ޕާކިސްތާނުގެ ބޮޑުވަޒީރު އިމްރާން ޚާންގެ އިތުބާރު އޮތްތޯ ބެލުމަށް ގާނޫނު ހަދާ މަޖިލިހަށް ހުށެހެޅުނު ވޯޓު ބޭރުކޮށް، އަދި ގާނޫނުހަދާ މަޖިލިސް އުވާލާފައިވަނީ ގާނޫނު އަސާސީއާއި ޚިލާފަށްކަމަށް ޕާކިސްތާނުގެ ސުޕްރީމް ކޯޓުން ހުކުމް ކޮށްފިއެވެ.
ސުޕްރީމް ކޯޓުން ކުރި ހުކުމްގައިވަނީ، މި ވޯޓު ގާނޫނު ހަދާ މަޖިލަށް ބަލައި ނުގަނެ، އަދި އެއަށްފަހު އެގައުމުގެ ގާނޫނު ހަދާ މަޖިލިސް އުވާލާފައިވަނި ގާނޫނު އަސާސީއާއި ޚިލާފަށް ކަމަށް ނިންމާ، ގާނޫނުހަދާ މަޖިލިސް އަލުން އެއްކުރުމަށްވެސް އަމުރު ކޮށްފައެވެ.
މި މައްސަލާގައި ސުޕްރިމް ކޯޓުން ހުކުމް ކޮށްފައ މިވަނީ، 4 ދުވަސް ވަންދެން ބޭއްވުނު އަޑު އެހުންތަކަށް ފަހުއެވެ. ސުޕްރިމް ކޯޓުގެ މި ހުކުމާއެކު، އިމްރާން ޚާން އުވާލި ގާނޫނު ހަދާ މަޖިލިހުން އެއްވެ އޭނާއާއި ދެކޮޅަށް ވޯޓު ދޭނެއެވެ. އަދި ބެލެވޭ ގޮތުގައި އޭނާ މަގާމުން ދުރު ކުރެވޭވަރަށް އިދިކޮޅު ފަރާތްތަކުން ގާނޫނުހަދާ މަޖިލިހުގައިވަނީ ވޯޓު ހަމަ ކޮށްފައެވެ.
ބެލެވޭ ގޮތުގައި، ސުޕްރިމް ކޯޓުގެ ހުކުމާއެކު، އިތުބާރު ނެތްކަމުގެ ވޯޓު ނެގުން އަންނަ ހޮނިހިރު ދުވަހު އޮންނާނެއެވެ.
އިމްރާން ޚާން މަގާމުން ދުރުކުރުމަށް އޭނާގެ ޕާޓީގެ ބައެއް މެމްބަރުންގެ ތާއީދާވެސް އެކީ، ޕާކިސްތާނުގެ ގާނޫނުހަދާ މަޖިލިހަށް ހުށަހަޅާފައިވާ އިތުބާރު ނެތްކަމުގެ ވޯޓާއެކު، ޕާކިސްތާންވަނީ ސިޔާސީ ކާރިސާއަކާއި ކުރިމަތިލާފައެވެ. އިމްރާން ޚާން ތުހުމަތު ކުރަމުންދަނީ، އޭނާ މަގާމުން ދުރުކުރުމަށް ގާނޫނުހަދާ މަޖިލިހުގައި ކުރިޔަށް ދާ މަސައްކަތްތަކަކީ، ބޭރުގެ ދައުލަތްތައް އަޑީގައި އޮވެގެން ހިންގާ ބަޢާވާތުގެ އަމަލެތަކެއްކަމުގައެވެ.
އިމްރާން ޚާންގެ ޕާޓީން ހަދާފައިވާ ކޯލިޝަންގެ މެމްބަރުންނާއި، އަދި ޚިޔާލު ތަފާތުވެ ޕާޓީއާއި ދުރައް ގޮސްފައިވާ މެމްބަރުންނާއި ނުލާ، މަގާމްގައި ދެމި ހުރުމަށްޓަކާ ގާނޫނުހަދާ މަޖިލިހުގައި އިމްރާން ޚާންއަށް ބޭނުންވާ 172 ވޯޓު އޭނާގެ ޕާޓީއަށް ހަމައެއް ނުކުރެވެއެވެ. ގާނޫނުހަދާ މަޖިލިހުގައި އިމްރާން ޚާންގެ ޕާޓީއަށް އެކަނި ލިބިފައިވަނީ 155 ގޮނޑިއެވެ.
އިމްރާން ޚާންއާއި ޚިޔާލުތަފާތުވެ، އެޕާޓީގެ 17 މެމްބަރަކުވަނީ އިދިކޮޅު ފަރާތްތަކާއި ގުޅިވަޑައިގެންފައެވެ.
ޕާކިސްތާނުގެ ގާނޫނުހަދާ މަޖިލިހުގައި އިދިކޮޅު އިއްތިހާދަށް ހަމަ ކުރެވިފައިވަނީ ޖުމްލަ 163 ގޮނޑިއެވެ. އެހެންނަމަވެސް އިމްރާން ޚާންގެ ޕާޓީއާއި ޚިޔާލު ތަފާތު ވެފައިވާ މެމްބަރުންގެ ތާއީދާއެކީ، އިދިކޮޅު އިންތިހާދަށް އިމްރާން ޚާންއާއި ދެކޮޅަށް ގޮޑިތަށް ހަމަ ކުރުމުގެ ފުރުސަތު ބޮޑެވެ.
އިދިކޮޅު ފަރާތްތަކުން ބުނަމުންދަނީ އިމްރާން ޚާން އެގައުމުގެ އިގްތިސާދާއި ޚާރިޖީ ސިޔާސަތު އޮޅުންބޮޅުން ކޮށްފައިވާ ކަމުގައެވެ.
ޕާކިސްތާންގެ ސިޔާސި މަސްރހު ހަލަބޮލި ވެގެން ގޮސްފައިވާއިރު، އެގައުމުގެ ބާރުގަދަ އަސްކަރިއްޔާއިން ބުނެފައިވަނީ، ސިޔާސީ މަސްރަހުގައި ހިގާ ކަންކަމާ އަސްކަރިއްޔާއިން ނުބެހޭނެ ކަމުގައެވެ.
