ހެލްތު ޕްރޮޓެކްޝަން އެޖެންސީ (އެޗްޕީއޭ) މިހާރު ސިފަކުރެވެނީ އިސްލާމްދީނާއި ދުރުކުރުވަން ޙީލަތްތެރި ރޭވުން ތައް ރާވާ މުއައްސަސާ އެއްގެ ގޮތުގައި ކަމަށް ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.
ޑރ.އިޔާޒު މިފަދައިން ވިދާޅުވީ ގިނަ ބަޔަކު އެއްވެވޭގޮތަށް އާއަހަރު ފާހަގަ ކުރުމާއި، ސިޔާސީ ހަރަކާތްތަކަށް މީހުން އެއްވުންތައް އެއްވަމުންދާއިރުވެސް އެއްވެސް އެއްޗެއް ނުބުނެ، ކުއްލިއަކަށް އެޗްޕީއޭއިން އަޅަމުންދާ ފިޔަވަޅުތަކާއި ގުޅިގެންނެވެ. ޑރ.އިޔާޒު ވިދާޅުވީ އެޗްޕީއޭ މިއަދު ސިފަ ކުރެވިގެންދަނީ ކޯވިޑުން ރައްކާތެރިވުމަށްވުރެއް ބޮޑަށް ރައްޔިތުން އިސްލާމްދީނާއި ދުކުރުމަށް ހީލަތްތެރި ރޭވުންތަކެއް ރާވާ މުވައްސަސާއެއްގެ ގޮތުގައި ކަމަށެވެ.
މިހާރު އެޗްޕީއޭ ޞިފަ ކުރެވެނީ ކޮވިޑުން ރައްކާތެރިކުރަން އުޅުމަށްވުރެ ބޮޑަށް ރަޢްޔިތުން އިސްލާމްދީނާއި ދުރުކުރުވަން ޙީލަތްތެރި ރޭވުން ތައް ރާވާ މުއައްސަސާ އެއްގެ ގޮތުގައި. މިބައިމީހުންނާއި މެދު ސަމާލުވާންޖެހޭ.
– ޑރ.އިޔާޒު ވިދާޅުވިއެވެ.
އެޗްޕީއޭއިން ވަނި ރާއްޖޭގައި ކޯވިޑްގެ ނަންބަރުތައް މަތިވަމުންދާތީ ބައެއް ކަހަލަ ފިޔަވަޅުތައް އަޅަމުންނެވެ. ނަމަވެސް އަޅާ ފިޔަވަޅުތައް 24 ގަޑިއިރު ނުވަނީސް ބަދަލުވާތީ ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ޚާއްސަކޮށް، މާލެ ސިޓީ ކައުންސިލުން ކުރިއަށް ގެންދިޔަ ނައިޓް މާކެޓް ހުއްޓާލަން އެންގިތާ 24 ގަޑިއިރު ނުވަނީ ނައިޓް މާކެޓް ގައިޑްލައިނާއި އެއްގޮތަށް ބޭއްވޭނެކަމަށް އެޗްޕީއޭއިން ނިންމި ނިންމުމަށްވެސް ގިނަ ބަޔަކު ދަނީ ފާޑު ކިޔަމުންނެވެ.
HPA qavaaidhu siyaasee kankamugai Nuhingaane… https://t.co/IwtdyrSsgD
— ZamzamFarish – ޒަމްޒަމް ފާރިޝް (@ZamzamFarish) January 7, 2022
އަދި މީގެ ކުރިންވެސް ނިމިދިޔަ ކައުންސިލް އިންތިޚާބާއި ދިމާކޮށްވެސް އެޗްޕީއޭއިންވަނީ މިފަދަ ދެކޮޅު ނުޖެހޭ ފިޔަވަޅުތަކެއް އަޅާފައެވެ. ރާއްޖޭގައި ކޯވިޑް ބަލި ފެތުރޭ މިންވަރު އިތުރުވަމުންދާތީ، ރާއްޖޭގެ ހުރިހާ ރަށެއްގައި މާސްކް އެޅުން އަނެއްކާވެސް އެޗްޕީއޭއިން މިވަނީ މަޖުބޫރުކޮށްފައެވެ. ކޭސްތަކުގެ އަދަދު މަތިވެ ދުވާލަކު ރިޕޯޓްކުރާ ކޭސްތަކުގެ އަދަދު 300އަށްވަނީ އަރާފައެވެ.
މާލެ ސަރަޙައްދުވަގައިވެސް ބަލި ފެންނަ މިންވަރު ދަށަށް ގޮސްފައި އޮތުމަށްފަހު، މިހާރުވަނީ ކޭސްތައް ރިޕޯޓްކުރާ މިންވަރު ވަރަށް ބޮޑަށް އިތުރުވާން ފަށާފައެވެ. މިއާ ގުޅިގެން އެޗްޕީއޭއިން މިވަނީ ފިޔަވަޅުތައް އިތުރަށް ހަރުދަނާކޮށް، ފިޔަވަޅުތައް ތަންފީޒްކުރޭތޯ ޔަގީންކުރުމަށް ފުލުހުންނަށް އަންގާފައެވެ.
ފުލުހުން ވިދާޅުވީ ކޯވިޑަށް ޕޮޒިޓިވްވާ އަދަދު މަތިވަމުންދާތީ ރާއްޖޭގެ ހުރިހާ ރަށެއްގައި މާސްކްއެޅުން މަޖުބޫރުކޮށްފައިވާކަމަށެވެ. އަދި މިކަން ތަންފީޒްކުރޭތޯ ބެލުމުގެ މަސައްކަތްތައް ފުލުހުން މިހާރު ފަށާފައިވާކަމަށެވެ.
