ނިދާ ކޮޓަރިއަކީ ވަރަށް އަރާމު ހިތަށް ފިނިކަމެއް ލިބޭ ތަނެއްކަމުގައި ވާން އެންމެންވެސް ބޭނުންވެއެވެ. އަދި ހަމަ އެއާއެކު ހިތްހަމަ ޖެހޭ ގޮތަކަށް ޑިޒައިންކޮށް ކުލަ ލައިހަދައެވެ.
ކުލަ ލުމުގައި އެމީހަކަށް އެންމެ ރީތި ކުލައެއް ލުމަށް ވުރެ ކޮޓަރި ހިތްގައިމު ކުރުމަށް ސަމާލުކަން ދިނުމަށް މިކަމުގެ ތަޖުރިބާކާރުން ލަފާ ދެއެވެ.
އަދި ނިދާ ކޮޓަރި މީހާގެ މޫޑާއި ގުޅެން ވާނެއެވެ. ކުލަތަކަކީ އެމީހާގެ މިޒާޖާވެސް ގުޅެން ޖެހޭ ކުލަތަކަކަށް ވާންޖެހޭނެއެވެ. ނިދާލަށް އަރާމު ހިތްގައިމު ކޮޓަރިއަކަށް ވެސް ވާން ޖެހޭނެއެވެ.
އެމެރިކާގެ 1000 މީހަކު ބައިވެރިކޮށްގެން ކުރި ދިރާސާ އަކުން ދައްކާ ގޮތުގައި ނިދާ ކޮޓަރީގައި ލުމަށް އެންމެ ކަމުނުދާ ކުލަ ތަކުގެ ތެރޭގައި ހިމެނެނީ ރީނދޫ، މުށި، ގަދަ ފިޔާތޮށި ކުލަ ފަދަ ކުލަތަކެވެ. އަދި ތަފާތު ފްލޮރިޒެންޓް ކުލަ ތަކަކީވެސް ނިދާ ކޮޓަރީގައި ލުމަށް އެންމެ ކަމުނުދާ ކުލަތަކެވެ.
މާ ގަދަ ކުލަތައް ނިދާ ކޮޓަރިއާ ނުގުޅޭ ކަމަށާއި ނިދާ ތަނެއްގައި ލާން ވަނީ ތަންކޮޅެއް ބަލާލަން ފަސޭހަ ހިތްގައިމު ކުލައެއް ކަމަށް މިދިރާސާގެ ނަތީޖާގައި ވަނީ ބުނެފައެވެ.
ހަށިގަނޑުގެ ދުޅަހެޔޮކަމަށް ކޮންމެހެން ބޭނުންވާ އަރާމު ނިންޖެއް ނިދާލުމަށް، ނިދާކޮޓަރި ފަރުމާ ކުރާއިރު މިކަންކަން ހަނދާން ބަހައްޓަން ވާނެއެވެ.
