ރަޝިއާއިން ގަންނަ ގޭހަށް، ރުބެލްއިން ފައިސާ ނުދައްކައިގެން، ފިންލޭންޑަށް ގޭސް ފޯރުކޮށްދިނުން ރަޝިއާގެ ގޭސް ކުންފުނި ގަޒްޕްރޮމްއިން ހުއްޓާލާއިފިއެވެ.
ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތަކާއި ގުޅިގެން ޔޫރަޕުން އެގައުމާއި ދެކޮޅަށް އަލާފައިވާ އިގްތިސާދީ ގޮތުން ދަތިކުރުމުގެ ފިޔަވަޅުތަކުގެ ސަބަބުން ޔޫރަޕްގެ ގައުމަތަކަށް ފޯރުކޮށްދޭ ގޭހަށް ރަޝިއާގެ ފައިސާ، ރުބެލްއިން ފައިސާ ދެއްކުމަށް ރަޝިއާގެ ގަޒްޕްރޮމް އެކްސްޕޯޓުން ވަނީ ޑިމާންޑް ކޮށްފައެވެ.
އެހެންނަމަވެސް، ފިންލޭންޑުންވަނީ ރަޝިއާގެ ގޭހަށް ރުބެލްއިން ފައިސާ ދެއްކުމަށް ދެކޮޅު ހަދާފައެވެ.
"އިމާޓްރާ ޕޮއިންޓުން އަންނަމުންދިޔަ ގޭސް މިހާރުވަނީ އައުން ހުއްޓިފަ،" ހޮނިހިރު ދުވަހު ނެރެފައިވާ ބަޔާނެއްގައި ގޭސްގްރިޑް ފިންލޭންޑުން ބުނެފައި ވެއެވެ.
އިމާޓްރާއަކީ ރަޝިއާއިން ފިންލޭންޑަށް އަންނަ ގޭސް އެގައުމަށް އެތެރެވާ ޕޮއިންޓެވެ.
ފިންލޭންޑުގެ ގޭސް ހޯލްސޭލްކުރާ ދައުލަތުގެ ކުންފުނި ކަމުގައިވާ ގަސުމްއިން ހުކުރުދުވަހު ބުނެފައިވަނީ، ހޮނިހިރު ދުވަހުގެ ޖީއެމްޓީ ގަޑިން 4:00ގައި ގޭސް ބަންދުކުރާނެކަމުގެ އިންޒާރު ރަޝިއާގެ ގަޒްޕްރޮމްއިން ދީފައި ވާކަމުގައެވެ. އިދި ފަހުން ގަސުމްއިންވަނީ ގޭސް ލިބުން ހުއްޓުމަކަށް އައިސްފައި ވާކަން ޔަގީންވެސް ކޮށްދީފައެވެ.
"ގަސުމްގެ ސަޕްލައި ކޮންޓްރެކްޓްގެ ދަށުން ފިންލޭންޑަށް ފޯރުކޮށްދެމުންއައި ގުދުރަތީ ގޭސް މިހާރުވަނީ ހުއްޓުމަކަށް އައިސްފަ،" ކުންފުނިން ނެރެފައިވާ ބަޔާނުގައި ބުނެފައި ވެއެވެ.
"މިއަދުން ފެށިގެން، ކުރިޔަށް އޮތް ހޫނު މޫސުމުގައިވެސް، ގަސުމްގެ ކަސްޓަމަރުންނަށް ގުދުރަތީ ގޭސް ފޯރުކޮށްދެމުން ދާނީ، ބޯލްޓިކްކަނެކްޓަރ ޕައިޕްލައިނުން މެދުވެރިކޮށް، އެހެން ފަރާތްތަކުން."
ބޯލްޓިކްކަނެކްޓަރ ޕައިޕްލައިނުން ފިންލޭންޑު ގުޅުވައިދީފައި އޮންނަނީ އަވައްޓެރި އެސްޓޯނިއާގެ ގޭސް ގުރިޑާއެވެ.
