ފިިލިޕީންސްއަށް މިހާރު ކުރަމުންދާ ވިއްސާރާގައި އެޤައުމުގެ ބޮޑ ސަރަހައްދަށް ގެއްލުންތަކެއް ލިބިފައިވާތީ އެޤައުމުގައި ތިބި ދިވެހި ދަރިވަރުންގެ ހާލު ވަރަށްގާތުން ބަލަމުންދާކަމަށް ފޮރިން މިނިސްޓްރީން ބުނެފިއެވެ. ތޫފާން ރާއީގެ ސަބަބުން ފިލިޕީންސްއަށް ވަރަށް ބޮޑަށް މޫސުން ގޯސްވެ، ބޮޑެތި ގެއްލުންތަކެއ ްވަނީ ލިބިފައެވެ.
ފޮރިން މިންސްޓްރީން ބުނީ ފިލިޕީންގައި ތިބި ދިވެހި ކުދިންނަށް ބޭނުންވާ އެހީތެރިކަން ފޯރުކޮށްދިނުމަށް މަސައްކަތް ކުރަމުންދާކަމަށެވެ.
ފޮރިން މިނިސްޓްރީން ބުނީ، ފިލިޕީންސްއަށް އެރި ތޫފާނުގައި ގެއްލުން ލިބުނު ސަރަހައްދުތަކުގައި ތިބި ދިވެހި ދަރިވަރުންގެ ރައްކާތެރިކަން ކަށަވަރުކުރުމަށް ފިލިޕީންސްގެ ކަމާބެހޭ ފަރާތްތަކާއި، ފިލިޕީންސްއިން ރާއްޖެއަށް ކަނޑައަޅުއްވާފައި ހުންނަވާ ސަފީރު އަދި ފިލިޕީންސްގައި ހުންނަވާ ދިވެހިރާއްޖޭގެ އޮނަރަރީ ކޮންސުލް ގުޅިގެން މަސައްކަތްކުރަމުންދާކަމަށެވެ.
ފިލިޕީންސްގެ ނެޝަނަލް ޑިޒާސްޓަރ ރިސްކް ރިޑަކްޝަން އެންޑް މެނޭޖްމަންޓް ކައުންސިލާއި ގުޅިގެން ކާބޯތަކެއްޗާއި ފެނުގެ އިމަރޖެންސީ ސަޕްލައި ކަށަވަރު ކުރުމުގެ މަސައްކަތް ކުރަމުންދާކަމަށް ފޮރިން މިނިސްޓްރީން ބުންޏެވެ. އަދި ތޫފާން ރާއީގެ ސަބަބުން ބޮޑެތި ގެއްލުންތަކެއް ލިބި، ފިލިޕީންސްގެ ބައެއް ހިސާބުތަކުގައި މުވާސަލާތީ ގުޅުންތައްކެނޑިފައިވާތީ، ދަރިވަރުންނާއި އެކުދިންގެ އާއިލާތަކާ ދެމެދު މުވާސަލާތީ ގުޅުން ގާއިމްކުރުމުގެ މަސައްކަތް ކުރަމުންދާކަމަށްވެސް އެ މިނިސްޓްރީން ބުންޏެވެ.
ފިލިޕީންސުގެ ސަރުކާރުން ބުނެފައިވަނީ ތޫފާނުގެ ސަބަބުން ލިބުނު ގެއްލުންތަކުގެ ތަފްޞީލުތައް ދެނެގަންނަމުންދާކަމަށާއި ގެއްލުންތަކަށް ބަދަލުދޭނެކަމަށެވެ. އަދި ގިނަ ބަޔަކު މަރުވީ ގަސްތައް ވެއްޓި އިމާރާތްތައް ދަށުވެގެންކަމަށާއި އެ ޤައުމުގެ ގިނަ ސަރަޙައްދުތަކުގައި ފެންބޮޑުވެފައިވާކަމަށްވެސް އެ ޤައުމުގެ ސަރުކާރުން ބުނެފައިވެއެވެ.
ތޫފާނު ރާއީ ފިލިޕީންސަށް އަރާފައިވަނީ ގަޑިއަކު 195 ކިލޯމީޓަރުގެ ބާރުމިނުގައެވެ. އެއީ މި އަހަރުގެ ތެރޭގައި ފިލިޕީންސަށް ކުރިމަތިވި އެންމެ ނުރައްކާތެރި އަދި ގެއްލުން ބޮޑު ތޫފާނެވެ. އެ ގޮތުން ގިނަ ޢަދަދެއްގެ އިމާރާތްތަކަށް ގެއްލުންވެ 300،000އަށްވުރެ ގިނަ މީހުންވަނީ ޙާލުގައި ޖެހިފައެވެ.
ތަފާސްހިސާބުތަކުން ދައްކައި ގޮތުގައި ފިލިޕީންސަށް އަހަރަކު ގާތްގަނޑަކަށް 20 ތޫފާނު އަރައެވެ.
