ކޮންމެ ކުއްޖެގެވެސް އެންމެބޮޑު އެއް ހުވަފެނަކަށް ވާނީ ތިމާގެ އަމިއްލަ މައިންބަފައިންގެ ފަރާތުން ލިބޭ ރައްކާތެރިކަމާ ލޯބި ތިމާގެ މައިދައިތައާއި ބަފައިބެގެ ފަރާތުން ލިބުމެވެ.
މިކަން މިހެން ނުވާ ހާލަތުގައި ދިރިއުޅެން އުދަގޫވެ ތިމާގެ އުންމީދު ފަނޑުވާގޮތް ވެއެވެ. މިއީ ތިމާ މާޔޫސް ވާންވީ ވަގުތެއް ނޫނެވެ. ގުޅުން ރަނގަޅުކުރެވޭނެއެވެ. ބޭނުންވަނީ ހިތްވަރަކާއި ކުޑަ ވަގުތުކޮޅެކެވެ.
އުންމީދު ކުރެވެނީ ފިރިމީހާގެ ފަރާތުން ނޫނީ އަބިމީހާގެ ފަރާތުން ލިބޭ ފުރިހަމަ ލޯބި ދެފަރާތުގެ އާއިލާއިންވެސް ލިބުމަށެވެ. އެކަން ކާމިޔާބުކުރުމަށް އެކި މީހުންނަން ކުރަންޖެހެނީ އެކިކަހަލަ ކަންތައްތަކެވެ. ކުރެވޭ ކަންތައްތަކުން އެގުޅުން ގޯސްވާތަންވެސް ފެނެއެވެ. އެހެން ނަމަވެސް މިބުނާ ކަންތައްތަކަށް ވިސްނާށެވެ. ގުޅުން ކާމިޔާބުވާނެއެވެ.
- އަބަދުވެސް އެމީހުންނާ ދޭތެރޭ ވިސްނާކަން ދައްކާށެވެ.
ކުދި ކުދި ކޫސަނި ކަންތައްތައް ކޮއްލައިގެން ނަމަވެސް އެމީހުންނަކީ މުހިއްމު ބައެއްކަން ވިސްނަދޭށެވެ. ތިބާއަކީ ގެއަށް އައިސްހުރި މެހެމާނެއްކަން އިޙްސާސް ވެދާނެއެވެ. އެހެންވިޔަސް އެކަން ނުދައްކާށެވެ. އެމީހުން ކަންކުރާގޮތް ހިތުން ފޮހެލާ ކުދި ކުދި ބައެއް ކަންކަމުގައި އެހީވާށެވެ. އެހީއަކަށް ނޭދުނަސް ކެއްކުން ކަހަލަ ކަންތަކުގައި އަމިއްލައަށް ފެނިގެން އެހީވާށެވެ. އެއްޗެއް ކޮށާލަދިނުން، މޭޒު ސާފުކޮށްލަދިނުން، ސިންކުގަ ހުންނަ ތަށި ދޮވެލަދިނުން ކަހަލަ ކަންތައްތައް ކޮށްލަދޭށެވެ. ފިރިހެން ކުއްޖެއްނަމަ ބަފައިބެ ކުރާ ކަންތައްތަކުގައި އަތްގާތްކޮށްދީ ހަދާށެވެ.
- އިންސާނުންގެ ގޮތުގައި ދެމީހުންވެސް ހަމަހަމަކަން ވިސްނަދޭށެވެ.
ކިތަންމެ ރުޅިއަޔަސް ވާހަކަ ދައްކަން މަސައްކަތް ކުރާށެވެ. ހަމަޖެހިފައި ތިބޭ ވަގުތު ކޮންމެވެސް ވާހަކައަކުން އެމީހުންގެ އުފާވެރި ހަނދާންތައް އާކޮށްދޭށެވެ. މިސާލަކަށް އެމީހުންގެ ޒުވާން ދުވަސްވަރު ކަންކަން ހިނގިގޮތާ ދޭތެރޭ ސުވާލުކުރާށެވެ. އެމީހުންގެ ވާހަކައަށް ވަރަށް ޝައުގުވެރިވާކަން އަންގާ އިތުރަށް އޮޅުން ފިލުވުމަށް ސުވާލުކުރާށެވެ. ފޮޓޯފަދަ އެއްޗެހި ހުރިނަމަ ކޮބާތޯ ބަލާ އެބަލާލަން އެދޭވަރު ހާމަކުރާށެވެ. އަދި ދިމާވެފައިހުރި މަޖާ ކަންތައްތައް ހިއްސާކުރުމަށް މަސައްކަތްކުރާށެވެ.
