ބަރުދަން މައްޗަށްދާތީ ވަރަށް ކަންތަށްބޮޑުވެއެވެ. އެކަމަކު އެކަން ހައްލުކުރުމަށްޓަކައި ކެއުން ހުއްޓާލައިގެން ހުރުމަކީ ކެއްވާވަރު ކަމެއް ނޫނެވެ. ކަސްރަތުކުރުމަކީ ޤަވައިދުން ކުރެވޭ ވަރަށްވުރެ ފޫހި ކަމެކެވެ. އެހެން ކަމަށް ވަނީނަމަ އާއްމު ދިރިއުޅުމުން އެކަމުގެ ހައްލު ހޯދާށެވެ. ބައެއް ކުދިކުދި އާދަތަށް ބަދަލުކޮއްލާށެވެ. ތިރީގައި އެވަނީ ތިމާގެ ކެއުމަށް ބަދަލެއް ނުގެނެސް ޤަވައިދުން ކަސްރަތު ނުކުރިނަމަވެސް ބަރުދަން ލުއި ކޮއްލެވިދާނެ ބައެއް ކަންތަށްތަކެވެ.
- ގިނައިން ފެންބޯށެވެ. ފެނަކީ ހަށިގަނޑަށް އެންމެ މުހިއްމު އެކައްޗެވެ. އަހަރެމެންނަށް ގިނަ ފަހަރަށް ފެންބޮވޭ ގަނޑިއަކީ ކައިނިންމާލުމަށްފަހުގައެވެ. އޭގެ ބަދަލުގައި ކާން ފެށުމުގެ 15 މިނެޓް ނޫނީ 30 މިނެޓް ކުރިން 2 ތަށި ފެން ބޯލާށެވެ. މިކަމުގެ ސަބަބުން ކެވޭ މިންވަރު މަދުވެ އަވަހަށް ބަޑުފުރޭ ކަމުގެ އިހްސާސްވެއެވެ
- ކާގަނޑީގައި އެހެން އެއްވެސް ކަމަކަށް ސަމާލުކަން ނުދީ ގަޔާވެގެން ކާށެވެ. ކާގަނޑީގައި ޓީވީ ބެލުމާއި ފޮތް ކިއުމާއި ވާހަކަ ދެއްކުން ފަދަ އާދަތަށް ގެންގުޅޭނަމަ ކެވޭ މިންވަރު ގިނަވެއެވެ. ދިރިއުޅުމުގެ ހުރިހާ ފިކުރުތަކަކުން ދުރުވެ ކާގަނޑިއަކީ ތިމާއާއި ތިމާގެ ކާއެއްޗެހީގެ ވަގުތަކަށް ހަދާށެވެ.
- ކެއުމަށް ބެނުންކުރާ ތަށި އަދި ސަމްސާ ހިޔާރުކުރާއިރު މާބޮޑެތި އެއްޗެހި ހިޔާރު ނުކުރާށެވެ. ވީހާވެސް ކުޑަ ތައްޓާއި ސަމްސާ ބޭނުންކުރާށެވެ. އޭރުން ތަށި ފުރޭ ވަރަށް އެޅުމުން ގިނަ ކަމަށް އިހުސާސްކުރެވޭނެއެވެ. އެކަމަކު ކެވޭވަރު މަދުވާނެއެވެ. އަދި ކުޑަ ސަމްސަލަކުން ލަސްލަހުން ކެއުމުން ގިނަ އިރު އެހެން އިންނަން ޖެހުމުން ވަރަށް ގިނައިން ކެވޭކަމުގެ އިހުސާސްކުރެވޭނެއެވެ.
- ހިކެން ބޭނުންނަމަ ގިނައިން ނިދާށެވެ. މިއީ ވަރަށް އާދަޔާ ހިލާފަ ނުކުތާއެއްގެ ގޮތުގައި ހީވެދާނެއެވެ. އެހެން ނަމަވެސް ނިދާ ވަގުތަކީ ހަށިގަނޑުގައި އުފެދޭ ކެލެރީސް ނައްތާލާ ވަގުތެކެވެ. އަދި ނިދުމުން ބޭކާރު އެއްޗެހި ކެއުމަށް ލިބޭ ވަގުތުތަށް މަދުވެއެވެ.
- ފިނީގައި ނިދާށެވެ. ނެޝަނަލް އިސްޓިޓިއުޓް އޮފް ހެލްތު އިން ހަދާފައިވާ ރިސާރޗަކުން ދައްކާ ގޮތުގައި 19 ޑިގްރީ ސެލްސިއަށްގެ ފިނިހޫނު މިނުގައި ނިދުމަކީ ހަށިގަނޑުގައި އުފެދޭ ފެޓްސްގެ ބައި ނައްތާލުމަށް ވަރަށްބޮޑު އެހީއެކެވެ.
