2018ވަނަ އަހަރުގެ ރިޔާސީ އިންތިޚާބުގައި ވެރިކަމަށް ވަަޑައިގެންނެވުމަށް ސަރުކާރު ކޯލިޝަންގައި ހިމެނޭ ޕާޓީތަކުން ވެފައިވާ އެއްބަސްވުމަށް ރައީސް ސާލިހު ފުރިހަމަޔަށް އަމަލު ކުރައްވަމުން ގެންދަވާކަމަށް، ރައީސް އޮފީހުން ވިދާޅު ވެއްޖެއެވެ.
ރައީސް އޮފީހުގެ ތަރުޖަމާނު މިއުވާން މުހައްމަދު މިއަދު ބޭއްވެވި ނޫސްވެރިންގެ ބަދައްލުވުމުގައި މިހެން ވިދާޅުވެފައިވަނީ، ވެރިކަމަށް ވަޑައިގަތުމަށް ރައީސް ސާލިހު ޕާޓީތަކާއެކު ވެވަޑައިގެންނެވި އެއްބަސްވުމުން އަމަލު ކުރައްވަމުން ގެންދަވަނީ އެންމެ 10 އިންސައްތައަށް ކަމުގައި، ކޯލިޝަންގައި ހިމެނޭ އެންމެ ބޮޑު އެއް ޕާޓީ ކަމުގައިވާ ޖުމުހޫރީ ޕާޓީގެ ލީޑަރު ގާސިމް އިބުރާހިމް ދާދިފަހުން ވިދާޅުވެފައި ވަނިކޮށެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިއުވާން މިއަދު ވިދާޅުވެފައިވަނީ، ކޯލިޝަން އެބަސްވުމުން ސަރުކާރުން އަމަލު ކުރަމުންދަނީ ވަކި އިންސައްތައަކަށްކަމަށް ގާސިމް ވިދާޅުވެފައިވި ނަމަވެސް، ކޯލިޝަން އެއްބަސްވުމަށް ރައީސް ސާލިހު އަމަލު ކުރައްވަމުން ގެންދަވާކަމަށާއި، އަދި އެއްބަސް ވެވިފައިވާ ކަންކަމަށް ސަރުކާރުން އިހުތިރާމް ކުރާނޭކަމުގައެވެ.
މިއުވާން ވިދާޅުވީ، ކޯލިޝަން އެއްބަސްވުމުން އަމަލު ކުރަމުން ނުދަނީ ކޮންކަމަކަށްކަން ގާސިމް ފާހަގަ ކުރައްވާ، ވަކި އިންސައްތައަކަށް އަމުލު ކުރަމުންދާކަމަށް ވިދާޅުވުމުން، އެއަށް ޖަވާބު ދެއްވަން ދަތި ކަމުގައެވެ. އޭގެ ބަދަލުގައި، ސަރުކާރުން އަމަލު ކުރަމުން ނުދަނީ ސީދާ ކޮންކަމަކަށްކަން ވިދާޅުވެއްޖެނަމަ އެއަށް ޖަވާބު ދެއްވަން ފަސޭހަ ވާނެކަމުގައެވެ.
މިއުވާން ވިދާޅުވެފައިވަނީ ކޯލިޝަން އެއްބަސުވުމުގައި ވާ ހުރިހާކަމަށްވެސް ސަރުކާރުން އިހުތިރާމް ކުރަމުންދާ ކަމަށާއި، އެ ކަންކަމާއި ގުޅޭގޮތުން ކޯލިޝަން ޕާޓީތަކުގެ ލީޑަރުންނާއި ރައީސް ސާލިހު މަޝްވަރާވެސް ކުރައްވަމުން ގެންދވާ ކަމުގައެވެ.
ރާއްޖެ ޓީވީން ގެނެސްދިން ޕްރޮގުރާމެއްގައި ވާހަކަ ދައްކަވަމުން ޤާސިމް ވިދާޅުވީ ވެރިކަމަށް އަންނަނަށް ކޯލިޝަން ހަދާއިރު ވައުދާ އަހުދުވާކަމަށެވެ. ނަމަވެސް މާޒީގައިވެސް އަދި މިހާރުވެސް އެވައުދުތަކަށް އިހުތިރާމް ނުކުރާކަމަށެވެ. ނަމަވެސް މިވެރިކަމުގައި އެކަން ކޮންމެވެސް ވަރަކަށް ރަނގަޅުކަމަށް ޤާސިމް ވިދާޅުވިއެވެ. އޭނާ ވިދާޅުވީ ކޯލިޝަން ވެރިކަމެއް އޮތުމުންވެސް އެންމެ ބޮޑަށް ފާޑުކިޔަނީ އެމްޑީޕީން ކަމަށެވެ.
ނަމަވެސް ވަޒީރުންގެ މަޖިލީހަށް ބެލި ކަމުގައި ވީނަމަވެސް އަދި ސަރުކާރުގެ ސިޔާސީ އެކި ވަޒީފާތަކަށް ބެލި ކަމުގައި ވީނަމަވެސް ކޯލިޝަނަށް 10 ޕަސެންޓް ވަޒީފާވެސް ދީފައި ނުވާކަމަށެވެ. ސަރުކާރުގެ ސިޔާސީ ވަޒީފާތަކުގެ 90 އިންސައްތަ ހިއްސާ ކުރަނީ އެމްޑީޕީންކަމަށްވެސް މި ޕްރޮގްރާމްގައި ވާހަކަ ދައްކަވަމުން ޤާސިމް ވިދާޅުވެފައި ވެއެވެ.
ޤާސިމް ވިދާޅުވީ މަލްޓިޕާޓީި ނިޒާމުގެ ތެރެއިން މިހާތަނަށް އުފެދުނު ކޮންމެ ވެރިކަމެއްގައިވެސް ޖުމްހޫރީ ޕާޓީން މުހިންމު ދައުރެއް އަދާކުރިކަމަށެެވެ. ކޮންމެ ބަޔަކާއިއެކުވެސް ވެރިކަމަށް އަންނަނީ ބޮޑު ކޯލިޝަނެއް ހަދައި އެގްރީމަންޓުތައްކޮށް އަހުދު ކަށަވަރު ހިފައިގެން ކަމަށެވެ. ނަމަވެސް އެއްވެސް ބަޔަކަށް ވާ އަހުދުތަކަށް އިހުތިރާމް ނުކުރެވޭކަމަށެވެ. މިސަރުކާރުވެސް ހިމެނޭހެން ޤާސިމް ވިދާޅުވީ މިހާތަނަށް ޖޭޕީން ހެދި ކޮންމެ ކޯލިޝަން ވެރިކަމެއްގައި ކަންވީގޮތް ދިވެހި ރައްޔިތުންނަށް ސާފުވާނެކަމަށެވެ.
ކޮމެންޓު ފޮނުވާ