މާޒީގައި ރާއްޖޭގައި އޮތް އަނިޔާވެރި ވެރިކަމުގެ ސަގާފަރާއި، ކޮރަޕްޝަންގެ ކަންކަން ނައްތާލަން ބޭނުން ކަމުގައިވާނަމަ އެމްޑީޕީގެ ރިޔާސީ ކެނޑިޑޭޓަކަށް އެންމެ ރަނގަޅީ މިހާރުގެ ރައީސް ޞާލިހުކަމަށް ޑީއާރުޕީގެ ކުރީގެ ލީޑަރު އަހުމަދު ތަސްމީން އަލީ ވިދާޅުވެއްޖެއެވެ.
ރައީސް ސޯލިހުގެ ރިޔާސީ ޕްރައިމަރީގެ ކެމްޕެއިނުން ބޭއްވި ހާއްސަ ޖަލްސާއެއްގައި ވާހަކަ ދައްކަވަމުން ތަސްމީނު ވިދާޅުވީ ކުރިއަށް އޮތް ޕްރައިމަރީގައި އެންމެ ބޮޑަށް ވިސްނަންވީ ކަމަކީ ރައީސް ޔާމީންގެ ވެރިކަމުގައި ފެނުނު ބޭއިންސާފައި ކޮރަޕްޝަނާއި އަދި އަނިޔާވެރިކަމުގެ ސިފަތައް ތަކުރާރުވެގެން ނުދިއުން ކަމަށެވެ.
އެގޮތުން އާންމު މެމްބަރުންނަށް ޖިސްމާނީ އެތައް އަނިޔާތަކެއް ލިބުނު އިރު، އެ މެމްބަރުން ބޭއިންސާފުން ޖަލުތަކުގައި ބަންދުކޮށް ދިރިއުޅުމަށް ބޮޑެތި ދަތިތަކާ ކުރިމަތި ކުރުވި ކަމަށް ތަސްމީން ވިދާޅުވިއެވެ. އަދި މެމްބަރުންނަށް ހުރި ފުރުސަތުތައް ގެއްލި، ނިކަމެތިކަން ލިބުނު ކަމީ އެންމެންނަށް އެނގޭ ހަގީގަތެއް ކަމަށާއި އެކަންކަން ހަނދާން ނުނެތޭނެ ކަމަށް ވެސް ތަސްމީން ވިދާޅުވިއެވެ.
އަޅުގަނޑުމެން ހަނދާނުގައި ހުންނާނެ އަޅުގަނޑުމެންގެ ތެރެއިން އެތައް ބަޔަކު، ހައްޔަރުކޮށް ޖަލުތަކުގައި ބަންދުކޮށް އެތައް އަނިޔާތަކަކާ ކުރިމަތިލާން ޖެހުނުކަން. އެއީ ހަދާނުން ފިލައިގެން ދާނެ ކަމެއް ނޫން. އަދި ދައުލަތުން ހުރިހާ އެންމެންނަށް ފޯރުކޮށްދޭން ޖެހޭ އެކިއެކި ހިދުމަތްތަކާ ހައްގުތަކުން އަޅުގަނޑުމެންގެ މެންބަރުން މަހްރޫމްކޮށް މެންބަރުންނާއި އާއިލާތަކަށް ބޮޑެތި ގޮންޖެހުންތަކާއި ކުރިމަތިލާން ޖެހުނުކަން އެއީ އަޅުގަނޑުމެން އެންމެނަށްވެސް އެނގޭކަމެއް. ތަސްމީން ވިދާޅުވިއެވެ.
ޔާމީންގެ ވެރިކަމުގައި ހުރި ސިފަތައް ކަމަށްވާ ބޭއިންސާފުގެ ސިފަތަކާއި ކޮރަޕްޝަނާއި އަނިޔާވެރިކަމުގެ ސިފަތައް އަލުން އިއާދަވިޔަ ނުދިނުމަށް އެމްޑީޕީގެ ޕްރައިމަރީގައި ވޯޓު ދޭންވީ ރައީސް ސޯލިހަށް ކަމަށް ވެސް ތަސްމީން ވިދާޅުވިއެވެ.
ތަސްމީނު ވިދާޅުވީ ޔާމީނުގެ ދައުރުގައި ބޭއްވި ސުލްހަވެރި އެއްވުންތަކުގެ ތެރެއިން އާންމު މެންބަރުންނަށް އެތައް ޖިސްމާނީ އަނިޔާތަކެއް ދިން ކަމަށާއި އޭނާއަކީ އެމަންޒަރުތައް ކައިރިން ފެނުނު މީހެއް ކަމަށެވެ. ރައީސް ސޯލިހަކީ ރާއްޖޭގައި ހެޔޮ ވެރިކަމެއް ކުރައްވަން ބޭނުންފުޅުވާ ބޭފުޅެއް ކަން ވޭތުވެދިޔަ ހަތަރު އަހަރުގެ ތެރޭގައި ރައްޔިތުންނަށް ސާބިތުކޮށްދީފައިވާ ކަމަށް ތަސްމީން ވިދާޅުވިއެވެ. އަދި ކުރިއަށް އޮތް ރިޔާސީ ދައުރު އެމަނިކުފާނަށް ދެއްވައިފިނަމަ ރާއްޖެއިން އިތުރު ބަދަލު ފެނިގެންދާނެކަމަށް ތަސްމީން ވިދާޅުވިއެވެ.
ކޮމެންޓު ފޮނުވާ