ލިވަޕޫލަށް ކުޅެމުން އަންނަ ސެނެގާލުގެ ފޯވާޑް ސަޑިއޯ މާނޭ ގަތުމަށް ބަޔާން މިޔުނިކުން ހުށަހެޅި އަގު ކުޑަކަމުން، އެ ބިޑް ގަބޫލުނުކޮށް އަނބުރާ ފޮނުވާލައިފިއެވެ.
ބަޔާންއިން މިފަހަރު އުމުރުން 30 އަހަރު ވެފައިވާ މާނޭ ގަތުމަށް ހުށަހަޅާފައިވަނީ 30 މިލިއަން ޕައުންޑްގެ އަގެކެވެ. މިއީ އެކްލަބުން އެންމެ ފުރަތަމަ ހުށަހެޅި 25 މިލިއަން ޕައުންޑްގެ އަގު އަނބުރާ ފޮނުވާލުމުން ހުށަހެޅި ދެވަނަ އަގެވެ. ބަޔާންގެ މިއަގާމެދު ލިވަޕޫލަށް ވަނީ ހައިރާންކަން ލިބިގެން ގޮސްފައެވެ. ލިވަޕޫލުން މާނޭ އަގުކުރަނީ 50 މިލިއަން ޔޫރޯގައެވެ. އެއީ 42.8 މިލިއަން ޕައުންޑެވެ.
މިއީ ބަޔާންއިން އެކްލަބްގެ ފޯވާޑް ރޮބަޓް ލެވަންޑޯސްކީވެސް ވިއްކާލަން ބޭނުންވާ އަގެވެ. ލެވަންޑޯސްކީ އާއި މާނޭގެ އެއްބަސްވުން ހަމަވާން ދެން އޮތީ އެއް އަހަރެވެ. 2016 ވަނަ އަހަރު ސައުތެމްޕްޓަންއިން 36 މިލިއަން ޕައުންޑްގެ އަގަކަށް ލިވަޕޫލަށް ބަދަލުވި މާނޭ ވަނީ މިހާތަނަށް އެޓީމަށް 120 ލަނޑު ޖަހާދީފައެވެ. އަދި މާނޭ ވަނީ 2018 ވަނަ އަހަރު ލިވަޕޫލުގެ އެއްބަސްވުން އާވެސް ކޮށްފައެވެ. މިއެއްބަސްވުން ނިމުމަކަށް އަންނާނީ މިއަންނަ ސީޒަންގެ ނިޔަލަށެވެ.
މާނޭގެ އިތުރުން އެ ޓީމްގެ ކުރިއަށް ކުޅެ މުހައްމަދު ސަލާހްގެ އެއްބަސްވުންވެސް މިއަންނަ އަހަރަށް ހަމަވާތީ އެއެއްބަސްވުންވެސް އާކުރުމަށް އެ ކުލަބުން އަންނަނީ މަސައްކަތް ކުރަމުންނެވެ. އަދި ލިވަޕޫލުން މިހާރު އަންނަނީ ބެންފީކާއަށް ކުޅޭ އުރުގުއާއީގެ ފޯވާޑް ޑާވިން ނޫނޭޒް ގެނައުމަށް މަސައްކަތް ކުރަމުންނެވެ.