- ކެތްތެރިވާށެވެ.
ތިމާގެ ދިރިއުޅުމަކީ އެމީހުންވެސް ދަސްކުރަން ޖެހޭނެ ކަމެކެވެ. ފަހަރުގައި އެމީހުންގެ ހިތްނުތަވަސްކަމަކީ ތިމާރަނގަޅަށް ނޭނގޭތީ އައިސްގެން އުޅޭ ހިތްނުތަނަވަސްކަމެއް ކަމަށްވެދާނެއެވެ. ދަސްކުރުމަށް އެމީހުނަށް ވަގުތުދޭށެވެ. އެމީހުންގެ ވާހަކަތަކާއި އަމަލުތަކުން ތިމާ މާޔޫސްނުވެ ހިތްވަރުގަދަކުރާށެވެ. ރުޅިއައިސް އިތުރު ފިޔަވަޅެއް ނާޅާ އަދި މަޑުކޮށްލާށެވެ. ތިބާގެ ކަންތައްތައް ފުރިހަމައަށް ކުރުމުގައި ދެމިހުންނާށެވެ. އެމީހުންނަށް ތިބާ ދަސްވުމުން ތިބާއަކީ ކާކުކަން އެނގި ގުޅުން ރަނގަޅުކުރާނެއެވެ.
- ފިރިމީހާގެ ނުވަތަ އަބިމީހާގެ އާއިލާއަށް ޤަދަރުކުރާށެވެ.
އެމީހުންގެ ނިންމުންތަކަށް ޤަދަރުކުރުން ވަރަށް މުހިންމެވެ. މީގެ މާނައީ ތިމާގެ ހައްޤުގައި ތިމާ ވާހަކަ ނުދައްކާށެކޭ ނޫނެވެ. އެކަމަކުވެސް ވާހަކަ ދައްކަންވާނީ މަޑުމައިތިރި ކަމާއެކުގައެވެ. ކަމުގެ ދެކޮޅު ކިޔައިދީ ރަނގަޅު ކޮޅުގައި ހުރީ ތިމާކަން ވިސްނައިދިނުމުގައި ހިކުމަތްތެރި ކަމާއެކު ވާހަކަދެއްކުން ވަރަށް މުހިންމެވެ.
- އަމިއްލައަކަށް ކަންތައްތައް ހައްލުނުކުރެވޭނެކަން އެމީހުނަށް ވިސްނަދޭށެވެ.
އެމީހުންގެ ހިޔާލާއި މަޝްވަރާ ކޮންމެ ކަމެއްގައިވެސް މުހިއްމުކަން އަންގަދޭށެވެ. ބައެއް ކުދިކުދި ކަންތައްތަކުގައި ވެސް ސުވާލުކުރާށެވެ. މިއަދު ކައްކާނި ކޯޗެއްތޯ ، ބޭރަށް ދާން ލާނީ ކޯޗެއްތޯ ކަހަލަ ސުވާލުތަކެވެ. ބައެއް ފަހަރަށް ރަޙުމަތްތެރިންނާ ޖެހޭ މައްސަލަތައް، މާބޮޑެތި ކަންކަން ނޫނަސް އެމީހުންނާ ހިއްސާކޮށް ހިޔާލު ހޯދާލާށެވެ. އަމިއްލައަށް ހައްލު ކުރެވޭ ކަނތައް ތަކުގައިވެސް އަހާލާ ހިޔާލު ހޯދާލަން މަސައްކަތްކުރާށެވެ.
މިއީ ކޮއްލަން ފަސޭހަ ކަންތައްތަކެކެވެ. ކޮންމެ މީހަކާ ގުޅުން ހީނަރުވިޔަސް ހައްލުކުރުމަށްޓަކައި ވާހަކަދެއްކުން މުހިންމެވެ. ވާހަކަ ދައްކާއިރު އަނެކާގެ އިޙްސާސްތައްދަނެ، ހިކުމަތްތެރިކަމާއެކު ވާހަކަ ދައްކާށެވެ. ދުނިޔެގައި ހައްލުނުކުރެވޭނެ ކަންކަން ވަރަށްމަދެވެ. އެއިން ކަމަކަށް ދިރިއުޅުމުގެ ގުޅުންތައް ނުހަދާށެވެ.
