ޔޫއެފާ ނޭޝަންސް ލީގުގައި ޕޯޗުގަލް 2-0 އިން ޗެކް ރިޕަބްލިކް ބަލިކޮށް ގުރޫޕުގެ ކުރީގައި މަގާމް ދެމެހެއްޓައިފިއެވެ.
ޗެކް ރިޕަބްލިކް ކޮޅަށް ޕޯޗުގަލް އިން ދެ ގޯލު ޖެހީ ވެސް ފުރަތަމަ ހާފުގައެވެ. ޕޯޗުގަލް އިން ފަސް މިނިޓް ތެރޭ ދެ ގޯލު ޖެހިއިރު، ދެ ގޯލަށް ވެސް ފުރުސަތު ތަނަވަސްކޮށްދިނީ މެޗުގެ މޮޅު ކުޅުންތެރިޔާ، ބެނާޑޯ ސިލްވާއެވެ. އެ ގޮތުން މެޗުގެ 33 ވަނަ މިނިޓްގައި ޔާއޯ ކަންސޭލޯ ހަނި އޭންގަލުން ވައްދާލި ގޯލުން ޕޯޗުގަލް ލީޑުނެގިއެވެ.
ޕޯޗުގަލް އިން ފުރަތަމަ ގޯލު ޖެހިތާ ފަސް މިނިޓް ފަހުން، މެޗުގެ 38 ވަނަ މިނިޓްގައި ދެ ވަނަ ގޯލު ޖެހީ ފޯވާޑް، ގޮންކާލޯ ގުއޭޑޭޝްއެވެ. ބެނާޑޯ ސިލްވާ ދިން ބޯޅަ، ގުއޭޑޭޝް ވަނީ ގޯލުގެ ތިރީ ކަނަށް ފޮނުވާލައިފައެވެ.
ޕޯޗުގަލް އަކީ މި މުބާރާތުގެ އެންމެ ފުރަތަމަ ޗެމްޕިއަނެވެ. އެ ގޮތުން 2019 ވަނަ އަހަރު ޕޯޗުގަލް އިން މުބާރާތް ކާމިޔާބުކުރީ ފައިނަލުގައި ނެދަލެންޑްސް ބަލިކުރުމަށް ފަހުއެވެ. ނޭޝަންސް ލީގުގައި މިހާތަނަށް ކުޅުނު މެޗުތަކުން ޕޯޗުގަލް ބަލިވި ހަމައެކަނި މެޗަކީ މިދިޔަ އަހަރުގެ ގްރޫޕް ސްޓޭޖުގައި ފްރާންސް އަތުންނެވެ.
މިގްރޫޕްގެ އެއް ވަނައިގައި އޮތީ ތިން މެޗުން ހަތް ޕޮއިންޓް ހޯދި ޕޯޗުގަލްއެވެ. ދެ ވަނަ ލިބެނީ ތިން މެޗުން ފަސް ޕޮއިންޓް ހޯދާފައިވާ ސްޕެއިންއެވެ. ތިން ވަަނައިގައި އޮތީ ތިން މެޗުން ހަތަރު ޕޮއިންޓާ އެކު ޗެކް ރިޕަބްލިކްއެވެ. ފުލުގައި އޮތް ސްވިޒަލެންޑަށް އަދި ޕޮއިންޓެއް ނުލިބެއެވެ.
