އިންގްލެންޑުން ހަންގޭރީއާ ދެކޮޅަށް އަމިއްލަ ގައުމުގައި ކުޅުނު ޔޫއެފާ ނޭޝަންސް ލީގު މެޗުގައި 4-0 ގެ ނަތީޖާއަކުން ބަލިވެއްޖެއެވެ.
މިއީ 1928 ގައި އިންގްލެންޑް އަމިއްލަ ފަސްގަނޑުގައި ސްކޮޓްލެންޑް އަތުން 5-1 އިން ބަލިވި މެޗަށް ފަހު، މިހާ ތަފާތު ބޮޑުކޮށް އެޓީމު ބަލިވި ފުރަތަމަ ފަހަރެވެ.
ފުރަތަމަ ހާފު ހަންގޭރީ ނިންމާލީ ވިންގާ ރޮލާންޑް ސަލާއީގެ ލަނޑުން ކުރި ހޯދައިގެންނެވެ. އެޓީމުގެ ދެވަނަ ލަނޑު 70 ވަނަ މިނިޓިގައި ޖަހައިދިނީ ވެސް ސަލާއީއެވެ. އަދި ތިންވަނަ ލަނޑު 80 ވަނަ މިނިޓުގައި ޖަހައިދިނީ ސޯލްޓް ނެގީއެވެ. އޭގެ ދެ މިނިޓު ފަހުން އިންގްލެންޑުގެ ޑިފެންޑަރު ޖޯން ސްޓޯންސް އަށް ދެ ރީނދޫ ކާޑާ އެކު ރަތް ކާޑު ދެއްކުމުން އެޓީމަށް މެޗު ފުރިހަމަކުރަން ޖެހުނީ 10 ކުޅުންތެރިންނާ އެކުއެވެ.
ދިހަ ކުޅުންތެރިންނާ އެކު ކުޅެމުން ދިޔަ އިންގްލެންޑު ކޮޅަށް ހަންގޭރީގެ ހަތަރުވަނަ ލަނޑު 89 ވަނަ މިނިޓުގައި ޖެހީ ޑެނިއަލް ގަޒްޑާގްއެވެ. މިއާ އެކު އިންގްލެންޑް އޮތީ ހަތަރު މެޗުން ހޯދި ދެ ޕޮއިންޓާ އެކު ގުރޫޕުގެ ފުލުގައެވެ.
ޔުއެފާ ނޭޝަންސް ލީގުގެ ޑިވިޝަން އެކެެއްގެ ގްރޫޕް ސީގައި ކޮންމެ ޓީމެއް ހަތަރު މެޗު ކުޅެފައިވާއިރު، އެއް ވަނައިގައި ހަންގޭރީ އޮތީ ހަތް ޕޮއިންޓާ އެކުއެވެ. ދެ ވަނައިގައި އޮތް ޖަރުމަނަށް ހަ ޕޮއިންޓް ލިބިފައިވާއިރު، ތިން ވަނައިގައި އިޓަލީ އޮތީ ފަސް ޕޮއިންޓް ހޯދައިގެންނެވެ. އެންމެ ފުލުގައި އޮތީ މޮޅެއް ނުލިބި ދެ ޕޮއިންޓާ އެކު އޮތް އިންގްލެންޑްއެވެ. އިންގްލެންޑަށް ވަނީ ރޭގެ ބައްޔާ އެކު ފައިނަލް ބުރަށް ދިއުމުގެ ދޮރު ބަންދުވެފައެވެ.
