ރާއްޖޭގެ ކަނޑުގެ އަޑީގެ ސަރަހައްދު ދެނެގަތުމަށް ކުރާ މަސައްކަތް މޯލްޑިވްސް ޑިފެންސް ފޯސްގެ ބެލުމުގެ ދަށުން ކުރުމަށް ނިންމައި، ރުހުން ހޯދުމަށް މަޖިލީހަށް ހުށަހަޅައިފިއެވެ.
ރައީސުލްޖުމްހޫރިއްޔާ "މޯލްޑިވްސް ހައިޑްރޯގްރަފިކް ސަރވިސް"ގެ ނަމުގައި އިދާރާއެއް އުފައްދާފައިވަނީ މިދިޔަ މަހުގެ 22 ވަނަ ދުވަހުއެވެ. މިއިދާރާ ޑިފެންސްގެ ބެލުމުގެ ދަށަށް ގެންދަން މަޖިލީހުން ރުހުން ދިނުމަށް އެދި ސިޓީއެއް ފޮނުއްވައިފައެވެ.
މިބަދަލާއި ގުޅޭގޮތުން މަޖިލިސް ރައީސް މުހައްމަދު ނަޝީދު ވިދާޅުވީ މިއީ ހައިޑްރޯ ގްރަފގެ މަސައްކަތް މިނިސްޓްރީގެ ދަށުގައި ބޭއްވުމަށް މިނިސްޓްރީއަށް ގެންނަން ހުށަހަޅުއްވާފައިވާ ބަދަލެއް ކަމަށެވެ. ރައީސް ނަޝީދު ވިދާޅުވީ ރާއްޖޭގެ ކަނޑުތަކުގެ ޗާޓެއް ހެދިފައިވަނީ 1846 ގައިކަމަށެވެ. އެއަށްފަހު މިއަދާއި ހަމައަށް ބޭނުން ކުރަމުންދަޏީ އެޗާޓްކަމަށެވެ. އޭގެ ފަހުން ބޭނުންކުރަމުންދަނީ ސެޓެލައިޓުން އިމޭޖު ބޭނުންކޮށްގެ ހެދިފައިވަ ޗާޓެއްކަމަށް ރައީސް ނަޝީދު ވިދާޅުވިއެވެ. ނަމަވެސް މިހާރުގެ ޓެކްނޮލޮޖީއާއި ގުދުރަތީ ގޮތުން އަންނަމުންދާ ބަދަލުތަކާއިއެކު، ކަނޑުގެ ސަރަހައްދުގެ މައުލޫމާތު ފުރިހަމަ ކުރުމަކީ މިއަދު ރާއްޖެއަށް ކޮންމެހެން ބޭނުން ވެފައިވާ ކަމެއްކަމުގައެވެ.
މޯލްޑިވްސް ހައިޑްރޯގްރަފިކް ސަރވިސްއިން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި ދިވެހިރާއްޖޭގެ ސަރަޙައްދުތަކުގެ ހައިޑްރޯގްރަފިކް ސަރވޭތައްކޮށް، މަޢުލޫމާތު އެއްކޮށް ބެލެހެއްޓުމާއި، ސަރުކާރުގެ އިދާރާތަކާއި އަމިއްލަ ފަރާތްތަކުގެ ބޭނުންތަކަށް ކުރާ ހައިޑްރޯގްރަފިކް ސަރވޭތަކުގެ މަޢުލޫމާތު ހޯދައި، މަޢުލޫމާތު އެއްކޮށް ބެލެހެއްޓުން ހިމެނެއެވެ.
މީގެ އިތުރުން ސަރުކާރުގެ އިދާރާތަކުން ކުރިއަށްގެންދާ މަސައްކަތްތަކަށް ބޭނުންވާ ހައިޑްރޯގްރަފިކް މަޢުލޫމާތު ފޯރުކޮށްދިނުމާއި، އެ ފަރާތްތަކަށް ބޭނުންވާ ފަންނީ ލަފައާއި މަޝްވަރާދިނުމާއި، ދިވެހިރާއްޖޭގެ ސަރަޙައްދުތަކުގެ ނިޔަމިކަމުގެ ޗާޓުތައް ކުރަހައި އަދާހަމަކޮށް ޢާންމުކުރުމާއި، ނޯޓިކަލް ޕަބްލިކޭޝަންތައް ޝާއިޢުކޮށް އަދާހަމަކުރުންވެސް ހިމެނެއެވެ.
