ދ. މާއެނބޫދޫގައި މި އަހަރުގެ ބޮޑުއީދު ވަރަށް ކުލަގަދަކޮށް ފާހަގަކުރުމަށް ގިނަ އަދަދެއްގެ ފަންނާނުން އެ ރަށަށް ގެންދާ ގޮތަށް ހަމަޖައްސައިފިއެވެ.
މުޅި މާއެނބޫދޫގެ ރައްޔިތުންވެސް ވަނީ ކުރިއަށް އޮތް ބޮޑު އީދު ވީހާވެސް ކުލަގަދަކޮށް ފާހަގަކުރުމަށް ތައްޔާރުވާން ފަށާފައެވެ. މިކަމުގައި އެރަށުގެ ކައުންސިލާއި، ރަށުގެ ޖަމްއިއްޔާތަކުން ދަނީ އިސްދައުރެއް އަދާ ކުރަމުންނެވެ.
ބޮޑުއީދުގެ ހަރަކާތްތަކާއި ގުޅޭގޮތުން އެރަށު ކައުންސިލުން ވިދާޅުވީ މި އަހަރުގެ އީދަކީ މަޖާ، ކުޅިވަރުތައް ގިނަ، އަދި ފުރިހަމަ އީދަކަށް ހެދުމަށް ޓަކައި އެ ރަށުގެ ކުދިބޮޑު އެންމެން ޝާމިލުވާ ގޮތަށް މަސައްކަތް ފަށާފައިވާ ކަމަށެވެ. އެރަށަކީ މީގެކުރިން ލަނގިރި ޖެހުމާއި، ތާރަޖެހުން އަދި ބަނޑިޔާޖެހުން ފަދަ ފޯރި ގަދަ ސަގާފީ ހަރަކާތްތަައް ކޮންމެ އަހަރަކުވެސް ކުރިއަށް ގެންދާ ރަށެއް ކަމަށާއި، އެ ސަގާފަތްތައް އާލާކޮށް ދިރުވުމަށްޓަކައި މިއަހަރު ކްލަބް ޖަމިއްޔާތަކާއި، ޒުވާނުން އަަދި އިސް ރަށްވެހިން ގުޅިގެން އެ ހަރަކާތްތައް ކުރިއަށް ގެންދިއުމަށް ނިންމާފައިވާ ކަމަށް ކައުންސިލް ވަނީ ބުނެފައެވެ.
މާއެނބޫދޫގައި މިފަހަރު ބޭއްވުމަށް ތައްޔާރުވަމުން އަންނަ މިއުޒިކް ޝޯވްގައި ޓިކްޓޮކްއިން އަދި ފިލްމީ ދާއިރާއިން މަޝްހޫރުކަން ހޯދާފައިވާ ބައެއް ފަންނާނުން ބައިވެރިވާނެއެވެ. އެގިތުން ޖާދުއާއި، ޓިކްޓޮކް އަދި ބައެއް ފިލްމުތަކުން މަަޝްހޫރުކަން ހޯދާފައިވާ ޝިފާ އާއި ރޯމަންވެސް ޝޯވްތަކުން ފެނިގެންދާނެއެވެ.
މާއެނބޫދޫގައި މިއަހަރުގެ ބޮޑު އީދުގައި އީދު ވެދުމާ ދިއުން، މަސް ރޭސް، ފިރިހެނުންގެ ލަނގިރި/ދަފި، ބޮޑުމަސް ބޭނުން، ފުޓްބޯޅަ މުބާރާތް، ފިރިހެން ވޮލީ މުބާރާތް، އަންހެން/ފިރިހެން މިޔުޒިކް ދެ ޝޯ، މާލެއިން މާއެނބޫދޫއަށް ދާ ލަވަކިޔުންތެރީން ބަނޑިޔާޖެހުން ރައްޔިތުންގެ އީދު ބޮޑު ސައި، ކުޑަކުދީންގެ ހަވީރު، އީދާއި ކުލަމަޖާ ފަދަ ހަރަކާތްތައް ހިމެނެއެވެ.
