ފުންނާބު ހަލާކުވެ ފަޅައިގެން ދިޔުމަކީ ބައެއް މީހުންނަށް ވަރަށް ގިނައިން ދިމާވާ ކަމެކެވެ. ހާއްސަކޮށް އަންހެނުންނަށް ދިމާވާ މައްސަލައެކެވެ.
ފައިތިލަ ނުވަތަ ފުންނާބު ފަޅައިގެން ދާން ދިމާވާ މައިގަނޑުއެއް ސަބަބަކަށް ވަނީ ފައިގެ ހަން ބޯވެ، ހިކުމެވެ. އޭގެ ސަބަބުން މުޅި ފައިތިލައިގެ ރީތިކަމާއި އޮމާންކަން ގެއްލެއެވެ. މާބޮޑު މަސައްކަތެއް ނުކޮށް ވެސް ފަޔަކީ ރީތިކޮށް އޮމާންކޮށް ބެހެއްޓިދާނެ ގުނަވަނެކެވެ.
ފުންނާބުގެ ހަންބޯވެ ފަޅައިގެންދާ މައްސަލައަށް، ގޭގައި ތިބެގެން ވެސް ފަރުވާ ކުރެވިދާނެއެވެ. އެގޮތުން ކޮންމެރެއަކު، ފައިގެ ހަންގަނޑު މަޑުކޮށްލުމަށް ފުރަތަމަ ތާފަނާ ފެނަށް ލުނބޯ ހުތް އަޅައި އޭގެ ތެރޭގައި ފައި ފޯކޮށްލާށެވެ. މިހެން ހެދުމުން ހަންގަނޑު މަޑުވެ، ހަމުގައި ހަރުލާފައި ހުންނަ ހަޑިތައް ފިލުވާލަން ފަސޭހަވެ އެވެ.
އެއަށްފަހު ފައި އުނގުޅުމަށް ހާއްސަކޮށްފައިވާ ގަލަކުން ނުވަތަ ފައި ގާނަން ބޭނުންކުރާ އެއްޗަކުން ފައިތިލަގައި ހަން ބޯވެފައި ހުރި ދިމާތަކުގައި މަޑުމަޑުން އުނގުޅާށެވެ.
އެއަށްފަހު ކާށިތެޔޮ ބޭނުން ކޮށްގެން ފައިތިލަ މަސާޖުކޮށްލާށެވެ. މަސާޖުކޮށް ނިމުމުން އިސްޓާކީނަށް އަރައިގެން އޮވެ ނިދާށެވެ. ކާށިތެޔޮ ނެތް ނަމަ ވެސްލިން ނުވަތަ އެލޯވެރާ ނުވަތަ ރަނގަޅު މޮއިސްޗަރައިޒާއެއް ބޭނުން ކޮށްލާށެވެ.
