ދިވެހި ސިފައިންގެ 130 ވަނަ އަހަރީ ދުވަސް ފާހަގަކުރުމުގެ ގޮތުން ކަޅުތުއްކަލާކޮށީގައި ރޭ ބޭއްވެވި ޖަލްސާގައި ސިފައިންގެ ވެލްފެއާ އަދި ފްލެޓްތަކާއި ގުޅޭ އެއްވެސް ވާހަކައެއް ރައީސުލްޖުމްހޫރިއްޔާވެސް އަދި ޑިފެންސް މިނިސްޓަރ މާރިޔާވެސް ނުދެއްކެވިއެވެ.
ސިފައިންގެ ބޯހިޔާވަހިކާމާއި، ވެލްފެއާގެ ޝަކުވާއަކީ އެތައް އަހަރެއް ވަންދެން ކުރަމުންދާ ހައްލު ނުވެ އޮތް ބޮޑު މައްސަލައެކެވެ. ރައީސް ޔާމީންގެ ވެރިކަމުގައި ސިފައިންގެ ބޯހިޔާވަހިކަމަށް ހައްލު ހޯދުމަށް އަޅަމުންދިޔަ "ސިފްކޯ" ފްލެޓްތަކުގެ މަސައްކަތް ހުއްޓި ކުރިއަށް ނުދާތީ ގިނަ ކަންބޮޑުވުންތަކެއް ސިފައިންގެ ތެރޭގައި އެބައޮތެވެ.
ކޮންމެ އަހަރެއްގެވެސް ސިފައިންގެ އަހަރީ ދުވަހުގެ ޖަލްސާގައި ސިފައިންގެ ބޯހިޔާވަހިކަމާއި، ފްލެޓްތަކުގެ ވާހަކަ އާއި ގުޅޭގޮތުން ވާހަކަތަކެއް ދެކެވެއެވެ. ފްލެޓްތައް ނިންމާނެ ތާރީހުތަކެއްވެސް ދެވިފައިވެއެވެ. ނަމަވެސް މިހާތަނަށް އައިއިރު ސިފައިންގެ ފްލެޓްތައް ނިމޭނެ ތާރީހެއް ދެއްވައިނުވެއެވެ. އަދި ރޭގެ ޖަލްސާގައި ސިފައިންގެ ފްލެޓްތަކާއި ގުޅޭގޮތުން އެއްވެސް ވާހަކައެއް އެއްވެސް ބޭފުޅަކު ދައްކާފައި ނުވެއެވެ.
އެއްބަސްވުން އުވާލައި މަސައްކަތް ހުއްޓި 9 ވަރަކަށް އަހަރުވެފައިވާ ސިފައިންނާއި ފުލުހުންގެ ފްލެޓްތަކުގެ މަސައްކަތް ލަސްވެގެންދަނީ މިހާރު މަސައްކަތް ހަވާލުކުރި ކުންފުންޏާއި ހަވާލު ކުރުމުގެ ކުރިން އެތަނުގައި މަސައްކަތް ކުރި ސަބް ކޮންޓްރެކްޓަރުގެ ސަބަބުންކަމަށް ޕްލޭނިން މިނިސްޓްރީން ވަނީ ވިދާޅުވެފައެވެ. މިހާރުވެސް މަސައްކަތްތައް ކުރިއަށްދާ ގޮތަށް ބަލާއިރު މަސައްކަތް ނިންމަން އެއްބަސްވި މުއްދަތަށްވުރެ ދެމަސް ދުވަސް ލަސްވާނެކަމަށް މިނިސްޓްރީން ވިދާޅުވިއެވެ. އެ ފްލެޓްތަކުގެ މަސައްކަތް ޕްލޭނިން މިނިސްޓްރީން މިހާރު ހަވާލުކޮށްފައިވަނީ އަމީން ކޮންސްޓްރަކްޝަނާއެވެ.
އަމީން ކޮންސްޓްރަކްޝަނާ ހަވާލުކޮށްފައިވަނީ ފުލުހުންގެ 361 ހައުސިންގ ޔުނިޓްގެ ފިނިޝިންގ މަސައްކަތް 8 މަސްދުވަހުގެ ތެރޭގައި ނިންމުމަށެވެ. ނަމަވެސް މަސައްކަތް ހަވާލުކުރިތާ އެތައް ދުވަހެއް ވެގެންދާއިރުވެސް މިމަސައްކަތް ނިމިފައި ނުވެއެވެ. މިޔުނިޓްތަކަކީ 1100 އަކަފޫޓުގެ ޔުނިޓްތަކެކެވެ. މިއީ މުޅިންވެސް 3 ކޮޓަރީގެ އެޕާޓްމަންޓްތަކެވެ. މިމަސައްކަތްތައް ނިންމުމަށް އަމީން ކޮންސްޓްރަކްޝަންއާ ހަވާލުކޮށްފައިވަނީ 274.5 މިލިއަން ރުފިޔާއަށެވެ.
