ރާއްޖޭގެ މަސްވެރިކަމުގެ ދާއިރާގައި މިހާރު ވަނީ އެތައް ގުނައެއް ކުރިއަށް ޖެހިފައިކަމަށް މޯލްޑިވްސް ރިފޯމް މޫވްމަންޓް (އެމްއާރުއެމް) އިން ބުނެފިއެވެ.
ދިވެހިރާއްޖޭގެ މަސްވެރިންގެ ދުވަހުގެ ތަހުނިޔާ ރާއްޖޭގެ ހީވާގި މަސްވެރިންނަށާއި، މަސްވެރި ޢާއިލާ ތަކަށާއި، މިނިސްޓަރ އޮފް ފިޝަރީސް، މެރިން ރިސޯރސަސް އެންޑް އެގްރިކަލްޗަރ ޑރ. ހުސެއިން ރަޝީދަށާއި އަދި މި ޞިނާޢަތުގަ މަސައްކަތް ކުރާ ހުރިހާ ފަރާތްތަކަށް އެމްއާރުއެމްއިން ވަނީ ދަންނަވާފައެވެ.
އެޕާޓީން ބުނީ މަސްވެރިކަމުގެ ދާއިރާގައި މިހާރު ދިވެހިރާއްޖެ މިވަނީ އެތައް ގުނައެއް ކުރިއަށްޖެހިފައިކަމަށެވެ. އެކަމަށްޓަކައި ހުރިހާ ދިވެހީންވެސް މިއަދު ފަޚުރުވެރިވާކަމަށާއި، އަދި މިދުވަހުގެ މުނާސަބަތުގައި، ދިވެހި މަސްވެރިންނަށާއި މި ޞިނާޢަތުގައި ޚިދުމަތް ކުރައްވާ އެންމެހާފަރާތްތަކަށް ޝުކުރުދަންނަވާކަމަށް އެމްއާރުއެމްއިން ވަނީ ބުނެފައެވެ.
މަސްވެރިންގެ ދުވަހުގެ ތަހުނިޔާ އެމްއާރުއެމްގެ ރައީސް މައުމޫންވެސް ވަނީ ދިވެހި މަސްވެރިންނަށް ފޮނުވާފައެވެ. ރައީސް މައުމޫން ވިދާޅުވީ ޒަމާނަށް އަންނަ ތަރައްޤީއާ ފައިހަމަވާގޮތަށް ޓެކްނޯލޮޖީގެ އެހީގައި ދިވެހި މަސްވެރިކަން ތަރައްޤީކުރުން މުހިންމު ކަމުގައެވެ.
މަސްވެރިންގެ ދުވަސް މިއަދު ރާއްޖޭގެ އެކި ކަންކޮޅުތަކުގައި ކުލަގަދަކޮށް ފާހަގަ ކުރަމުންދާއިރު، މަސްވެރިންގެ ދުވަހުގެ ޚާއްސަ ޖަލްމާ މިރޭ ކ.ގާފަރުގައި ބޭއްވުމަށް ވަނީ ހަމަޖެހިފައެވެ. މިޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ބައިވެރިވެ ވަޑައިގަންނަވައެވެ.
