ޕާކިސްތާންގެ ބޮޑު ވަޒީރު އިމްރާން ޚާން މަގާމުން ދުރުކުރުމަށް އިދިކޮޅު ފަރާތްތަކުން މަޖިލީހަށް ހުށަހަޅާފައިވާ ނޯ ކޮންފިޑެންސް މޯޝަނާމެދު ގޮތެއް ނިންމުމަށް ބާއްވާ ގާނޫނު ހަދާ މަޖިލިހުގެ ޖަލްސާ ފަށައިފިއެވެ.
މި ޖަލްސާގައި، ޕާކިސްތާންގެ ގާނޫނު ހަދާ މަޖިލިހުގެ ނާއިބު ރައީސްވަނީ، ނޯ ކޮންފިޑެންސް މޯޝަން މަޖިލީހުން ބޭރު ކޮށްލި ކޮށްލުން ދިފާއު ކުރައްވާ ވާހަކަ ދައްކަވާފައެވެ.
"ދައުލަތާ ދެކޮޅަށް ދެވޭ ހަމަލާތައް ހަނދާން ނައްތާލެވޭނީ ކިހިނެއް؟" ޕާކިސްތާންގެ ޖިއޯ ޓީވީގައި ވާހަކަ ދައްކަވަމުން ގާނޫނުހަދާ މަޖިލިހުގެ ނާއިބު ރައީސް ޤާސިމް ސޫރީ ވިދާޅުވެފައި ވެއެވެ. އޭނާ ވިދާޅުވެފައިވަނީ، އިތުބާރު ނެތްކަމުގެ މައްސަލަ އޭނާ އިސްވެހުރެ މަޖިލިން ބޭރު ކޮށްލި ކޮށްލުމަކީ ގާނޫނު އަސާސިއާއި ފުށުއަރާ ކަމެއް ނޫން ކަމުގައެވެ. ޕާކިސްތާންގެ ސުޕްރީމް ކޯޓުންވަނީ، އިތުބާރު ނެތްކަމުގެ މައްސަލަ މަޖިލީހުން ބަލައި ނުގަތީ ގާނޫނު އަސާސީއާއި ޚިލާފަށްކަމަށް ނިންމާ ގާނޫނުހަދާ މަޖިލިސް ބޭއްވުމަށް އަމުރު ކޮށްފައެވެ.
އިމްރާން ޚާންގެ އިތުބާރު ނެތްކަމުގެ މައްސަލަ ކުރިޔަށް ގެންދިއުމަށް ބޭއްވެމުންދާ މިއަދުގެ ޖަލްސާއަށް އިމްރާން ޚާންގެ ޕާޓީންވަނީ، އޭނާ މަގާމުން ދުރުކުރުމަށް ބޭރުގެ ގައުމުތަކާ ގުޅިގެން މަސައްކަތް ކުރެވެމުންދާކަން ސާބިތުކޮށް ދިނުމަށްޓަކާ ސިޓީއެއް މަޖިލީހަށް ހުހަޅުއްވާފައެވެ.
އަދި އިމްރާން ޚާންގެ ޕާޓީއިން ބޭނުންވަނީ މި ވޯޓުގެ ކުރިން، ބޭރުގެ ދައުލަތަކާއި ގުޅިގެން ޕާކިސްތާންގެ ވެރިކަން ބަދަލު ކޮށްލުމަށް ކުރެވެމުންދާ މަސައްކަތް ތަހުގީގު ކުރުމަށެވެ. އިމްރާން ޚާން ތުހުމަތު ކުރަމުންދަނީ އޭނާގެ ވެރިކަން ބަދަލު ކޮށްލުމުގެ ފަހަތުގައި އެމެރިކާ އޮތްކަމުގައެވެ.
އެހެންނަމަވެސް މަޖިލިހަށް ހުށަހެޅިފައިވާ މައްސަލަ ކުރިޔަށް ގެންދިއުމަށް ގޮވާލާ، އިދިކޮޅު މެމްބަރުން ދަނީ ގާނޫނުހަދާ މަޖިލިހުގައި އިހުތިޖާޖު ކުރަމުންނެވެ.
