ރާއްޖޭގެ ރިސޯޓުތަކުގައި ވަޒީފާ އަދާކުރާ %90 މުވައްޒަފުންނަށް ނައިޓަށް ރަށަށް ނުދެވޭ ކަމުގައި ބުނެ، ޓުއަރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) ރައްޔިތުންގެ މަޖިލިހުގެ ރައީސް މުހައްމަދު ނަޝީދަށް ރައްދު ދީފިއެވެ.
ޓީމްއިން ނަޝީދަށް ރައްދު ދީފައި މިވަނީ، މިހާރު ކުރިޔަށްދާ އެމްޑީޕީގެ ކޮންްރެސްގައި ރޭ ވާހަ ދައްކަވަމުން، އެމްޑީޕީން ފުއްދާ ދީފައިވާ ވައުދުތަކުގެ ތެރޭގައި ރިސޯޓު މުވައްޒަފުންނަށް ނައިޓަށް ރަށް ދެވޭނެ މަގު ފަހިކޮށްދީފައިވާކަމަށް ވިދާޅުވުމާއި ގުޅިގެންނެވެ.
ޓީމްއިން އެ އެސޯސިއޭޝަންގެ ފޭސްބުކް ޕޭގުގައި ހާމަ ކޮށްފައިވާ ގޮތުގައި 90 އިންސައްތަ މަސައްކަތްތެރިންނަށް ނައިޓަށް ރަށަށް ނުދެވޭއިރު، ނުވިތާކަށް އޮފްވެސް ރިސޯޓްގައި ނަގަން މަޖްބޫރު ކުރުވާފައި ވާކަމުގައެވެ.
އިތުރަށް ޓީމްއިން ހާމަ ކޮށްފައިވާ ގޮތުގައި ބިދޭސީން މިނިމަމް ވޭޖުން މަހުރޫމް ކުރުމުގެ ސަބަބުން، ރިސޯޓް މުވައްޒަފުންގެ އެތަށް ސަތޭކަ ވަޒީފާއަކަށް ބިދޭސީން ގެނެސް، މުވައްޒަފުން އައުޓްސޯސްކޮށް، އެމީހުންނަށް މިނިމަމް ވޭޖް ނުދީ އަޅުންގެ ގޮތުގައި ގެންގުޅުން އިންތިހާއަށް އިތުރުވެފައި ވާކަމުގައެވެ.
އޭގެ އިތުރަށް ސާވިސްޗާޖުން މަކަރުހެދުން ރިސޯޓް، ހޮޓާ، ސަފާރީ އަދި ގެސްޓް ހައުސް ތަކުގައި އިތުރުވެ، ޓެކްސްއަށްވެސް މަކަރު ހެދުންވެސް ގެސްޓު ހައުސްތަކުގައި މިހާރު އިތުރުވެފައި ވާކަމުގައިވެސް ޓުއަރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް ވިދާޅުވެފައި ވެއެވެ.
ޓީމްއިން ފާހަގަ ކޮށްފައިވާ މައްސަލަތަކުގެ ތެރޭގައި، ރިސޯޓް މުވައްޒަފުންނަށް އަދި ޕުރައިވެޓް ސެކްޓާ މުވައްޒަފުންނަށް ވިހެއުމާއި ގުޅިގެން 6 މަސްްދުވަސް ލިބެމުން ނުދިއުންވެސް ހިމެނެއެވެ. އަދި 519$ މަތީން މުސާރަ ލިބެމުންދިޔަ ފަރާތްތަކަށް މިނިމަމްވޭޖްގެ ކުރިއެރުން ނުލިބުމުގެ އިތުރުން، ދިހަ ބާރަ ގަޑި އިރު މަސައްކަތް ކުރުވާ އޯވަރޓައިމް ފައިސާވެސް ގިނަ ރިސޯޓް ތަކުގައި ދެމުން ނުދާކަން އެ އެސޯސިއޭޝަންއިން ފާހަގަ ކޮށްފައި ވެއެވެ.
ޓީމްއިން ފާހަގަ ކޮށްފައުވާ ގޮތުގައި މިހުރިހާކަމަކީވެސް ސީދާ ޓޫރިޒަމް މިނިސްޓްރީ އަދި އިކޮނޮމިކް މިނިސްޓްރީގެ ބެލުމުގެ ދަށުން ހިންގަމުންދާ ކަންކަމެވެ.
ރިސޯޓު މުވައްޒަފުންނަށް ނައިޓަށް ރަށަށް ދެވޭނޭ އިންތިޒާމް ހަމަޖައްސަވާ ދެއްވާނޭކަމުގެ ވައުދަކީ ތުޅާދޫ ދާއިރާގެ މަޖިލިސް މެމްބަރު ހިސާން ހުސެއިން އޭނާގެ މަޖިލިސް ކެމްޕޭންގައި ވެފައިވާ ވައުދެކެވެ.
މި ވައުދު ފުއްދުމުގެ ނަމުގައި އެމްޑީޕީގެ ޕާލަމްނެޓްރީ ގުރޫޕުން ގާނޫނުނަށް ގެނައީ އިސްލާހެކެވެ. އެއީ ރިސޯޓު މުވައްޒަފުންނަށް އިތުރުގަޑީގައި ރަށް ދިޔަނުދީ ނުބޭތިއްބޭ ގޮތަށް ގެނެސްފައިވާ އިސްލާހެކެވެ.
މިއިސްލާހު ގާނޫނަށް ގެނައުމަށްފަހި، މި ކަން އެމްޑީޕީން ޕްރޮމޯޓް ކުރަމުންދަނީ، ނައިޓަށް ރަށަށް ދެވޭނެ ގޮތް ތަނަވަސް ކުރުމަށް ވީ ވައުދު ފުއްދިފައިވާކަމަށް ބުނެއެވެ.
އެހެންނަމަވެސް، ނައިޓަށް ރަށަށް ދެވޭނެ މަގު ފަހިކުރުމުގެ ދަތުރުފަތުރުގެ ނިޒާމެއް، ނުވަތަ އެކަމަށް ބޭނުންވާ މާލީ އަދި އެހެން އެއްވެސް އިންތިޒާމަކާއި ގުޅޭއް އެއްވެސް މަސައްކަތެއް ފުރިހަމަ ކޮށްފައެއް ނުވެއެވެ.