- ކެއުމުގެ ތެރެއަށް ބައެއް ކާތަކެތި އިތުރުކޮއްލާށެވެ. މިއީ ވަރަށް އުފާވެރި ޙަބަރެކެވެ. ކާތަކެތި މަދުކުރުމުގެ ބަދަލުގައި ބިސް ، ބަދަން، އޮލިވް އޮއިލް ، ހޮޓް ޕެޕާ އަދި ގުރީން ޓީ އިތުރުކޮއްލާށެވެ. ކެއުމުގެ ތެރޭގައި މިތަކެތި ހިމަނާލުމުން އަވަސް އަވަހަށް ބަޑުހައިވުމުން ދުރުކޮއްދީ ކާހިތްވުން ކުޑަކޮއްދެއެވެ.
- ފޮނިކާތަކެތި ކާހިތްވާނަމަ ދުވަހުގެ ކުރީކޮޅުގައި ކާލާށެވެ. ބިސްކޯދު، ކޭކު ފަދަ ތަކެއްޗަކީ ވަރަށް ގިނަ ފަހަރަށް އެއާ ނުލައި އުޅެން އުދަނގޫ އެއްޗެއްސެވެ. އެތަކެތި ނުކާކަށް ނުބުނާނަމެވެ. އެކަމަކު ކާހިތްވާނަމަ ހެނދުނުގެ ކެއުމުގައި ހިމަނާލާށެވެ. އޭރުން ދުވަހުގެ ބާކީބައިގައި އޭގެން އުފެދޭ ކެލޮރީސް ނައްތާލެވޭނެއެވެ.
- ގިނަ ގިނައިން ދަތް އުގުޅާށެވެ. އާއްމުކޮށް ދެފަހަރު ކޮންމެ މީހަކުވެސް ދަތް އުގުޅައެވެ. އެކަމަކު ކައިނިމިގެން ކޮންމެ ފަހަރަކު ދަތް އުގުޅާލުމުން ދަތުގެ ތެރޭގައި ހުންނަ ކާތަކެތިވެސް އިތުރަށް ހަށިގަނޑުގެ އެތެރެއަށް ދިއުމުން ސަލާމަތްކުރެވޭނެއެވެ.
- ހުނުން އިތުރު ކުރާށެވެ. ހުނުމަކީ ހަށިގަނޑަށް ވަރަށް ބައިވަރު ގޮތްގޮތުން ހެޔޮ އަސަރު ކުރާކަމެކެވެ. މޫނުމަތީގެ ކަސްރަތުގެ އިތުރުން ބަނޑު އަދި ސިކުޑިއާއި ލޭހިނގުމަށްވެސް ދެވޭ ވަރަށްބޮޑު ކަސްތަކެކެވެ. އިންޓަނޭޝަނަލް ޖާރނަލް އޮފް އޮބޭސިޓީ އިން އާއްމުކޮއްފައިވާ ސުޓަޑީއެއްގައިވެސް ވަނީ މިކަން ފާހަގަކޮއްފައެވެ. އާއްމުކޮށް ބަލާ ޝޯއެއްގެ ގޮތުގައި ކޮމެޑީ ޝޯތަށް ހަދާށެވެ.
- ނިދާވަގުތު ނޫން އެހެން ވަގުތު ތަކުގައި ހަށިގަނޑުން ދާހިއްލާނެ ގޮތަށް ހޫނުގައި އުޅޭށެވެ. ހަށިގަނޑުން ދާހިއްލުމަކީވެސް ބަރުދަން ލުއިކުރުމަށް ވަރަށް މުހިއްމު ކަމެކެވެ.
ދިރިއުޅޫމުގެ އާދަތަކުގެ ތެރެއަށް މި ބަޔާން ކުރެވުނު ކަނަތަށްތަށް އިތުރުކޮއްލައިފި މާބޮޑަށް ހަށިގަނޑު ފަލަވިޔަނުދީ އެއްވަރެއްގައި ހިފަހައްޓާލަން ވަރަށް ފަސޭހަވާނެއެވެ.
މީގެ އިތުރުންވެސް ބަރުދަން ލުއިކޮއްލުމަށް ދިރިއުޅުމުގެ އާދަތަކުގެ ތެރެއަށް ހިމަނާލުން ރަގަނޅު ކަމެއް ތިޔައިން ކިއުންތެރިއަކަށް ތަޖުރިބާ ކުރެވިފައިވާނަމަ ކޮމެންޓް މެދުވެރިކޮށް އެހެން ކިއުންތެރިންނާ ހިއްސާކޮއްލާށެވެ.
