ޕާކިސްތާންގެ ކުރީގެ ބޮޑުވަޒީރު އިމްރާން ޚާން ބާއްވަމުން ގެންދިޔަ ސިޔާސީ އެއްވުމެއްގައި އޭނާއަށް ބަޑިން ހަމަލާ ދިންމީހާގެ ވޯޑިއޯ އެގައުމުގެ ފުލުހުން އާންމު ކޮށްފިއެވެ.
މި ވީޑިއޯގައި ހަމަލާދިން މީހާ ބުނެފައިވަނީ، އޭނާގެ ހަމައެކަނި އަމާޒަކީ އިމްރާން ޚާން ކަމަށާއި، އޭނޭ ބޭނުންވީ އިމްރާމް ޚާން މަރާލަން ކަމުގައެވެ.
"އޭނާ (އިމްރާން ޚާން) ދިޔައީ މީހުން މަގު ފުރައްދަމުން، އެކަން އަހަރެންނަށް ބަލައި ނުގަނެވުނީ،" ފުލުހުން އާންމު ކޮށްފައިވާ ވީޑިއޯގައި ހަމަލާ ދިން މީހާ ބުނެފައި ވެއެވެ.
އިމްރާން ޚާންގެ ޕާކިސްތާން ޓެހްރީކް-އޭ-އިންސާފް (PTI) ޕާޓީގެ ތަރުޖަމާނެއް ކަމުގައިވާ ފަވާދު ޗައުދަރީ ވިދާޅުވެފައިވާ ގޮތުގައި، އެތަނަށް އެއްވެފައި ތިބި މީހުން ހަމަލާ ދިން މީހާ ނުހުއްޓުވިނަމަ، (PTI)ގެ މުޅީ ލީޑަރޝިޕް ނެތިގެން ދިޔައީހެވެ.
ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި ހަމަލާ އިމްރާން ޚާންގެ ފަޔަށް އަމާޒު ވުމާއެކު، އެސަރަހައްދުން އިމްރާން ޚާންވަނީ ސިއްޙީ ފަރުވާއަށް ގެންދެވިފައެވެ.
މިހަމަލާ ދިންއިރު، މިހާރު އުމުރުން 70 އަހަރުގެ އިމްރާން ޚާން ގެންދިޔައީ، ފާއިތުވެދިޔަ އެޕްރިލްމަހު އޭނާ ބޮޑުވަޒީރުކަމުން ދުރުކުރުމަށްފަހު، އަވަސް އިންތިޚާބެއް ބޭއްވުމަށް ގޮވާލާ، ޕާކިސްތާންގެ ވެރިރަށް އިސްލާމްއާބާދުގައި ބޭއްވި ހިގާލުމެއްގައި ބައިވެރިވެ ވަޑައިގަންނަވަމުންނެވެ.
ހަމަލާ ދިން ސަރަހައްދުން ހައްޔަރު ކޮށްފައިވާ، ފައިސަލް ބަޓް ނަމަކަށް ކިޔާ މީހާގެ ވީޑިއޯ ފުލުހުން އާންމު ކޮށްފައިވާއިރު، ވީޑިއޯގައި އޭނާ ބުނެފައިވަނީ އޭނާގެ ހަމައެކަނި ޓާގެޓަކީ އިމްރާން ޚާން ކަމުގައެވެ.
އަހަރެންގެ ހަމައެކަނި ޓާގެޓަކީ އިމްރާން ޚާން.
އޭނާ ބުނެފައި ވެއެވެ. އާންމު ކޮށްފައިވާ ވީޑިއޯގައި ހަމަލާދިން މީހާ ވާހަކަ ދައްކާފައިވަނީ ކޮން ހާލަތެއްގައި އިދެގެންކަމެއް އަދި ޔަގީން ކުރެވިފައެއް ނުވެއެވެ.
އިމްރާން ޚާންގެ ޕާކިސްތާން ޓެހްރީކް-އޭ-އިންސާފް (PTI) ޕާޓީގެ އިސް އޮފިޝަލެއް ކަމުގައިވާ ސައީދު އަލީ ޒަފަރު ވިދާޅުވެފައިވަނީ މި ހަމަލާގައި އިމްރާން ޚާންގެ ސަޕޯޓަރަކު ވަނީ ބަޑީގެ ހަމަލާ އަމާޒުވެ މަރުވެފައި ކަމުގައެވެ.
އަލީ ޒަފަރު ވިދާޅުވެފައިވާ ގޮތުގައި މި ހަމަލާގައި ޕާޓީގެ އެހެން އިސް އޮފިޝަލުންނަށްވެސް އަނިޔާވެފައިވާކަމަށާއި، އެންމެގެ ހާލުވެސް ރަގަޅު ކަމުގައެވެ. އަދި ޑިސްޓްރިކްޓް ޕޮލިސް އޮފިސަރ ގަޒަންފަރު އަލީ ވިދާޅުވެފައިވަނީ މި ހާދިސާގައި 9 މީހަކަށް އަނިޔާ ވެފައިވާ ކަމުގައެވެ.
މިހަމަލާއަށްފަހު އިމްރާން ޚާން ގެންދެވިފައިވަނީ ޕާކިސްތާންގެ ލާހޯރުގައި ހުރި ހޮސްޕިޓަލަކަށެވެ. PTI ޕާޓީގެ ތަރުޖަމާނަކު ވިދާޅުވެގައިވަނީ މި ހަމަލާ އަމާޒުވެފައިވަނީ އިމްރާން ޚާންގެ ފައިގެ ކަށިމައްޗަށެވެ.
ޕާކިސްތާނުގެ ބޮޑުވަޒީރު ޝެހެބާޒް ޝަރީފްވަނީ މިހަމަލާ ކުށްވެރިކޮށް، މިހަމަލާގެ ތަހުގީގު ވަގުތުން ކުރިޔަށް ގެންދިއުމަށް އަމުރު ކޮށްފައެވެ.
އިމްރާން ޚާން ގެންދަނީ އަވަސް އިންތިޚާބަކަށް ގޮވާލުމަށް ޕާކިސްތާންގައި ބޮޑެތި މުޒާހިރާތައް ބާއްވަމުންނެވެ. އެހެންނަމަވެސް ޕާކިސްތާންގެ ސަރުކާރުން ބުނެފައިވަނީ އިންތިޚާބު ބާއްވާނީ ހަމަޖެހިފައިވާ ގޮތަށް އަންނަ އަހަރުގައި ކަމުގައެވެ.
