއީ 5.64 ހިއްސާއެވެ. އެހެނިހެން ފަރާތްތަކަށް އޮންނަނީ ކުންފުނީގެ 3.86 ހިއްސާއެވެ.
