ކޮލަމްބިއާގައި ވަކި ވެގަތުމަށް ހަގުރާމަ ކުރި ގެރިއްލާ ޖަމާއަތެއް ކަމުގައިވާ M-19 ގެރިއްލާ ހަރަކާތުގެ ކުރީގެ މެމްބަރެއް ކަމުގައިވާ، އުމުރުން 62 އަހަރުގެ ގަސްޓަވޯ ޕެޓްރޯ، އެގައުމުގެ ރިޔާސީ އިންތިޚާބުގެ ދެވަނަ ބުރަށް ދަތުރު ކޮށްފިއެވެ.
އަންނަ މަހުގެ 19ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ދެވަނަ ބުރުގައި ޕެޓްރޯ ވާދަކުރުމަށް ހަމަޖެހިފައިވަނީ އެގައުމުގެ މަޝްހޫރު ވިޔަފާރި ވެރިއެއް ކަމުގައިވާ ރޮޑޮލްފް ހާރނަންޑޭޒްއާއެވެ.
ކޮލަންބިއާގައި ބޭއްވުނު، ރިޔާސީ އިންތިޚާބުގެ ފުރަތަމަ ބުރުގެ ވޯޓުގެ 99.9 އިންސައްތަ ވޯޓު ގުނާ ނިމިފައިވާއިރު، ކުރީގެ ގެއްރިއްލާ ހަގުރާމަވެރިޔާ ޕެޓްރޯ 40.3 އިންސައްތަ ލިބިފައިވާކަމަށް ވަނީ ނަތިޖާއިން ދައްކާފައެވެ.
އުމުރުން 70ގެ އަހަރުތަކުގައި އުޅޭ، ކޮލަމްބިއާގެ މަޝްހޫރު ރިއަލް އެސްޓޭޓް ވިޔަފާރި ވެރިއެއް ކަމުގައިވާ ހާރނަންޑޭޒް ދެވަނަ ބުރުން ޖާގަ ކަށަވަރު ކޮށްފައިވަނީ 28.1 އިންސައްތަ ވޯޓު ކާމިޔާބު ކުރައްވައިގެންނެވެ. އޭނާއަށް ލިބިގެންދިޔަ މި ނަތިޖާ ވެގެންދިޔައީ ގިނަ ބަޔަކަށް ހައިރާންކަން ގެނުވި ނަތިޖާއަކަށެވެ.
ފުރަތަމަ ބުރުގެ ވޯޓުގެ ކުރިން ނެގިފައިވާ ސާވޭތަކުން ދައްކާފައި ވާގޮތުގައި، މިއިންތިޚާބުގެ ފުރަތަމަ ބުރުގައި 3 ވަނައަށްދިޔަ ފެޑްރިކޯ ގުޓަރޭޒްގެ ތާއީދު މިހާރު ހޯއްދަވާފައިވާ ހާރނަންޑޭޒް ރަން އޮފްގައި އުޅޭނީ ޕެޓްރޯއަށްވުރެ ކުޑަ ތަފާތަކުން ފަހަތުގައެވެ.
ކޮލަމްބިއާގެ ވެރިރަށް ކަމުގައިވާ ބޮގޮޓާގެ މޭޔަރުކަންވެސް ކުރައްވާފައިވާ ޕެޓްރޯ އުޅެމުންދަނީ ހުރިހާ އޮޕީނިއަން ޕޯލްތަކެއްގައިވެސް ހާރނަންޑޭޒްއަށްވުރެ ކުރީގައެވެ. އޭނާ ވައުދުވަމުންދަނީ ޕެންޝަންގެ ފައިސާ މިހާރަށްވުރެ ފައިދާ ބޮޑުކޮށް ބަހައި ދޭނެކަމަށާއި، ހިލޭ ތައުލީމު ދޭނެ ޔުނިވަރސިޓީތައް އުފައްދަވާނޭ ކަމުގައެވެ. އަދި އޭނާ ވިދާޅުވަމުން ގެންދަވަނި އެތައް ގަރުނެއް ވަންދެން ކޮލަމްބިއާގައި އޮތް ތަފާތުކުރުންތައް ނަތައްވާލައްވާނޭ ކަމުގައެވެ.
ކޮމެންޓު ފޮނުވާ