ޕީޕީއެމް އިސްވެ އޮވެ ހިންގަމުންދާ އިންޑިއާ އައުޓު ހަރަކާތާއި ދެކޮޅަށް ހިންގަމުންދާ އެކިއެކި ކެމްޕޭންތަކަށް ތާއީދު ނެތްކަން މިދަނީ ވަރަށް ރަގަޅަށް ހާމަ ވަމުން ކަމުގައި، ކުރީގެ ރައީސް އަބުދުﷲ ޔާމިން ވިދާޅުވެއްޖެއެވެ.
ރައީސް ޔާމިން މިއަދު ކުރެއްވި ޓުވީޓެއްގައި ވިދާޅުވެފައިވަނީ، އިންޑިއާ އައުޓު ހަރަކާތަށް ރާއްޖޭގައި އޮތީ އާދަޔާއި ޚިލާފު ބޮޑު ތާއީދެއް ކަމުގައެވެ. އަދި ވިދާޅުވެފައިވަނީ، ޖަދަލު ކުރުމުގެ ގޮތުން ހިނގާ ތާކުންތާކު ނުޖޭ މި ކެމްޕޭންތަކަކީ ފެށުމުގެ ކުރިންވެސް ހާވިޔާވެފައިވާ ކެމްޕޭންތަކެއް ކަމުގައެވެ. އަދި އިންޑިއާ އައުޓް ކެމްޕޭނާއި ދެކޮޅަށް ހިންގަމުންދާ ކެމްޕޭންތަކަށް ރައްޔިތުންގެ ތާއީދެއް ނެތްކަން އެކެމްޕޭންތައް ހިންގާ ފަރާތްތައް ވަރަށް ހިތި ގޮތަކަށް ތަޖުރިބާ ކުރަމުންދާ ކަމުގައިވެސް ރައީސް ޔާމިން ކުރެއްވި ޓުވީޓުގައި ވިދާޅުވެފައި ވެއެވެ.
My country’s focus is singular in its commitment to lndia OUT. Depleted counter campaigns dingoed out before they were christened.A distraught chaperone painfully witnesses the lacklustre support.
— Abdulla Yameen (@prz_ymn) May 27, 2022
ޕީޕީއެމްއިން ކުރިޔަށް ގެންދާ އިންޑިއާ އައުޓު ހަރަކާތަށް ތާއީދެއް ނެތްކަމަށް ވިދާޅުވެ ރައީސް ޔާމިން މިއަދު ޓުވީޓު ކުރައްވާފައި ވާއިރު، އިދިކޮޅު ކޯލިޝަނުން ކުރިއަށް ގެންދާ "އިންޑިއާ އައުޓް" ހަރަކާތާއި ދެކޮޅަށް ވެރިކަން ކުރާ މައި ޕާޓީ އެމްޑީޕީން "ބާކީ ނުވޭ" ނަމުގައި ސޯޝަލް މީޑިއާގައިވަނީ ކެމްޕޭނެއް ފަށާފައެވެ.
މިކެމްޕެއިންގައި އިސްކޮށް ހަރަކާތްތެރިވަނީ އެމްޑީޕީގެ ރައީސް މުހައްމަދު ނަޝީދެވެ. މިކެމްޕެއިންގައި ސަރުކާރަށް ތާއިދު ކުރާ ފަރާތްތަކާއި އަދި ސަރުކާރުގެ ސިޔާސީ މުވައްޒަފުން މީސް މީޑިއާގައި ކެމްޕޭނެއް ފަށައިފައެވެ. އެމްޑީޕީއަށް ނިސްބަތްވާ ރައްޔިތުން މަޖިލީހުގެ މެންބަރުން ވެސް ވަނީ މިކެމްޕޭންގައި ބައިވެރިވާން ފަށާފައެވެ.
އެ މަނިކުފާނު ވިދާޅުވީ، ސިޔާސީ ވެރިން ސިޔާސީ ބޭނުމަށްޓަކައި ދިވެހިން ބާކީވެ، ނިކަމެތި ނުކުރުމަށް ސިޔާސީ އެންމެން ވިސްނަން ޖެހޭނެ ކަމަށެވެ. "އިންޑިއާ އާ ދެކޮޅަށް ހިންގާ ކެމްޕެއިނަކީ ދިވެހިންގެ ތާއީދު އޮތް ކަމެއް ނޫން ކަން ސާބިތު ވަނީ ބައިވެރިވާ މީހުން މަދުކަމުން #ބާކީނުވޭ،" ނަޝީދު ވިދާޅުވިއެވެ.
Siyaasee veringe siyaasee beynumah takai Dhivehin baakeeve nikamethi vaane kankan nukurumah huriha siyaasee verin visnavan vaane. India aai dhekolhah hingaa campaign akee Dhivehinge thaaidhu oiy kameh noon kan saabith vanee ekamugai baiveri vaa meehun madhukamun #Baakeenuvey
— Mohamed Nasheed (@MohamedNasheed) May 26, 2022
ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީގެ ސޯޝަލް މީޑިއާ އެކްޓިވިސްޓުންނާއި ސަރުކާރުގެ ބައެއް ވުޒާރާތަކުގެ ވެރިން އަންނަނީ، ޔާމީންގެ ވެރިކަމުގައި މާލެ އަށް ދިމާވި ފެނުގެ ކާރިސާގައި އިންޑިއާ އިން ދިން އެހީތެރިކަމާއި ކޯވިޑް-19 ގައި ދިން އެހީތަކާއި އަދި ތަރައްގީގެ އެކި މަޝްރޫއުތަކުގެ ފޮޓޯތައް އެ ހޭޝްޓެގާއެކީ ޓުވީޓު ކުރަން ފަށައިފައެވެ.
ރާއްޖޭގައި ތިބި އިންޑިއާ ސިފައިން ރާއްޖެ އިން ބޭލުމަށް ގޮވާލައި އިދިކޮޅު ޕީޕީއެމް އިސްވެ އޮވެ ހިންގާ "އިންޑިއާ އައުޓް" ހަރަކާތް ހުއްޓުވަން ރައީސް ސޯލިހް ވަނީ އޭޕްރީލް މަހުގެ 21 ވަނަ ދުވަހު ރިޔާސީ ގަރާރެއް ނެރުއްވާފައެވެ. އެގަރާރު ނެރުއްވި ފަހުން އިންޑިއާ ސިފައިން ރާއްޖެ އިން ބޭލުމަށް ގޮވާލައި ބެނާއެއް ދެމުން ވެސް ވަނީ ޖިނާއީ ކުށަކަށް ހަދާފައެވެ. ފުލުހުން ގެންދަނީ އިންޑިއާ ސިފައިން ރާއްޖެ އިން ބޭލުމަށް ގޮވާލައި ހަރުކުރާ ބެނާތަކާއި ދިދަތައް ވެސް ނަގަމުންނެވެ.
