ޖަޕާން ސަރުކާރުން ހުޅުމާލޭގައި ހުންނަ ފިޔަވައްޗަށް މިނީ ބަހެއް ހަދިޔާކޮށްފިއެވެ.
ޖަޕާން ސަރުކާރުން ހުޅުމާލޭ ފިޔަވައްޗަށް ހަދިޔާކުރި މި މިނީ ބަހަކީ އެ ޤައުމުން ކުރިއަށްގެންދާ "ގްރާސް ރޫޓްސް ހިއުމަން ސެކިއުރިޓީ ޕްރޮޖެކްޓް" ގެ ދަށުން ހަދިޔާކުރި މިނީ ބަހެކެވެ. މި މިނީ ބަސް ފިޔަވައްޗާއި ހަވާލުކޮށްދެއްވީ ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ޓަކުޗީ މިޑޯރީއެވެ.
މި އެހީގެ މައިގަނޑު މަޤްޞަދަކީ ފިޔަވަތީގައި ތިބޭ ކުދިންނަށް، މިހާރަށްވުރެ ރައްކާތެރި އަދި ހިތްފަސޭހަ ޙާލަތެއްގައި، ފެންވަރު ރަނގަޅު ތަޢުލީމާއި ޞިއްޙީ ޚިދުމަތް ލިބޭނެ މަގު ތަނަވަސްކޮށްދިނުންކަމަށް ރާއްޖޭގައި ހުންނަ ޖަޕާން އެމްބަސީން ވިދާޅުވެއެވެ. ޖަޕާން ސަރުކާރުން ފިޔަވައްޗަށް ހަދިޔާކޮށްފައިވަނީ ޓޮޔޯޓާ ހިއޭސް ކޮމިއުޓާ، 14 ސީޓުގެ ޖާގަ ހިމެނޭ މުޅިން އާ މިނީ ބަހެކެވެ. މިއީ 48،500 އެމެރިކާ ޑޮލަރު ނުވަތަ 727،500 ރުފިޔާގެ އަގުހުރި މިނީ ބަހެކެވެ.
ޖަޕާނުން ކުރިއަށްގެންދާ "ގްރާސް ރޫޓްސް ހިއުމަން ސެކިއުރިޓީ ޕްރޮޖެކްޓް"ގެ ދަށުން އެ ޤައުމުން އަންނަނީ އެކި ދާއިރާތަކުން ރާއްޖެއަށް އެހީތެރިކަން ފޯރުކޮށްދެމުންނެވެ. އެގޮތުން މި ޕްރޮޖެކްޓުގެ ދަށުން ޖަޕާނުން ވަނީ މިއަހަރުގެ ކުރީކޮޅު 8 އެމްބިއުލާންސް ހޯދުމަށް ރާއްޖެއަށް 2.4 މިލިއަން ރުފިޔާގެ އެހީ ދީފައެވެ. އަދި ލ. ގަމު މުކުރިމަގު ސްކޫލުގައި ދެ ކްލާސްރޫމް ހަދަން 1.2 މިލިއަންން ރުފިޔާއާއި، ގއ. ނިލަންދޫ ސްކޫލް ތަރައްޤީކުރުމަށް ޖަޕާނު ސަރުކާރުން 1.2 މިލިއަނަށްވުރެ ގިނަ ރުފިޔާގެ އެހީ ދީފައިވެއެވެ.
