ފުލުހުންގެ ބެލުމުގެ ދަށަށް ގެންދިޔަފަހުން ކުއްލިއަކަށް މަރުވި ރަޝީދު މަރުވި ސަބަބު ސާފުކޮށް އެގެން އޮއްވާ މައްޔިތާ ކޮށާކަށް ނުޖެހޭ ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ފުލުހުން ބުނެފައިވާގޮތުގައި ރަޝީދު މަރުވީ، ގދ. ހޯޑެއްދޫގައި ފުލުހުން ހިންގި މަސްތުވާތަކެތީގެ އޮޕަރޭޝަނެއްގެ ތެރެއިން ބަލައި ފާސްކޮށް އޭނާ ފުލުހުންގެ ބެލުމުގެ ދަށަށް ގެނައި ފަހުން މެޔަށް ދަތެއް އަރައި ސިޒްއައެއް ޖެހުންފަދަ އަލާމާތްތަކެއް ފެނުނު ފަހުން ނެެވެ. އަދި އޭނާ އެއަތޮޅު މަޑަވެއްޔަަށް ގެންދިޔައިރުވެސް މަރުވެފައިވާ ކަމަށް ފުލުހުން ބުންޏެވެ.
ނަމަވެސް އާއިލާއިން ތުހުމަތުކުރަނީ އޭނާއަކީ "ފުލުހުން މަރާލި މީހެއް" ކަމަަށެވެ. އެގޮތުން މެޔަށް ދަތުވެގެން އެ ޝަކުވާކޮށް ޑޮކްޓަރަށް ގެންދިއުމަށް އާދޭސް ކުރުމުންވެސް އެކަން ކުރީ މަރުވިފަހުން ކަމަށް އާއިލާއިން ތުހުމަތުކުރެއެވެ.
އަދި އޭނާއަށް ފުލުހުން އަނިޔާކުރި ކަމުގެ ތުހުމަތުވެސް ކުރާތީ އޭނާގެ މަރުގެ ހަގީގަތް ބެލުމަށް އޮޓޯޕްސީ ހެދުމަށް މިވަގުތު ބާއްވާފައި އޮތީ މޯޗަރީގައެވެ. ހަށިގަނޑު ޕޯސްމޯޓަމް ހައްދަން ބޭނުންނުވާ ކަމަށާއި، އެކަން ކޮށްފިނަމަ ހަށިގަނޑާއި ހަވާލުނުވާނެ ކަމަށް އާއިލާއިން ވަނީ ބުނެފައެވެ.
މިހާދިސާއާއި ގުޅިގެން ޝައިޚު ޒައިދު ވިދާޅުވީ ރަޝީދު މަރުވި ސަބަބު ސާފުކޮށް އެގެން އޮއްވާ ޕޯސްޓްމޯޓަމް ހަދަންޖެހޭ އެއްވެސް ސަބަބެއް ނެތްކަމަށެވެ. ނަމަވެސް ފުލުން އޭނާ ފަރުވާއަށް ނުގެންދިއުމަކީ ބޮޑު މައްސަލައެއް ކަމަށާއި، މަރުވުމަށްފަހު އޭނާ ވަޅުލާން އާއިލާން ބޭނުންވާއިރު، އެކަމާއި ދެކޮޅު ހަދައި މައްޔިތާގެ ޕޯސްޓްމޯޓަމް ހެދުމަކީ ކޮށްގެންވާނެ ކަމެއްނޫންކަމަށް ޝައިޚު ޒައިދު ވިދާޅުވިއެވެ.
ފުލުހުން އަނިޔާ ނުކުރާކަމަށް އެތައް ބަޔަކު ހެކިދޭއިރު، އަދި އޭނާ ނިޔާވެފައިވަނީ ޤުދުރަތީ މަރަކުން ކަމަށް އާއިލާއިންވެސް ބުނާއިރު، ޕޯސްޓްމޯޓަމް ދެން ހަދަންޖެހޭ ސަބަބެއް ނެތް! ފަރުވާއަށް ނުގެންދިއުމަކީ އިހުމާލެއް! އެކަމަކު މަރުވި ސަބަބު ސާފުކޮށް އެގެން އޮއްވާ މައްޔިތާ ކޮށާކަށް ނުޖެހޭ.
– ޝައިޚު ޒައިދު ވިދާޅުވިއެވެ.
ރަޝީދުގެ އަންހެން ކޮއްކޮ އަދި މަންމަ ބުނިިގޮތުގައި ރަޝީދުގެ މެޔަށް ތަދުވާތީ ޝަކުވާކުރަން ފެށީ އޭނާ ހައްޔަރުކޮށްގެން ފުލުހުން ލޯންޗަށް އެރުވުމުންނެވެ. ހޮސްޕިޓަލަށް ގެންގޮސްދިނުމަށް ދެގަނޑިއިރު ވަންދެން އާދޭސް ކުރިއެވެ. ނަމަވެސް އޭނާ ހޮސްޕިޓަލަށް ގެންދެވުނީ އަގައިން ފޮނުނިކުމެ މަރުވިވެސް ފަހުން ކަމަށް އާއިލާއިން ބުނެއެވެ. އާއިލާއިން ތުހުމަތުކުރަނީ އޭނާ މަރުވީ ފުލުހުންގެ އިހުމާލުން ކަމަށެވެ.
