އިދިކޮޅު ކޯލިޝަނުން "އިންޑިއާ އައުޓް" ހަރަކާތުގައި މިއަދު މާލޭގައި ކުރިއަށް ގެންދިޔަ ސުލްހަވެރި އިހުތިޖާޖުގެ ތެރެއިން މާލެ ސިޓީ ކައުންސިލްގެ ޑެޕިއުޓީ މޭޔަރު ނަރީޝްއާއިއެކު 7 މީހަކު ހައްޔަރުކޮށްފިއެވެ.
ޕީޕީއެމްގެ ތަރުޖަމާން ހީނާ ވަލީދު ވިދާޅުވީ ހައްޔަރު ކުރި މީހުންގެ ތެރޭގައި މާލެ ސިޓީ ކައުންސިލްގެ ޑެޕިއުޓީ މޭޔަރު ނަރީޝްއާއި، ކައުންސިލް މެމްބަރު އައިފާންވެސް ހިމެނޭ ކަމަށެވެ. މީގެ އިތުރުން މިހަރަކާތުގައި އިސްކޮށް ހަރަކާތްތެރިވާ ކުރީގެ ހޯރަފުށީ ދާއިރާގެ މެމްބަރު މުހައްމަދު އިސްމާއިލްއާއި، ކައުންސިލް ބައެއް މެމްބަރުންވެސް ހިމެނޭކަމަށެވެ.
މިއަދު މާލޭގައި އިިދިކޮޅުން އިންޑިއާ އައުޓާއި ދެކޮޅަށް ބޭއްވި ހަރަކާތުގައި ފުލުހުން ވަނީ އިންޑިއާ އައުޓް އިނގިރޭސި ބަހުން ބޭނުން ކުރާނަމަ، ހަރަކާތް ހުއްޓުވާނެ ކަމަށް ބުނެފައެވެ. އަދި ފުލުހުން ވަނީ ދިވެހި ބަހުން އިންޑިއާ އައުޓް ޖެހުމަށް އަންގާފައިކަމަށް ހީނާ ވަނީ ވިދާޅުވެފައެވެ.
Many protestors, including former MP @Muhmed_Ismail, Deputy Male' City mayor @ahmed_narysh, councilor @AhmedAifan and some of our youth members were arrested. We condemn this because we lack freedom of expression, and we demand their immediate release. #IndiaOut pic.twitter.com/1kUPnee7Ez
— Progressive Party of Maldives (@ProgressPartyMV) January 6, 2022
އިއްޔެ ކުރިއަށް ދިޔަ އިންޑިއާ އައުޓް ހަރަކާތުގައިވެސް މުހައްމަދު އިސްމާއިލްވަނީ ހައްޔަރުކޮށްފައެވެ. އަދި އޭނާއާއިއެކު 11 މީހަކު އިއްޔެވެސް ހައްޔަރު ކުރިއެވެ.
ރާއްޖޭގައި ތިބި އިންޑިއާ ސިފައިން ބޭރު ކޮށްލުމަށް ކުރިއަށް ގެންދާ "އިންޑިއާ އައުޓް" ހަރަކާތް ކުރީގެ ރައީސް އަބްދުﷲ ޔާމީން މިނިވަން ވުމާއި އެކީ އިތުރަށް ވަނީ ފުޅާ ކޮށްފައެވެ. އެގޮތުން މި ހަރަކާތް މާލޭގެ އިތުރުން ރާއްޖޭގެ ރަށްތަކުގައި ވެސް ވަނީ ކުރިއަށް ގެންގޮސްފައެވެ.
އިންޑިއާގެ އައުޓް ހަރަކާތުގައި ބައިވެރިވި ބައެއް މީހުން ހައްޔަރު ކޮށްފައިވާއިރު، މާދަމާވެސް މާލޭގައި އިންޑިއާ އައުޓްގެ ނަމުގައި ބޮޑު ހަރަކާތެއް ބޭއްވުމަށް ވަނީ ނިންމާފައެވެ.
