ބަރުދަން ލުއިކުރުމަކީ އަޅުގަނޑުމެންގެ ތެރޭގައި ގިނަ ބަޔަކު ކުރަން ބޭނުންވެ، ނަމަވެސް ރަނގަޅު ނަތީޖާއެއް ނުނެރެވޭ ކަމެކެވެ. ރަނގަޅު ސިއްހަތެއްގައި ހުރުމަށާއި ލޯޅާފަތި ހަށިގަނޑެއް ހޯދުމަށް ބައެއް މީހުން ވަރަށް ބުރަކޮށް މަސައްކަތް ކުރާއިރު އަނެއް ބަޔަކަށް މިކަން ބޮޑު ވޭނަކަށްވެ، ހިކެން ބޭނުންވިޔަސް ބޮޑެތި ޑައެއްޓް ޕްލޭންތައް ފޮލޯކޮށް ވޯކްއައުޓްތައް ޖައްސަން އުޒުރުވެރި ވެއެވެ.
މިފަދަ މީހުންނަށް މިއޮތީ ކޮންމެވެސް ވަރެއްގެ އުފާވެރި ޚަބަރެކެވެ. ވަކި ވަގުތެއްގައި ނުކައި ހުރުމުން ބަރުދަން ލުއި ކުރެވޭކަމަށް ޗިކާގޯގެ އިލިނޮއިސް ޔުނިވަރސިޓީން މީގެކުރިން ކުރި ދިރާސާއަކުން ވަނީ ދައްކާފައެވެ.
އެ ޔުނިވަރސިޓީން ހާމަކޮށްފައިވާގޮތުގައި "ޓައިމް-ރެސްޓްރިކްޓެޑް ފީޑިން ޑައެޓް" ނަމުގައި ކުރިއަށް ގެންދިޔަ ދިރާސާގައި، ކޮންމެ ދުވަހުކު ކަނޑައެޅޭ 4ގަޑިއިރު ތެރޭ ކައިގެންނާއި 6ގަޑިއިރު ތެރޭ ކައިގެން ބަރުދަނަށާއި ހަށިގަނޑަށް އަންނަ ބަދަލު ވަނީ ބަލާފައެވެ. އެގޮތުން ދިރާސާގެ ބައިވެރިންވަނީ 2 ގުރޫޕަކަށް ބަހާލާފައެވެ.
ފުރަތަމަ ގުރޫޕުގެ މީހުންނަށް އެންގީ ކޮންމެ ދުވަހަކުވެސް ހަމައެކަނި މެންދުރު 1-5 ދެމެދު ކާނެ އެއްޗެއް ކެއުމަށެވެ. އަނެއްބައި މީހުންނަށް އެންގީ 1-7 ކާއި ދެމެދު ކެއުމަށެވެ. 2 ގުރޫޕްގެ މީހުނަށްވެސް ވަނީ އެބަޔަކު ބޭނުން އެއްޗެއް އެވަގުތުގެ ތެރޭގައި ކެއުމަށް ހުއްދަ ދީފައެވެ. އަދި ކެއުން މަނާކޮށްފައިވާ ގަޑިތަކުގައިވެސް ފެނާއި ކެލޮރީ ފްރީ ބުއިންތައް ބުއިމުގެ ހުއްދަ ވަނީ ދީފައެވެ.
މިދިރާސާ 10 ހަފްތާވަންދެން ކުރިޔަށް ގެންގޮސްފައިވާއިރު، އެމުއްދަތުގެ ތެރޭގައި ބައިވެރިންގެ ބަރުދަން، ލޭގައި ހަކުރުހުރި މިންވަރު، ލޭމައްޗަށް ދާވަރު، ކޮލެސްޓްރޯލގެ މިންވަރު އަދި އިންފްލަމޭޓަރީބެލުމަށް ޓެސްޓްތައް ވަނީ ހަދާފައެވެ.
މިދިރާސާއިން ހާމަވިގޮތުގައި ދުވާލެއްގެ މައްޗަށް ދެގުރޫޕުގެ މީހުންގެ ގައިންވެސް 550 ކެލޮރީސް މަދުވެފައި ވެއެވެ. އަދި ދިހަ ހަފްތާތެރޭ ގައި ބަރުދަނުގެ 3 އިންސައްތަ ލުއި ވެފައިވާކަމަށް ނަތީޖާ ތަކުން ދައްކާފައިވާއިރު، މި ދިރާސާގެ ބައިވެރިންގެ އިންސިއުލިން ރެސިސްޓެންސް އާއި އޮކްސިޑޭޓިވް ސްޓްރެސް ލެވެލް ވަނީ ދަށްވެފައެވެ.
ނަމަވެސް، ނަތީޖާތަކުން ބައިވެރިންގެ ލޭގެ ޕްރެޝަރާއި ކޮލެސްޓްރޯލްގެ ލެވެލަށް އެއްވެސް ބަދަލެއް އައިސްފައިނުވާކަން ހާމަވެއެވެ.
މި ދިރާސާއަށް ބަލާއިރު ބަރުދަން ލުއިކުރުމަށް ބޭނުންވާ މީހަކު ކާކާއެއްޗެއްސައް ވުރެ ބެލުން ރަނގަޅީ ކާ ގަޑިތަކަށެވެ. ކަން މިހެން ހުރި ނަމަވެސް ދުޅަހެޔޮ ސިއްހަތެއް ނޫންނަމަ ބަރުދަން ލުއިކުރުމުގައި އެދެވޭ ނަތީޖާއެއް ބޭނުން ނަމަ ކޮންމެވެސް ވަރަކަށް ހެލިފެލިވެ އުޅެލަންވެސް ވާނެއެވެ.
