އިނގިރޭސި ޕްރިމިއާ ލީގުގެ ގަދަ ހަތަރެއްގެ ރޭހުގައި އޮތް މެންޗެސްޓާ ޔުނައިޓެޑް 1-0 އިން ބަލިކޮށް ރެލިގޭޝަނުން އަރައިގަންނަން މަސައްކަތް ކުރަމުން އަންނަ އެވަޓަން އިން މުހިންމު ތިން ޕޮއިންޓު މެންޗެސްޓަރ ޔުނިއިޓެޑް އަތުން ހޯދައިފިއެވެ.
އެވަޓަންގެ ހޯމް ސްޓޭޑިއަމް، ގޫޑިސަން ޕާކުގައި ކުޅުނު މެޗުގައި އެވަޓަންގެ ލަނޑު ޖެހީ އެންތޮނީ ގޯޑަންއެވެ. އެއީ އޭނާ ޖެހި އެންމެ ރީތި ލަނޑަށް ނުވެދާނެއެވެ. ނަމަވެސް އެއީ އެވަޓަންގެ އެކަޑަމީން އުފެއްދި އެޓޭކިން މިޑްފީލްޑަރު ޖެހި އެންމެ މުހިންމު ލަނޑަށް ވާނެއެވެ.
ލީގުގެ ގަދަ ހަތަރެއްގައި ނިންމައި، އަންނަ ސީޒަނުގެ ޗެމްޕިއަންސް ލީގަށް ކޮލިފައިވުމުގެ އުންމީދުގައި މަސައްކަތް ކުރަމުން އައި ޔުނައިޓެޑް ރޭ އެވަޓަން ދަނޑުގައި ބަލިވުމުން ވަނީ ހާސްކަން ކުރިމަތިވެފައެވެ.
ރޭގެ މެޗަށް އައިއިރު، ލަމްޕާޑްގެ ކޯޗުކަމުގައި ލީގުގައި އެވަޓަން ކުޅުނު 12 މެޗުގެ ތެރެއިން އަށް މެޗުން ވަނީ ބަލިވެފައެވެ. އެންމެ ފަހުން ލީގުގައި އެވަޓަން އިން ކުޅުނު ހަތް މެޗުގެ ތެރެއިން ހަ މެޗުން ބަލިވިއިރު، މި ހަފްތާގައި ބާންލީގެ އަތްދަށުވީ އެވަޓަން ލީޑުގައި އޮއްވައި ބާންލީ ފަހަތުން އަރައި ޖެހި ގޯލުތަކުން 3-2 އިންނެވެ. އެ ނަތީޖާ ހަނދާން ނައްތާލަން މިރޭގެ މެޗުން މޮޅުވާން އެވަޓަން އަށް އޮތީ މަޖުބޫރުވެފައެވެ.
ޖެހިޖެހިގެން ލީގުގައި އަމިއްލަ ދަނޑުގައި ހޯދި ދެ ވަނަ މޮޅާ އެކު އެވަޓަން ލީގުގެ 17 ވަނައިގައި އޮތީ 30 މެޗުން 28 ޕޮއިންޓާ އެކުއެވެ. މެންޗެސްޓަރ ޔުނައިޓެޑް އޮތީ 51 ޕޮއިންޓާއިއެކު 7 ވަނައިގައެވެ.
