ފުވައްމުލަކު ދޫނޑިގަން އަވަށު ރޭ ހިނިގި އަލިފާނުގެ ޙާދިސާއަކީ އެރަށު ބަނދަރު ކައިރީ ހުރި ޕެލެޓްތަކެއްގައި ރޯވެގެން ހިނގި އަލިފާނުގެ ޙާދިސާއެއްކަމަށާ، ފުވައްމުލަކު ފަޔަރ ސްޓޭޝަނުން އެއަލިފާން ނިއްވާލާފައިވާކަމަށް އެމްއެންޑީއެފުން ބުނެވިއެވެ.
މި ހާދިސާގެ ރިޕޯޓް އެމްއެންޑީއެފް ސަދަން އޭރިއާ ކޮމާންޑް، ޏ.ފުވައްމުލަކު ފަޔަރ ސްޓޭޝަނަށް ލިބުނީ ރޭ 23:25 ހާއިރުކަމަށް އެފަރާތުން ބުނެއެވެ. އަދި ހާދިސާގެ ރިޕޯޓް ލިބުމާއެކު ކުޑަވަގުތުކޮޅެއްގެ ތެރޭގައި ފުވައްމުލަކު ފަޔަރ ސްޓޭޝަނުންގެ ފަޔަރމަނުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފެށިކަމަށާ، ފަޔަރމަނުން ކުރި މަސައްކަތުން އެތަނުގައި ރޯވި އަލިފާން ނިއްވާލެވިފައި ވަނީ ރޭ 23:35 ހާއިރުކަމަށްވެސް އެމްއެންޑީއެފުން ބުނެއެވެ.
މި ހާދިސާގައި އެއްވެސް މީހަކަށް ހާނީއްކައެއް ވެފައި ނުވާކަމަށް އެމްއެންޑީއެފުން ބުނެއެވެ.
