އިނގިރޭސި ޕްރިމިއާ ލީގުގައި ރޭ އާސެނަލްއާއި، ޓޮޓެންހަމް ކުޅުނު މެޗުތަކުން ބަލިވެ، ލީގގެ ގަދަ ހަތަރެއްގެ ފޯރިހަދަ ވެއްޖެއެވެ.
ޓޮޓެންހަމް އަމިއްލަ ދަނޑުގައި ބްރައިޓަން އަތުން ބަލިވީ 1-0 އިންނެވެ. ބްރައިޓަންގެ ހަމައެކަނި ލަނޑު 90 ވަނަ މިނިޓުގައި ޖަހައިދިނީ ލިއަންޑްރޯ ޓޮރޮސާޑްއެވެ. ރަށުން ބޭރުގައި އާސެނަލް ވެސް ރޭ ބަލިވީ ހަމަ މި ނަތީޖާއިންނެވެ. ސައުތެމްޓަންއާ ދެކޮޅަށް އާސެނަލް ކުޅުނު މެޗުގެ 44 ވަނަ މިނިޓުގައި ސައުތެމްޓަންގެ ލަނޑު ޖަހައިދިނީ ޔާން ބެނަރެކްއެވެ.
ޓޮޓެންހަމް ހަތަރު ވަނާގައި އޮތީ 32 މެޗުން 57 ޕޮއިންޓާއެކުއެވެ. އާސެނަލް އޮތީ ތާވަލުގެ ފަސް ވަނާގައި 54 ޕޮއިންޓު ލިބިގެންނެވެ. ރޮނާލްޑޯގެ ހެޓްރިކުން މޮޅުވި މެޗެސްޓަރ ޔުނައިޓެޑް އޮތީ 32 މެޗު ކުޅެގެން ލިބުނު 54 ޕޮއިންޓާއެކު ތާވަލުގެ ފަސްވަނާގައެވެ. މެންޗެސްޓައަށް ފަސްވަނައިގެ ކުރި ލިބެނީ ގޯލުގެ ތަފާތުންނެވެ.
މެޗުން މޮޅުވެގެން ސައުތެމްޓަން، ލީގުގެ 12 ވަނައަށް ޖެހިލިއިރު، 11 ވަނައިގައި އޮތީ ރޭ 2-1 އިން ވަޓްފޯޑް ބަލިކުރި ބްރެންޓްފޯޑެވެ. ބްރެންޓްފޯޑާއި ސައުތެމްޓަނަށް ވެސް ވަނީ 39 ޕޮއިންޓް ލިބިފައެވެ. އަދި ޓޮޓެންހަމް ބަލިކުރި ބްރައިޓަން ވަނީ ނުވަވަނައިގައި އޮތް ލެސްޓާ ސިޓީއާ އެއްވަރަށް، 40 ޕޮއިންޓް ހަމަކޮށްގެން 10 ވަނައަށް ޖެހިލައިފައެވެ.
