ރާއްޖެއަށް މިއަހަރު ޒިޔާރަތްކުރި 1.3 މިލިއަން ވަނަ ފަތުރުވެރިޔާއަށް ހޫނު މަރުޙަބާ ކިޔައިފިއެވެ. މިއަހަރުގެ 1.3 މިލިންވަނަ ފަތުރުވެރިޔާ އަކީ ރޮމޭނިޔާ ރައްޔިތެއްކަމަށްވާ އެމިލް މޮޓްއެވެ. އޭނާ ރާއްޖެއައީ އޭނާގެ އާއިލާއާއެކު ޗުއްޓީ ހޭދަކޮށްލުމަށެވެ. މިފަތުވެރިޔާ އައިސްފައިވަނީ ގްލިވް އެއަރއިންނެވެ.
އެ ފަތުރުވެރިޔާއަށް ވެލާނާ އިންޓަނޭޝަނަލް އެއަރޕޯޓުން މަރުހަބާ ވިދާޅުވީ ޓޫރިޒަމް މިނިސްޓަރ ޑރ.ޢަބްދުﷲ މަޢުސޫމްއާއި އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދާއި އެމްއޭސީއެލްގެ އިސްވެރިންގެ އިތުރުން ފަތުރުވެރިކަމުގެ ސިނާއަތުގައި ހަރަކާތްތެރިވާ އިސް ބައެއް ބޭފުޅުންނެވެ.
މީޑިއާއަށް މައުލޫމާތުދެމުން އެމިލް ބުނީ މިއީ އޭނާ ރާއްޖެއައި 2ވަނަ ފަހަރުކަމަށާއި، ރާއްޖެއަށް އެންމެ ފުރަތަމަ އައީ އޭނާގެ ހަނީމޫންއަށް މީގެ 5 އަހަރު ކުރިންކަމަށެވެ. އޭގެފަހުން އަބަދުވެސް ރާއްޖެ އަންނަން ބޭނުންވާކަމަށާއި ނަމަވެސް ކޯވިޑް-19 ގެ ސަބަބުން ރާއްޖެ އައުން ލަސްވީކަމަށެވެ.
އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ މުނާސަބަތުކަމުން ދިވެހިންނަށް އެކަމުގެ ތަހުނިޔާވެސް އެމިލް ކިޔެވެ.
ޓޫރިޒަމް މިނިސްޓަރ ޑރ.ޢަބްދުﷲ މައުސޫމް ވިދާޅުވީ، ރާއްޖޭގެ ފަތުރުވެރިކަމުގެ ކާމިޔާބީ ގުޅިފައި އޮތީ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކާކަމަށެވެ. މިއީ އެންމެން އެއްބައިވަންތަވެ ހޯދުނު ކާމިޔާބީއެއްކަމަށް މިނިސްޓަރ ފާހަގަކުރެއްވިއެވެ.
އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވީ، 1.3 މިލިއަން ފަތުރުވެރިން ރާއްޖެ އައުމަކީ ކާމިޔާބީއެއްކަމަށެވެ. ފަތުރުވެރިކަން ކުރިއަރާފައިވާ އެހެން ޤައުމުތައް ބަންދުކޮށްފައިވާއިރު ރާއްޖެއިން ރައްކާތެރިކަމުގެ ފިޔަވަޅުތަކާއެކު ފަތުރުވެރިކަން ކުރިއަރުވަމުން ދިއުމަކީ ބޮޑު ކާމިޔާބީއެއްގެ ގޮތުގައި ޠައްޔިބު ފާހަގަކުރެއްވިއެވެ. ނަމަވެސް މި ކާމިޔާބު ދެމެހެއްޓޭނީ ކޯވިޑް-19އަށް ރައްކާތެރިވުމަށް އަޅާފައިހުރި ފިޔަވަޅުތަކަށް ބޯލަންބައިގެންކަމަށް ޠައްޔިބު ވިދާޅުވިއެވެ.
The Maldives has achieved the 1.3 million tourist visitors milestone today! This is all thanks to the teamwork, diligence, and dedication of our frontline workers, government agencies and tourism industry stakeholders.#VisitMaldives #SunnySideofLife #WorldsLeadingDestination2021 pic.twitter.com/yWDg3plYFB
— Visit Maldives (@visitmaldives) December 27, 2021
މިއަހަރ ރާއްޖެއަށް ގެނައުމަށް ތާގެޓްކުރީ 1 މިލިއަން ފަތުރުވެރިންނެވެ. ނަމަވެސް އެ ޢަދަދު ފަހަނައަޅާއިގޮސް 1.3 މިލިއަން ފަތުރުވެރިން ރާއްޖެ މިވަނީ ޒިޔާރަތްކޮށްފައެވެ. އަދި މި ސިނާއަތުން އަންނަ އަހަރަށް އަމާޒުކޮށްފައިވަނީ 2 މިލިއަން ފަތުރުވެރިން ގެނައުމަށެވެ.
