އެނގިތިވި ރާއްޖޭގެ ކޯވިޑްގެ ހާލަތު ގޯސްވުމަށްފަހު، އެކަމުގެ އުނގަދޫ ނުވަތަ ޖެއްސުން ރައްޔިތުންނަށް ކުރުމަކީ ރަނގަޅު ގޮތެއް ނޫންކަމުގައި ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.
ކޯވިޑް-19ގެ ވައިރަހުގެ އައު ވޭރިއަންޓެއްކަމަށްވާ އޮމިކްރޯން، ރާއްޖޭގައި ފެތުރެމުންދާކަން ކަށަވަރުކުރެވިފައިވާކަމަށް ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)އިން މިއަދު ވަނީ ވިދާޅިވެފައެވެ. ރާއްޖޭގައި ކޯވިޑްގެ ހާލަތު އިތުރަށް ގޯސްވެފައިވަނީ ގިނަ އަދަދެއްގެ ބަޔަކު އެއްވެވޭ ފަދަ ގޮތަކަށް ސަރުކާރުން ގިނަ ހަރަކާތްތައްކެއް ކުރިއަށް ގެންގޮސްފައި ވަނިކޮށެވެ.
ދީނީ އިލްމުވެރިޔާ ޑރ.އިޔާޒު ވިދާޅުވީ މިއަދުގެ މިހާލަތު ބައްދަލުކުރީ މިކަމަށް އެކަށީގެންވާ ފިޔަވަޅު ނޭޅި، ބަލި ފެތުރުމަށް ޖާމަ ދިނުމުންކަމަށެވެ. އާއަހަރު ފާހަގަކުރަން ގިނަ ބަޔަކު އެއްކޮށްގެން އިވެންޓް ބޭއްވުމާއި މިނޫންވެސް ކަންކަން ކުރުމަށްފަހު، ހާލަތު ގޯސްވުމުން އެކަމުގެ ތަކުލީފް ދިވެހި ރައްޔިތުން އުފުލަންޖެހޭ ގޮތަށް ކަންކަން ބައްޓަން ކުރުމަކީ ރަނގަޅު ގޮތެއް ނޫންކަމަށް ޑރ.އިޔާޒު ވިދާޅިވިއެވެ.
މިކަން އެނގިތިބެ އާހަރު ފާހަގަ ކުރަން ޝޯ ބާއްވާ މީހުން އެއްކޮށްހެދީ. ހާލަތު ގޯސްވީމާ އެކަމުގެ ޖެއްސުން ރައްޔިތުންނަށް ކުރަން ރަނގަޅެއްނޫން.
– ޑރ.އިޔާޒު ވިދާޅުވިއެވެ.
ރާއްޖޭގެ ހާލަތު ގޯސްވަމުންދާތީ ކުއްލި ގޮތަކަށް އެޗްޕީއޭއިން އަޅަމުންދާ ފިޔަވަޅުތަކަށް ގިނަ ބައެއްގެ ނުރުހުން ވަނީ އަމާޒުވެފައެވެ. ޚާއްސަކޮށް ދެ އަހަރެއްހާ ދުވަސް ކޯވިޑުން ރައްކާތެރިވުމަށް އަޅަންޖެހޭ ފިޔަވަޅު އަޅައި އިންތިޒާމުތައް ހަމަޖެއްސުމަށް ލިބިގެން ދިޔަނަމަވެސް ސަރުކާރުން މިކަމަށް މާބޮޑު އިޖާބައެއް ދީފައި ނުވާކަން މިއަދުހާލަތުން ސާފުވެގެންދާކަމަށް ގިނަ ބަޔަކު ދަނީ ބުނަމުންނެވެ.
