މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި، ދެ ރަށެއްގައި ބަހައްޓާފަހުރި ވޯޓު ފޮށިތައް ފަޅާލި 3 މީހަކު ފުލުހުން ހައްޔަރު ކޮށްފިއެވެ.

މައުލޫމާތު ލިބިފައިވާ ގޮތުގައި ފުލުހުން ހައްޔަރު ކޮށްފައިވަނީ ރަތަފަންދޫގައި ބަހައްޓާފަހުރި ވޯޓު ފޮއްޓެ ފަޅާލި 2 މީހަކާއި އަދި ގދ. ތިނަދޫ އަބޫބަކުރު ސްކޫލުގައި ބަހައްޓާފަހުރި ވޯޓު ފޮށި ފަޅާލި ކަމުގައި ތުހުމަތު ކުރެވޭ އެކެކެވެ.

ނަޝީދަށް ތާއީދުކުރާ ފަރާތްތަކުން ތުހުމަތު ކޮށްފައިވަނީ ރަތަފަންދޫގައި ދައްކައިގެން ވޯޓު ލަމުން ދާކަމަށާއި، އަދި ބިންމައްޗަށް ފައިބާފަ ހުރި ގިނަ ވޯޓު ކަރުދާސްތަކެއް ވޯޓު ފޮއްޓަށް އަޅާފައިވާ ކަމުގެ ތުހުމަތުތަކެވެ.

ނަޝީދަށް ތާއީދުކުރާ، ރައްޔިތުންގެ މަޖިލީހުގެ ނާއިބު ރައީސް އީވާވަނީ ވޯޓުލާ މަރުކަޒުގައި ހުރި ނަޝީދުގެ ކެމްޕޭންގެ އޮބްޒާވަރަކު ފުލުހުން ހައްޔަރު ކޮށްފައިވާކަމަށް ވިދާޅުވެ ޓުވީޓު ކޮށްފައެވެ. އޭނާ ވިދާޅުވީ މިވަރުން ދަންޏާ ނަޝީދު ހައްޔަރު ކޮށްފައި މެނުވީ ހުއްޓާލާނޭކަމަށް ނުބެލެވެއެވެ.

ގދ. ރަތަފަންދޫ ވޯޓުފޮށިކައިރީ ހުރި ރައީސް ނަޝީދު ގެ މަންދޫބުވެސް ހައްޔަރުކޮށްފި. މިދާ ވަރުން ދާނަމަ ރައީސް @MohamedNasheed ހައްޔަރުކޮށްފަނޫނީ @ibusolih ހުއްޓައިލާނެހެން ހިއެއް ނުވޭ. @MDPSecretariat pic.twitter.com/XSm9QHiexH

— Eva Abdulla 🎈❓ (@evattey) January 28, 2023

ތިނަދޫ އަބޫބަކުރު ސްކޫލުގައި ބަހައްޓާފައި ހުރި ވޯޓު ފޮށީގެ މައްސަ ޖެހުނު ސަބަބެއް ކަމުގައި އެރަށު މީހަކު ކިޔައިދީފައިވަނީ، ރައީސް ސާލިހަށް ތާއީދުކުރާ ފަރާތްތަކުން ފޯނު ހިފައިގެން ވޯޓުލާން ވަންނަމުން ދިއުމާއި ގުޅިގެން ނަޝީދަށް ތާއީދުކުރާ ފަރާތްތަކުންވެސް ފޯނު ހިފައިގެން ވޯޓުލާން ވަންނަން މަސައްކަތް ކުރުމުންނެވެ.

އެހެންނަމަވެސް، ނަޝީދުގެ ސަޕޯޓަރުންނަށް އެފުރުސަތު ނުލިބި، ދެފަރާތުގެ ޒުވާބު ގަދަވެ، އެންމެ ފަހުން އެތަނުގައި ބަހައްޓާފައި ހުރި ވޯޓުފޮށި ފަޅާލީކަމަށް އެރަށުން މައުލޫމާތު ދިން ފަރާތުން ބުނެފައި ވެއެވެ. ފަހުން އެ ސަރަހައްދުގެ ހަމަޔަކަށް އެޅުވުނީ ފުލުހުންގެ އެހީތެރިކަމާއެކު ކަމަށް މައުލޫމާތު ލިބިފައި ވެއެވެ.

ތިނަދޫއާއި ރަތަފަންދޫގައި ވޯޓު ފޮށިތައް ފަޅާލާފައިވާއިރު، ގދ. ގައްދޫގައި، ވޯޓުލާ ސަރަހައްދަށް ބޮޑީ ކެމެރާ ވައްދައިގެން ވޯޓު ލާން ފެށުމުން، އެރަށުގައި ތިބި ނަޝީދުގެ ސަޕޯޓަރުންވަނީ ވޯޓު ކަރުދާސްތައް ވީދާލާއި، ވޯޓު ފޮށިތައް ފުނޑާލާފައެވެ.

ޚަބަރު އޮންލައިނަށް އެރަށުން މައުލޫމާތު ދިންގޮތުގައި ގައްދޫގައި ހަމަ ނުޖެހުން އުފެދުނީ ރައީސް ސާލިހަށް ތާއިދުކުރާ ފަރާތްތަކުން، ލާ ވޯޓުތައް ފޮޓޯ ނެގުމަށް ބޮޑީ ކެމެރާ ވައްދާ ވޯޓު ފޮއްޓަށް ލާ ވޯޓު ފޮޓޯ ނަގަން ފެށުމާއި ގުޅިގެންނެވެ.

އަދި މިމައްސައާއި ގުޅިގެން އުފެދުނު ހަމަނުޖެހުންތައް ހައްލު ނުވުމާއެކު ނަޝީދަށް ތާއީދުކުރާ ފަރާތްތަކުންވަނީ ވޯޓުލާ މަރުކަޒުތެރެއަށް ވަދެގަނެ، މޭޒުތައް ފުނޑާލާ އަދި ވޯޓު ކަރުދާސްތައްވެސް ވީދާ ހަދާލާފައެވެ.

މައުލުމާތު ލިބިފައިވާ ގޮތުގައި، އެރަށުގައި މިހާރުވަނީ އަލުން ވޯޓުލާން ފަށާފައެވެ.