ފައިސާވެރިން އެ މީހުންގެ ހަޔާތުގެ ބައިވެރިޔާއަށް މަކަރު ހަދައި ބޭވަފާތެރިވުން، މަދުން ފައިސާ ލިބޭ މީހުންނާ އަޅާބަލާއިރު އިތުރު ކަމަށާއި، މީގެ ތެރޭގައި ގިނައީ މުއްސަނދި ފިރިހެނުން ކަމަށް ދިރާސާއެއްގައި ބުނެފިއެވެ.
އިނގިރޭސި ވިލާތުގެ ޑޭޓިން ސައިޓަކުން އެއްކުރި މައުލޫމާތުތަކުން ހާމަވި ގޮތުގައި މީހުންނާ ކައިވެނި ކޮށްގެން އުޅޭ މީހުންގެ ތެރެއިން އޮންލައިންކޮށް ލޯބިވެރިން ހޯދަން މަސައްކަތްކުރާ ގިނަ މީހުންނަކީ ޕްރޮފެޝަނަލް މަސައްކަތްތެރިންނެވެ. އަދި މިގޮތަށް ސިއްރު ލޯބިވެރިން ހޯދަން އުޅޭ މީހުންގެ އަދަދު ކޮންމެ އަހަރަކު 8 އިންސައްތަ އިތުރުވަމުންދާ ކަމަށް ވެސް މި ހޯދުމުގައި ވަނީ ބުނެފައެވެ.
މި ދިރާސާއިން ދައްކާ ގޮތުގައި މި ޑޭޓިން ސައިޓްގައި މެމްބަރުންނަށް ވެެފައިވާ މީހުންގެ ތެރެއިން 45 އިންސައްތައަކީ ސިއްރު ލޯބިވެރިން ގެންގުޅޭ މީހުންނެވެ. އަދި ގިނަ މީހުން މިގޮތަށް ގުޅެނީ އޮފީހުގައި އެކުގައި މަސައްކަތް ކުރާ މީހުންނާ ކަމަށް ވެސް ދިރާސާއިން ދައްކައެވެ.
މި ވެބްސައިޓުން ކުރި ސިލްސިލާ ސާވޭތަކެއްގެ ނަތީޖާ ދެއްކި ގޮތުން އެ ވެބްސައިޓްގެ މެމްބަރުންގެ ގޮތުގައި ތިބި މީހުންގެ 1 އިންސައްތައަކީ އަހަރަކު އެއް މިލިއަން ޕައުންޑަށް ވުރެ ގިނައިން ލިބޭ މީހުންނެވެ. މި މީހުންގެ ތެރެއިން 29 އިންސައްތަ މީހުން ބުނެފައިވަނީ އެމީހުން ހަފުތާއަކު 60 ގަޑިއިރު މަސައްކަތް ކުރާ ކަމަށެވެ. އަދި 34 އިންސައްތަ މީހުން ބުނީ އެމީހުން މަސައްކަތް ކުރަނީ ހަފުތާއަކު 40 ގަޑިއިރު ކަމަށެވެ. ހަފުތާއަަކު 80 ގަޑިއިރު މަސައްކަތްކުރާ ކަމަށް 20 އިންސައްތަ މީހުން ބުނެފައި ވެއެވެ.