ޑރ.ނަޒްލާ ވިދާޅުވީ ޑެލްޓާގެ ގިނަ ކޭސްތައް ކުރިން ފެނުނީ މާލެއިންކަމަށާ، ނަމަވެސް އޮމިކްރޯންގެ ކޭސްތައް މިފަހަރު އަތޮޅުތެރެއިން ގިނައިން ފެނުމަކީ އެކަށީގެންވާކަމެއްކަމަށެވެ. ސަބަބެއްކަމަށް ޑރ.ނަޒްލާ ފާހަގަކުރެއްވީ ވެކްސިން ފުރިހަމަކުރުމާއެކު ދަތުރުފަތުރުކުރުމަށް މިހާތަނަށް ދީފައި އޮތް ލުއިތަކެވެ. ޑރ.ނަޒްލާ ވިދާޅުވީ އޮމިކްރޯންގެ ގިނަ ކޭސްތަކެއް އަތޮޅުތަކުން ރިޕޯޓްކުރާނެކަމަށް ލަފާކުރެވޭއިރު، އިތުރު ވޭވްތައްވެސް އަންނާނެކަމަށް ލަފާކުރެވޭކަމަށެވެ.
އެހެންކަމުން ބަލި ކޮންޓްރޯލްކުރުމަށް ފިޔަވަޅުތަކެއް އަޅަމުން އަންނަކަން ޑރ.ނަޒްލާ ފާހަގަކުރެއްވިއެވެ. ޑރ.ނަޒްލާ ވިދާޅުވީ ފިޔަވަޅުތައް އެޅުމުގައި އިސްކަން ދެއްވަނީ ދަރިވަރުންގެ ކިޔެވުމަށް ހުރަސްނޭޅޭނެގޮތަށް ބަލި ކޮންޓްރޯލްކުރުމަށެވެ.
މާލޭ ސަރަޙައްދުގައި ކޯވިޑްބަލި ފެތުރޭ މިންވަރު އިތުރުވެފައިވާތީ، ރައްކާތެރިކަމުގެ އިތުރު ފިޔަވަޅުތައް މިހާރު ވަނީ ތަންފީޒްކުރަން ފަށާފައެވެ. އެގޮތުން މާލޭ ސަރަޙައްދުގައި އަޅަން ނިންމާފައިވާ ފިޔަވަޅުތަކުގެ ތެރޭގައި 50 މީހުންނަށްވުރެ ގިނަ މީހުން ޖަމާވާގޮތަށް ހަފްލާތަކާއި އިވެންޓުތަކާއި އެއްވުންތައް ބޭއްވުން މަނާކުރުން ހިމެނެއެވެ. އަދި 50 މީހުންނަށްވުރެ މަދު މީހުން ހިމަނައިގެން ބާއްވާ މިފަދަ ހަރަކާތްތައްވެސް އެޗްޕީއޭގެ ގައިޑްލައިނާ މިންގަނޑުތަކާ އެއްގޮތައް ނޫނީ ނުބޭއްވުމަށް ވަނީ އަންގަވާފައެވެ.
މާލެ ސަރަޙައްދުގައި އަޅަން ނިންމާފައިވާ ފިޔަވަޅުތަކުގެ ތެރޭގައި މަގުމަތީ ބާޒާރުފަދަ، އެއްވެގެން ބާއްވާ ވިޔަފާރި ހަރަކާތްތައް ހުއްޓާލުމަށް ވަނީ އަންގާފައެވެ. އަދި ކުޅިވަރު މުބާރާތްތަކާއި ހަރަކާތްތައް، ކުޅިބަލަން މީހުންނަށް ވަދެވޭގޮތަށް ނުބޭއްވުމަށްވެސް ވަނީ އަންގަވާފައެވެ.
އެޗްޕީއޭއިން ވަނީ މިފިޔަވަޅުތައް ފުރިހަމައަށް ތަންފީޒްކުރުމަށް އެންމެހާ އިދާރާތަކާއި ފަރާތްތަކަށް އަންގަވާފައެވެ. މި ނިންމުންތަކާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތަކާ، އަދި އަޅާ ފިޔަވަޅުތަކާއި ދޭ އިރުޝާދުތަކަށް ޢަމަލުކުރުމަށްވެސް ވަނީ އަންގަވާފައެވެ. މީގެ އިތުރުން ކޯވިޑް ކޮންޓްރޯލްކުރުމަށް އަޅާ ފިޔަވަޅެއްގެ ގޮތުން، ރަށްރަށަށް ދަތުރުކުރާ މީހުން ޕީސީއާރް ޓެސްޓު ހެދުމާއި، ވެކްސިން ނުޖަހާ މީހުން ކަރަންޓީން ވާންޖެހޭ އުސޫލަށްވެސް ވަނީ ޢަމަލުކުރަން ފަށާފައެވެ.
