ބޮލީވުޑްގެ ތަރިންގެ ރީތިކަމަށް ބަލާއިރު، ކަރީނާ ކަޕޫރު ޚާނަކީ ރީތިކަމުގެ ލިސްޓުގައި ނުހިމެނި ނުދާނެ ބަތަލާއެކެވެ.
އޭނާގެ އޮމާން ހަންގަނޑާއި، މަޑު ފިޔާތޮށިކުލައިގެ ތުންފަތަކީ އެތައް އަންހެން ކުދިންނެއް ހަސަދަވެރިވާ ސިފަތަކެކެވެ.
އެ ރީތިކަމުގެ ބޮޑުބަޔަކީ ޤުދުރަތީ ރީތިކަން ކަމުގައި ވިޔަސް، ކަރީނާއަކީ ވެސް އެހެން ތަރިންނެކޭ އެއްފަދައިން އޭނާގެ ރީތިކަން ދެމެހެއްޓުމަށް މަސައްކަތްކުރާ މީހެކެވެ.
މިފަހަރު މި ކިޔައިދެނީ، ކަރީނާގެ މަޑު އަދި އޮމާން ހަންގަނޑުގެ ސިއްރުތައް ކަމަށް އޭނާ ބުނާ ކަންތައްތަކެވެ.
- ގިނަގިނައިން ފެނާއި ކުރުނބާފެން ބުއިން، ކަރީނާ ބުނަނީ އޭރުން ހަންގަނޑުގައި ހުންނަ ޓޮކްސިންސްތައް ނައްތާލައި، އޮމާންކޮށްދޭނެ ކަމަށެވެ.
- މޫނު މަސާޖު ކުރުމަށް ކަރީނާ ބޭނުންކުރަނީ ރޯ މާމުއި ކަމަށް އޭނާ ބުނެއެވެ. އަދި އެއީ އަބަދުވެސް އޭނާގެ ހަންގަނޑުގެ އެންމެ ގާތް އެކުވެރިޔާ ކަމަށް ވެސް ބުނެއެވެ.
- ޕްލެއިން ޔޯގަޓާއި ޒައިތޫނިތެޔޮ (ކޮންމެ އެއްޗަކުން އެއް ސަމުސާ) އެއްކޮށްފައި މޫނުގައި ހޭކުމަކީ ކަރީނާއަށް އޭނާގެ މަންމަ ބަބީތާގެ ފަރާތުން ދަސްވި އުކުޅެކެވެ.
- ކަރީނާ މޫނު ދޮންނަނީ ދުވާލަކު ދެފަހަރު، އަދި އަބަދުވެސް މޫނުގެ ހަންގަނޑު ބަހައްޓަނީ މޮއިސްޗަރައިޒް ކޮށްފައި ކަމަށް ބުނެއެވެ.
- ކެމިކަލް އެކުލެވޭ އެއްވެސް ޕްރޮޑަކްޓެއް ކަރީނާ މޫނުގައި ބޭނުމެއް ނުކުރެއެވެ. އޭގެ ބަދަލުގައި ބޭނުންކުރަނީ ގޭގައި ތައްޔާރުކުރާ ފޭސް މާސްކާއި ޕެކްތަކެވެ.
ކޮންމެ މީހަކުވެސް، އެމީހެއްގެ ހަންގަނޑަށް ރަނގަޅަށް ފަރުވާތެރިވާނަމަ، ބިހި ނެގުމާއި ތެޔޮވުން އަދި ކުރަކިވުން ފަދަ މައްސަލަތަކުން ސަލާމަތްވާނެއެވެ.
