މައިކުރޯ ސޮފްޓްގެ ބާނީ، އަދި އިންސާނީ އެހީތެރިކަން ފޯރުކޮށްދޭ، މަހުޖަނު ބިލް ގޭޓްސް، ޕޯލިއޯ ނައްތާލުމާ ބެހޭގޮތުން ޕާކިސްތާންގެ ބޮޑުވަޒީރު އިމްރާން ޚާންއާއި މަޝްވަރާ ކުރުމަށްޓަކާ، ބުރާސްފަތި ދުވަހު ޕާކިސްތާނަށް ވަޑައިގެންފިއެވެ. ޕާކިސްތާނަކީ ޕޯލިއޯ ފެތުރުން ހުއްޓުމަކަށް ދުނިޔޭގައި ގެނެވިފައި ނުވާ ހަމައެކަނި ދެގައުމު ތެރެއިން އެއް ގައުމެވެ.
"މިއީ ބަލި ނައްތާލުމުގައި އެންމެ އުދަގޫ އަދި އެންމެ ފަހުގެ މަރުހަލާ. މިހާރު ކުރެވެމުންދާ މަސައްކަތަކަށް ދޫނުދީ، ފަރުވާތެރިކަމާއެކު މަސައްކަތް ކޮށްފިނަމަ، އެންމެންގެ ސަލާމަތަށްޓަކާ، ޕޯލިއޯ ނައްތާލައި، ތާރީޚުގެ ތެރެއަށް ވަދެގަތުމުގެ ފުރުސަތު ޕާކިސްތާނަށް އެބައޮތް،" ގޭޓްސް ވިދާޅުވެފައި ވެއެވެ. "ޕޯލިއާ ނައްތާލުމަށް ޕާކިސްތާނުން ކުރަމުންދާ މަސައްކަތްތަކަކީ ތައުރީފް ހައްގު މަސައްކަތްތަކެއް."
ގޭޓްސް ކޯ ޗެއަރއެއްގެ ގޮތުގައި ހުންނަވާ، ދަ ބިލް އެންޑް މެލިންޑާ ގޭޓްސް ފައުންޑޭޝަންއަކީ، ގްލޯބަލް ޕޯލިއޯ އިރެޑިކޭޝަން އިނިޝިއޭޓިވް (GPEI)ގެ ބައިވެރިއެކެވެ. މިއީ ސަރުކާރުތަކާއި، ބައިނަލް އަގުވާމި ޖަމިއްޔާތަކާއެކީ ކުރިޔަށް ގެންދާ ވަރަށް ބޮޑު ޕްރޮޖެކްޓެކެވެ.
ޕާކިސްތާނާއި އަދި ޖެހިގެން އޮފްއާނިސްތާނަކީ، މިހާރު ދުނިޔޭގައި އޮތް، ޕޯލިއޯ ފެތުރެމުންދާ ހަމައެކަނި ދެ ގައުމެވެ.
ސިއްޙީ އަދި އިންސާނީ އެހީތެރިކަން ފޯރުކޮށްދޭ ޖަމާއަތްތަކުން ބުނަމުންދަނީ، ޕޯލިއޯ އެކީ ނައްތާލުމަށް ޕާކިސްތާނުން ކުރަމުން ދަނީ އުއްމީދީ މަސައްކަތްތަކެއް ކަމަށާއި، އެހެންނަމަވެސް މި މަސައްކަތްތައް މިހާރު ވަނީ ވަރަށް ނާޒުކު ފައްތަރެއްގައި ކަމުގައެވެ.
ގޭޓްސް ފައުންޑޭޝަނުން ބުނެފައިވަނީ، ފާއިތުވެދިޔަ އަހަރެއްހާ ދުވަހުގެ ތެރޭގައި ޕާކިސްތާނުގައި ޕޯލިއޯ ޖެހިގެން އެއްވެސް ކުއްޒަކު ވާ ވެފައި ނުވާކަމަށާއި، އެހެންނަމަވެސް، ޕޯލިއޯ ޖައްސާ ވައިރަސް، ފާއިތުވި ޑިސެމްބަރުމަހު، ޚައިބަރ ޕަޚުތުންޚަވާ ޕްރޮވިންސުން ނަގާފައިވާ ނަޖިސް ސާމްޕަލްތަކުން ފެނިފައިވާ ކަމަށެވެ.
ގޭޓްސް ޕާކިސްތާނަށް ކުރެއްވި ފުރަތަމަ ދަތުރުފުޅުގައި އޭނާ ވަނީ، ޕާކިސްތާނުގެ ކޯވިޑް19 ނޭޝަނަލް ކޮމާންޑް އެންޑް އޮޕަރޭޝަން ސެންޓަރަށް ޒިޔާރަތް ކުރައްވާފައެވެ.
ޕާކިސްތާނުގައި ބޭއްވުނު ޚާއްސަ ހަފްލާއެއްގައި، އެގައުމުގެ ރައީސް އާރިފް އަލްވީ ވަނީ، އެގައުމުގައި އެރުވޭ ދެވަނައަށް އެންމެ ޝަރަފްވެރި އައްޑަނަ ކަމުގައިވާ ހިލާލް-އޭ-ޕާކިސްތާން އެވާރޑޑް ބިލް ގޭޓަށް އަރުވާފައެވެ.
