ރާއްޖޭގެ މިނިވަންކަމާއި، ސިޔާދަތު ނަގަހައްޓައި، ދަމަހައްޓާނީ ދިވެހި ސިފައިން ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް ޝަމާލް ވިދާޅުވެއްޖެއެވެ.

ރޭ ބޭއްވި މަޖިލީހުގެ 241 ކޮމެޓީގައި ވާހަކަ ދައްކަވަމުން ޝަމާލް ވިދާޅުވީ، ދިވެހިންގެ މިނިވަންކަން ދިފާއުކުރުމުގައި ދިވެހި ސިފައިން ތާއަބަދު ތައްޔާރަށް ތިއްބަވާނެކަމަށެވެ. ދިވެހިންގެ ސަލާމަތާއި ރައްކާތެރިކަން ކަށަވަރު ކުރާނީ އެހެން ޤައުމެއްގެ ސިފައިން ނޫންކަމަށް ޝަމާލް ވިދާޅުވިއެވެ. ރާއްޖޭގެ މިނިވަންކަން އަބަދުވެސް ބަަހައްޓާނީ ދިވެހި ސިފައިންކަމަށް ޝަމާލް ވިދާޅުވިއެވެ.

ޝަމާލް ވިދާޅުވީ އިންޑިއާ އައުޓް ހަރަކާތަކީ އެކަމުން ރާއްޖެއަށް އެކި ގޮތްގޮތުން ނުރައްކާތެރިކަން އޮތް ހަރަކާތެއްކަމުގައެވެ. ރާއްޖެއާއި އިންޑިއާއާއި އޮތް ގުޅުމަކީ އިއްޔެއަކު އަދި މިއަދަކު އޮތް ގުޅުމެއް ނޫންކަމަށާއި މިގުޅުމަކީ، ޒަމާނުއްސުރެއް އޮތް ވަރަށް ގާތް އެކުވެރި ގުޅުމެއްކަމަށެވެ. ޝަމާލް ވިދާޅުވީ ރާއްޖެއަކީ މިނިވަން ދައުލަތެއްކަމަށާއި އެއްވެސް ބޭރުގެ ބަޔަކު ރާއްޖޭގައި ބައިތިއްބައިން ދިވެހި ސަރުކާރުން ކުރިންވެސް އަދި މިހާރުވެސް ބޭނުންނުވާނަމަ އެކަން އެގޮތަށް ނުވާނެކަމަށެވެ.

ވަކި ޤައުމަކާއެކު އަސްކަރީގޮތުން ގާތްގުޅުމެއް ބޭއްވުމަށް މަސައްކަތްކުރާ ވާހަކަތަކާއި ގުޅޭގޮތުން ޗީފް އޮފް ޑިފެންސް ވިދާޅުވީ ރާއްޖެއިން އަސްކަރީ ގުޅުން ބަދަހިކުރަނީ ހަމައެކަނި ވަކި ޤައުމަކާއެކުގައި ނޫންކަމަށެވެ. އަސްކަރީ ގުޅުންތަކަކީ ހުރިހާ ޤައުމެއްގައިވެސް ވަރަށް ބަދަހިކޮށް އޮންނަ ގުޅުމެއްކަން ފާހަގަކުރައްވާ ރާއްޖެއިން އަވަށްޓެރި ޤައުމުތަކުގެ އިތުރުން މެދުއިރުމަތީގެ ޤައުމުތަކާއި އަދި އަސްކަރީގޮތުން ދުނިޔޭގެ ބޮޑެތި ބާރުތަކާއެކުވެސް ޚާއްސަ ގުޅުމެއް ބާއްވަމުން އަންނަކަމަށް ވިދާޅުވިއެވެ. އަދި މަސައްކަތްކުރައްވަނީ އަސްކަރީގޮތުން ރާއްޖޭގެ ކެޕޭސިޓީ އިތުރުކޮށް ހަރުދަނާކުރުންކަމަށްވެސް ޗީފް އޮފް ޑިފެންސް ވިދާޅުވިއެވެ.

ޝަމާލް ވިދާޅުވީ ކުރީ ސަރުކާރުން ކެރިގެން އިންޑިއާއާއެކު ވެފައިވާ އެއްބަސްވުން އުވާލެއްވުމަށް މަސައްކަތްކުރެއްވިނަމަ އެކަންވާނެކަމަށެވެ. އެހެންކަމުން ރާއްޖެއާއި ދެމެދުވެފައިވާ އެއްބަސްވުމުގެ ދަށުން ރާއްޖޭގައި އޮތް ހެލިކޮޕްޓަރާއި ސިފައިން ފޮނުވާނުލެވުނީކަމަށް ޤަބޫލުނުކުރައްވާކަމަށް ޝަމާލް ވިދާޅުވިއެވެ.

މިބައްދަލުވުމުގައި ބައްދަލުވި އޮފިސަރުން ވަނީ، އިންޑިއާއާއި ރާއްޖެއާއި އޮތް އަސްކަރީ ގުޅުމުގެ ތެރެއިން ހިންގަމުންދާ ތަފާތު އެކި ޓްރޭނިންތަކުގެ މައުލޫމާތުވެސް ހިއްސާ ކުރައްވާފައެވެ. އެގޮތުން "ދޯސްތީ" އަކީ މިހާރު އިންޑިއާއާއެކު ހިންގާ އެންމެ ދުވަސްވީ ޓްރޭނިންކަން ވަނީ ފާހަގަކޮށްފައެވެ. މިޓްރޭނިން ހިންގާތާ މިހާރު 30 އަހަރު ވެފައިވާއިރު، ޓްރޭނިންގެ މުހިންމުކަން ބޮޑުކަމުން އަވަށްޓެރި ސްރީލަންކާއިވެސް ބައިވެރިވެފައިވާކަމަށެވެ.

ދިވެހި ސިފައިންނަކީ ކޮންމެ ދުވަކުވެސް ބޭސްފަރުވާއާއި އެނޫންވެސް އެކި ހާދިސާތަކުގައި ހަރަކާތްތެރިވާންޖެހޭ ބަޔަކަށްވާއިރު، މިކަންކަމަށް ބޭނުންވާ ވަސީލަތްވެސް މިހާތަނަށް އެންމެ ރަނގަޅަށް ފޯރުކޮށްދިން ޤައުމަކީ އިންޑިއާކަމަށް ސިފައިންގެ އިސް ބޭފުޅުން ވަނީ ވިދާޅުވެފައެވެ.