އެއްވަނައިގައި އޮތް މެންޗެސްޓާ ސިޓީ އާއި ދެވަނައިގައި އޮތް ލިވަޕޫލުން ރޭ ލީގުގައި ކުޅުނު މެޗް 2-0 އިން ކާމިޔާބުކޮށް މަގާމު ދަމަހައްޓައިފިއެވެ.
ލިވަޕޫލްގެ އަމިއްލަ ދަނޑުގައި ވަޓްފޯޑާއި ދެކޮޅަށް ކުޅުނު މެޗު ކާމިޔާބު ކުރީ 0-2 ގެ ނަތީޖާ އަކުންނެވެ. ރޭގެ މެޗުގައި ލިވަޕޫލުން ލީޑުނެގީ 22 ވަނަ މިނިޓްގައި ޑިއޯގޯ ޖޮޓާ ބޮލުން ޖެހި ގޯލުންނެވެ. ޖޯ ގޯމޭޒް އަތިމަތިން ނެގި ހުރަހަކުން ޖޮޓާ ޖެހި މި ގޯލަކީ މި ސީޒަނުގެ ހުރިހާ މުބާރާތެއްގައި އޭނާ ޖެހި 20 ވަނަ ގޯލެވެ.
ލިވަޕޫލުން ދެ ވަނަ ހާފުގައި ޕްރެޝަރުގައި ކުޅެމުންދިޔައިރު، ވަޓްފޯޑަށް އެއްވަރުކޮށްދޭން ޖާއޯ ޕެޑްރޯ ރަނގަޅު ހަމަލާއެއް ފޮނުވާލުމުން ދިޔައީ ދަނޑިކައިރިން ބޭރުންނެވެ. ލިވަޕޫލަށް މެޗުގެ ތިން ޕޮއިންޓް ކަށަވަރުކޮށްދިން ގޯލު ޖެހީ މެޗު ނިމެން އެއް މިނިޓަށް ވެފައި ހުއްޓައި، ފަބީނިއޯ ޖެހި ޕެނަލްޓީންނެވެ. މި ޕެނަލްޓީ އަކީ ޖޮޓާ އަށް ވަޓްފޯޑްގެ ޔޫރަޖް ކުޗްކާ ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީއެކެވެ.
ރެލިގޭޝަނުގައި އޮތް ބާންލީ ކޮޅަށް ސިޓީން ގޯލުތައް ޖެހީ ފުރަތަމަ ހާފުގައެވެ. ރަހީމް ސްޓާލިން ތަނަވަސްކޮށްދިން ދެ ފުރުސަތުން ސިޓީން ވަނީ ފުރަތަމަ 25 މިނިޓް ތެރޭ ދެ ގޯލު ޖަހައިފައެވެ. މެޗުގެ ފަސް ވަނަ މިނިޓްގައި ކެވިން ޑި ބްރޭނާ ސިޓީ އަށް ލީޑުނަގައިދިންއިރު، 25 ވަނަ މިނިޓްގައި ސިޓީގެ ދެ ވަނަ ގޯލު ޖެހީ އިލްކާއި ގުންޑޮގާންއެވެ. މި ގޯލާ އެކު ގުންޑޮގާން އަކީ ޕްރިމިއާ ލީގުގެ ތާރީހުގައި އެންމެ ގިނަ ގޯލު ޖެހި ޖަރުމަނު ކުޅުންތެރިޔާއެވެ. ގުންޑޮގާން 34 ގޯލު ޖެހިއިރު، ކުރިން އެ ރެކޯޑް މެސުޓް އޮޒިލް އަތުގައި އޮތީ 33 ގޯލާ އެކުއެވެ.
މިނަތީޖާތަކާއިއެކު ސިޓީ އޮތީ ކުޅުނު 30 މެޗުން 73 ޕޮއިންޓާއިއެކު ޓޭބަލްގެ އެއްވަނައިގައެވެ. ލިވަޕޫލް އޮތީ ހަމަ މިއަދަދަށް މެޗު ކުޅެގެން 72 ޕޮއިންޓާއިއެކު ޓެބަލްގެ ދެވަނާގައެވެ.
