ވޯލްޑް ކަޕް ކޮލިފައިންގެ ޔޫރަޕްގެ ޕްލޭއޮފް ފައިނަލުގައި މިރޭ ޔޫކްރެއިން 1-0 އިން ބަލިކޮށް ވޭލްސް އިން 64 އަހަރަށް ފަހު ފީފާ ވޯލްޑް ކަޕަށް ކޮލިފައިވެއްޖެއެވެ.
ކޮލިފައިން ގުރޫޕުގެ ފުރަތަމަ މެޗުން ބެލްޖިއަމް އަތުން ބަލިވެގެން، ގުރޫޕްގެ ދެވަނަ ލިބުމުން ޕްލޭއޮފް ކުޅެން ޖެހުނު ވޭލްސް ވަނީ މާޗު މަހު ސެމީ ފައިނަލުގައި އޮސްޓްރިއާ ބަލި ކޮށް ފައިނަލުން ޖާގަ ހޯދައިފައެވެ. ހަނގުރާމައިގެ ސަބަބުން ޔޫކްރޭނުން ސްކޮޓްލެންޑާ ދެކޮޅަށް ކުޅެން އޮތް މެޗު ފީފާއިން ފަސް ކުރި އެވެ. ޔޫކްރޭނުން ވަނީ މިދިޔަ ހަފްތާ ސްކޮޓްލެންޑް ބަލި ކޮށް ފައިނަލުގެ ދެވަނަ ޖާގަ ހޯދައިފައެވެ.
ކާޑިފް ސިޓީ ސްޓޭޑިއަމްގައި މިރޭ ކުޅުނު މެޗުގައި ފެނިގެންދިޔަ ހަމައެކަނި ގޯލަކީ ޔޫކްރެއިންގެ ފޯވާޑް، އެންޑީ ޔާމޮލަންކޯ އަތުން ބައިކޮޅަށް ވަން ގޯލެކެވެ. މެޗުގެ 33 ވަނަ މިނިޓްގައި ވޭލްސްގެ ކެޕްޓަން، ގަރެތު ބޭލް ނެގި ހިލޭޖެހުމެއް ޑިފެންސްކުރަން ޔާމޮލަންކޯ ބޮލުން ޖައްސާލި ބޯޅަ ވަނީ ބައިކޮޅަށެވެ.
ގިނަ ގޮތްގޮތުން ގޯލެއް ޖެހޭތޯ ޔޫކްރެއިނުން މަސައްކަތް ކުރި ނަމަވެސް ވޭލްސް ފެނުނީ ވަރަށް އޮގަނައިޒްކޮށެވެ. ވޭލްސް ޑިފެންޑަރުން ވަނީ ޔޫކްރެއިންގެ ހުރިހާ އެޓޭކްތަކެއް ހުއްޓުވުމުގައި ކާމިޔާބު ހޯދައިފައެވެ. މިއީ ވޭލްސް ވޯލްޑް ކަޕަށް ކޮލިފައިވި ދެވަނަ ފަހަރެވެ. މެޗަށް ފަހު ޓީމުގެ ކެޕްޓަން ބޭލް ބުނީ، މިއީ ވޭލްސްގެ ފުޓުބޯޅަ ތާރީހުގައި ވެސް ހޯދުނު އެންމެ ބޮޑު ކާމިޔާބީ ކަމަށާއި، މިއީ އޭނާ ގައުމީ ޓީމަށް ކުޅެން ފެށީއްސުރެން ވެސް ދެކެމުން އައި ހުވަފެނެއް ކަމަށެވެ.
ވޭލްސް އެންމެ ފަހުން ވޯލްޑް ކަޕެއްގައި ވާދަކުރީ 1958 ވަނަ އަހަރުއެވެ. އެއަށް ފަހު ފުރަތަމަ ފަހަރަށް އެޓީމު ބޮޑު މުބާރާތެއްގައި ކުޅެފައި ވަނީ 2016 ވަނަ އަހަރު، ޔޫރޯ ފުޓުބޯޅަ މުބާރާތުގަ އެވެ. އެއީ ޔޫރޯ މުބާރާތުގައި ވެސް ވޭލްސް ކުޅުނު ފުރަތަމަ ފަހަރެވެ.
