އިޓާލިއަން ކަޕް ސެމީ ފައިނަލްގެ ދެވަނަ ލެގުގައި އޭސީ މިލާން 3-0 އިން ބަލިކޮށް، އިންޓަ މިލާން މުބާރާތުގެ ފައިނަލުން ރޭ ޖާގަ ހޯދައިފިއެވެ.
ފުރަތަމަ ލެގުގައި ދެ ޓީމު ލަނޑެއް ނުޖެހި އެއްވަރުވިއިރު، ދެ ވަނަ މެޗުން މޮޅުވާ ޓީމަކަށް ފައިނަލްގެ ޖާގަ އޮތީ ހުޅުވިފަ އެވެ. އިންޓަ އިން މިރޭ ކުރިހޯދީ މޮޅަށް ކުޅެގެންނެވެ.
މެޗު ފަށައިގެން މާގިނައިރެއް ނުވެ، އިންޓަ އިން ލީޑުނެގިއެވެ. މި ލަނޑު ޖެހީ ރަނގަޅު ފޯމެއްގައި ހުރި އާޖެންޓީނާގެ ފޯވާޑް ލަޓާރޯ މާޓީނޭޒްއެވެ. އިންޓަ އިން ދެ ވަނަ ގޯލު ޖެހުމުގެ ކުރިން ނަތީޖާ ހަމަހަމަކުރަން މިލާނުން ރަނގަޅު ދެ ހަމަލާ ފޮނުވާލިއެވެ. މިލާންގެ ރަފައެލް ލެއާއޯ އާއި އަލެކްސިސް ސަލަމޭކާ ޖެހި ބޯޅަތައް އިންޓަގެ ގޯލްކީޕަރު ސާމިރް ހަންޑަނޯވިޗް ވަނީ މަތަކޮށްފައެވެ. އަދި ފަހުން މިލާންގެ ސަންޑްރޯ ޓޮނާލީ އާއި ފްރޭންކް ކެސިއޭ، އިންޓަ އޭރިއާތެރެއިން ގޯލެއް ޖެހޭތޯ ކުރި މަސައްކަތް ވެސް ކާމިޔާބެއްނުވިއެވެ.
ހާފް ނިމެން ފަސް މިނިޓަށް ވެފައި ވަނިކޮށް މާޓިނޭޒް އިންޓަގެ ލީޑު ފުޅާކޮށްދިނީ ޔަކީން ކޮރޭއާ ދިން ބޯޅައެއް އޭސީ މިލާންގެ ގޯލްކީޕަރު މައިކް މައިނަން ބޯ މަތިން ގޯލަށް ފޮނުވާލައިގެންނެވެ. ދެވަނަ ހާފްގައި އޭސީ މިލާންގެ އިސްމާއިލް ބެނެސާ އެ ޓީމަށް ލަނޑެއް ޖަހައިދިނެވެ. ނަމަވެސް އެ ގޯލް ޖެހި ވަގުތު އޮފްސައިޑުގައި ހުރި ޕިއޭރޭ ކަލޫލޫ ގޯލްކީޕަރަށް ހުރަސްއެޅި ކަމަށް ބަލައި ގޯލު ބަލައި ނުގަންނަން ނިންމީ ވީއޭއާރުގެ އެހީގައެވެ.
އިންޓަ މިލާނުގެ ތިންވަނަ ލަނޑު 82 ވަނަ މިނިޓުގައި ޖަހައިދިނީ ރޮބިން ގޮސެންސް އެވެ. މިއީ މި ސީޒަނުގެ ނިޔަލަށް ލޯނު އުސޫލުން އެޓަލާންޓާ އިން ޖެނުއަރީ ގައި ޓީމާ ގުޅުމަށް، ފަހު ޖަރުމަން ގައުމީ ޓީމަށް ވެސް ވާތްފަޅިން ކުޅޭ ވިންގް ބެކް އެ ޓީމަށް ޖަހައިދިން ފުރަތަމަ ލަނޑެވެ.
ފައިނަލުގައި އިންޓަ ކުޅޭނީ ދެ ވަނަ ސެމީގައި ޔުވެންޓަސް އާއި ފިއޮރެންޓީނާ ތެރެއިން ކުރިހޯދާ ޓީމަކާ ދެކޮޅަށެވެ. ފުރަތަމަ ލެގުގައި ޔުވެންޓަސް ވަނީ 1-0 އިން މޮޅުވެފައެވެ. މުބާރާތުގެ ފައިނަލް އޮންނާނީ އަންނަ މަހު 11 ވަނަ ދުވަހުއެވެ.
