ސްރީ ލަންކާގެ އިސްތިއުފާ ދެއްވާފައިވާ ރައީސް ގޮޓަބަޔަ ރާޖަޕަކްސައަށް ފިއްލަވައިގެން ރާއްޖެ ވަޑައިގަތުމަށް ފުރުސަތު ދީފައިވާ ކަމަށްބުނެ އެތައް ބައެއްގެ ފާޑު ކިއުމާއި ނުރުހުން ސަރުކާރަށް އަމާޒުވެފައި ވަނިކޮށް، ރާޖަޕަކްސަ ދަތުރުކުރެއްވި އަސްކަރީ މަތިންދާ ބޯޓު ވެލާނާ އިންޓަރނޭޝަނަލް އެއަރޕޯޓުގައި ޖެއްސުމުގެ ހުއްދަ ދިން ސަބަބު ސަރުކާރުން ހާމަ ކޮށްފިއެވެ.

ރޭގެ ވަގުތެއްގައި ގޮޓަބަޔަ ސިންގަޕޯރއަށް ވަޑައިގެން އިސްތިއިފާ ދެއްވިކަމަށް މީޑިއާތަކުން ރިޕޯޓު ކުރުމާއެކު، ރޭ ދަންވަރު ފޮރިންގ މިނިސްޓްރީން ނެރުއްވި ކުރު ބަޔާނެއްގައި ވިދާޅުވެފައިވަނީ، ގޮޓަބަޔައަށް ޑިޕްލޮމެޓިކް ކްލިއަރެންސް ދީފައިވަނީ ސްރީ ލަންކާ ސަރުކާރުގެ ރަސްމީ ރިކުއެސްޓަކަށް ކަމުގައެވެ.

އަދި ގޮޓަބަޔަގެ ދެމަފިރިން ދަތުރުކުރެއްވި އަސްކަރީ މަތިންދާ ބޯޓު ވެލާނާ އިންޓަރނޭޝަނަލް އެއަރޕޯޓުގައި ޖައްސާފައިވަނީ ޓްރާންސިޓްކޮށް ކަމަށްވެސް މި ބަޔާނުގައި ވިދާޅުވެފައި ވެއެވެ.

އިންސާނިއްޔަތާ ޚިލާފް އެތައް ޖަރީމާއެއްގެ ތުހުމަތު އޮތް ގޮޓަބަޔައަށް ގައުމު ދޫކޮށް ފިލައިގެން ދާން ދިވެހި ސަރުކާރުން އެހީތެރިވެ ދީފައިވާކަމަށް ބުނެ ގިނަ ބައެއްގެ ފާޑުކިއުން ސަރުކާރަށް ވަނީ އަމާޒު ވެފައެވެ.

މިގޮތުން ފިއްލަވައިގެން ސްރީ ލަންކާ ދޫކޮށް ގޮޓަބަޔަ ރާއްޖެ ވަޑައިގަތުމުގައި އެހީތެރިކަން ފޯރުކޮށް ދީފައިވަނީ ނަޝީދުކަމަށް ތުހުމަތުކޮށް ގިނަބައެއްގެ އެންމެ ބޮޑު ފާޑުކިއުމެއް އަމާޒު ވެފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށެވެ.

މީގެ އިތުރަށް ސްރީ ލަންކާގެ ގިނަބައެއްގެ ފާޑިކުންވެސް މިމައްސަލާގައި ނަޝީދަށް ވަނީ އަމާޒުވެގެން ގޮސްފައެވެ.

ގިނަ ބަޔަކު ބުނެފައިވަނީ، ގޮޓަބަޔަ ރާޖަޕަކްސައަކީ އިންސާނިއްޔަތާ ޚިލާފް އެތައް ޖަރީމާއެއްގެ ތުހުމަތު ކުރެވޭ ފަރާތަކަށް ވާއިރު، މި ތުހުމަތުތަކަށް ޖަވާބުދާރީ ނުވެ، ގޮޓަބަޔައަށް ފިލައިގެން ދިއުމުގެ ފުރުސަތު ފަހިކޮށް ދީފައިވަނީ ދިވެހި ސަރުކާރަށް ނަޝީދު ޕްރެޝަރ ކޮށްގެން ކަމުގައެވެ.

ގޮޓަބަޔަ ކުރީ ރޭގެ ވަގުތެއްގައި ރާއްޖެ ވަޑައިގަތްއިރު އެއަރޕޯޓުން ނަޝީދު ގޮޓަބަޔައަށް މަރުހަބާ ވިދާޅުވެފައި ވާއިރު، ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، އިއްޔެ ވެލާނާ އިންޓަރނޭޝަނަލް އެއަރޕޯޓުން ގޮޓަބަޔައަށް އަލްވަދާއު ވިދާޅުވެފައިވަނީވެސް ނަޝީދުއާއި އޭނާގެ އަރިސް ބައެއް މަޖިލިސް މެމްބަރުންނެވެ.